اعمال رسولان 20
20
پولُس شی به مقدونیه و یونان
1وختی بلوا تمان آبه، پولس شاگردش داد بکردنده اِشتن وَر و چَوان تشویق کردنَه پَش، اَواننه خداحافظیش بکه و بِشه مقدونیه منطقه را. 2پولس، اَ منطقه نه اِوردرده، اِشتن لاوان نه ایماندارانش پر دلگرمی آدا، تا آرسس یونان. 3پولس سُه ماه اَگارک بِندَرِس. اَ دمی که رایش به کَشتی نه بیشی سوریه، یهودییِه چَوه ضد توطئه شان بکرده. پس تصمیمش بِکته که مقدونیه راه نه آگرده. 4پولِسه هَمراهه اِمه بنده، سوپاتِروس، پیرروسه زا که بیریه مردمک به، آریستارخوس و سِکونُدوس که تِسالونیکی مردمک بنده، گایوس و تیموتائوس که دِربِه مردمک بنده، تیخیکوس و تْروفیموس که آسیا مردمک بِنده. 5اَوه چاما پران تر بِشنده و تْروآسه شهرک چاما منتظر ببنده. 6ولی آما، فَطیره عیده پَش، کشتی نه فیلیپی شهرنه را دگسمان و پنج روجه پَش، تْروآسک چوان ور بشمان و هفت روج اَگارک بندرسمان.
یوتیخسِه زنده آبیین
7هفته اولین روجک، نانه پاره کردنه را بیدا آبِمان. پولُس مردم نه لاوش کَرده و چون رایش به صبا اَگاردِنه بیشی، تا شوه نصبه را لاوش بکه. 8اَ بالاخانهای کی که بیدا آبییه بمان، پر چیروع روشن به. 9ایگله جوانی پنجره وَرک نشته به که چَه نام یوتیخس به، وقتی پولسه لاوَه کردرده اَ جوان کم کم سنگینه خون آشِه و ایرادَن سومین طبقۀ نه جیگیس جیر. وقتی اَوشان اَکته بیندشانه که اَ مَرده. 10پولُس بشه جیر، اَخوت جوانه مردکه سَر و اَوش وَروار آکَته و باتشه: «مَتَرسا، اَ حلا مَرده نیه!» 11چاوش بشه کفا و نانش پاره بکه و بِخرده. اَو تا سحره موقع اَواننه لاوش بکه، و چاوش اَگارنه بشه. 12مردم اَ جوانِشان زنده ببرده کییه و پیله تسلی ای بکتشانه. 13ولی آما چاما سَفرک، پولسه پرانتر ایگله کشتی دِنشتمان، بیشمان آسوس شهر. تا طبق قراری که پولس نه داشتمانه، اَوه بوعَرام کشتی دلَه، چون پولس رایش به تا خشکی راه نه بیشی اَگا. 14وختی پولُسمان، آسوسک بینده، اَومان بوعَرده کشتی دلَه و بیشِمان میتیلینی شهره را. 15اَگارنه کشتی نه بِشمان و صباینه روج آرسسمان خیوسه جزیره. پَشرایی بِشمان ساموسه جزیره و پَشدَرو آرسسمان میلیتوسه شهر. 16پولُسه تصمیم داشته که دریا رانه اِفِسُسه وَرنه اِوره تا آسیا ایالتک اِشتن وقته هدر مَدیه، چون عجله داشتشه که اگم ممکن بیبی، پِنتیکاسته روجه را اورشلیمه شهرک بیبی.
پولس اَفسسه شیخان نه خدافظی کره
17پولس، میلیتوس نه ایگله پیغامی بخرسانسشه اِفِسُس و کلیسا شیخانش داد بکردنده اِشتن وَر. 18وختی اَوه بامنده، پولس اَواننه باتشه: «شاما زانسرا که از هَ اولین روجنه که چِمن پام آسیا ایالتک بنا، چُنجوره چِمن تمام وقتم شاما را بنا. 19چُنجوره تمام فروتنی نه و اَسرگ اَرکردننه خداوندم خِدمَت کرده، و چییانی که یهودیان توطئه هان واسنه چِمن سر آمییه، تُوعم بَرده. 20ایزه که زانسرا، از هر چی که ممکن به شاما را فایده بداره، چی ای دریغ نکردمه، بلکم پیغامم شاما را اعلام بکه، چِه جمعِه دلَک و چِه کییه به کییه شامام تعلیم آدیه. 21هم یهودیان و هم یونانیان را، شهادتم بدا که گه توبه نه آگردنده خدا طرفه را و چاما خداوند عیسی مسیحه ایمان بوعَرنده.
22«و اِسا، خدا روحه هدایت نه شیم اورشلیم و نزانسرم اَگارک چِمن سر چِه آییه؛ 23چِمه غیراز که هر شهرک خدا مقدسه روح هشدار دَیه که زندان و سختی چِمن انتظارکه. 24ولی از هَم جان و هَم زندگی چِمن را بیارزش زانم، فقط اَگم بتانم چِمن دویره اُوجرم و اَ خدمتی که عیسی خداوندک اَرکتمه، تا آخر انجام بِدَیم، و خدا فیضه شاده خبره شهادت بدَم.
25«اِسا زانسرم که هیچ کامین شاماک که از شاما دلَک گردِسِم و خدا پادشاهیم شاما را اعلام کَرده، دَ من نیوینا. 26پس اُوری شاما شهادت دیم که شاما هیچکامینه خون دَ چِمن گردن نیه. 27چون از کسی حقک کوتاهی نکردمه، بلکم خدا پیغامم کامل همان را اعلامم بکه. 28شاما حواس جمع بیبی. شاما حواس همهی رَمَه هانی بیبی که خدا مقدسه روح شاما چَوان ویر داشتنه را انتخابش کرده. خدا کلیسا را که اِشتن خوننه اَوش خرییه، شوانتی بکرا. 29زانسرم که چِمن شییَنه پَش، درّنده وَرگه آیینده شاما دلَه و رَمه رحم نکرنده. 30حتی شاما اِشتن دلَک کسانی حیضنده که حقیقته آگاردننده تا شاگردان بِکشنده اِشتن پَشه و اَوان راک برکردنده. 31پس هوشیار ببا و ویر بوعرا که از سُه سالِه تمام، شَو و روج، اَسرگنه ای لحظه نی شاما هشدار دییَنکم، دس اَنِکت.
32«اِسا شاما دِرسمارم خدا و چَه فیض بخشه کلامه که تانه شاما بنا بِکَره و همهی کسانی دلَک که تقدیس بیینده، اِرث ببَخشه. 33چِمن چَشمه هیچکسه طلا، نقره و یا خلوعه، پشه نییه. 34شاما اِشتن زانسرا که چِمن دسنه، چِمن و چِمن همراهان احتیاجانم برطرف کرده. 35از همه جوره شامام آمانسَه که گه ایزه سخت کار بکرام تا بتانام ضعیفان دسِه بیگیرام، و عیسی خداونده لاوان ویر بدارام که چنجوره اَ اِشتن باتشه: ”آدین، اَرکتنک چاکتره.“»
36پولس اِشتن لاوش اُوجردنده، زانوش بیزی و همهی اَواننه دعاش بکه. 37همه پِر ببرمسنده و اَوشان وَروار آکته، اَوشان ماچ بکه. 38اَ چی ای که همان پرتر اَوانش ناراحت کردرده، پولسه اِم لاوَه به که باتشه: «دَ من نیوینا.» چاوش تا کشتی وَر اَونه بِشنده رادرازی.
Currently Selected:
اعمال رسولان 20: TIT
Highlight
Copy
Compare
Share
Want to have your highlights saved across all your devices? Sign up or sign in
@ 2024 Korpu Company