اعمال رسولان 19
19
پولُس اِفِسُسک
1ولی اَدمی که آپولُس قُرِنتُسه شهرک بِه، پولُس بعداز اِم که اَ منطقه هان نه خشکی راه نه اِوردرده، آرسس اِفِسُسه شهر. اَگارک چند گله شاگردش بیندنده 2و اَوانک آپرسسشه: «وقتی که ایمان ران بوعرده، خدا مقدس روح ران اَرکته؟»
اَوان باتشانه: «نه، آما حتی اَشنوسمان نییه که خدا مقدسه روح نی اِسه.»
3پولس اَوان نه باتشه: «پس چنجوره غسل تعمید کَترانه؟»
اَوان باتشانه: «یحیی غسل تعمید.»
4پولُس باتشه: «یحیی کسانی که رایشان به توبه بکرنده تعمید دِسشه. اَ، مردم نه واتشه اَ کسی که چَوه پَش آییه اَوه ایمان بوعرنده، یانی عیسی.» 5وختی اَوان اِمشان بشونس، عیسی خداوند نامه نه غسل تعمیدشان بِکَته. 6و وقتی که پولُس چَوان سرکش دس اَنا، خدا مقدسه روح چَوان سر قرار بکتشه. اَوان جور باجوره زُواناننه لاوشان کردرده و نبوّتشان بکه. 7اَ مردکه، همبلنه حدوداً دونزده نفر بِنده.
8چاوش پولُس بشه یهودیان عبادتگاه، اَگارک سُه ماه جراتنه لاوش بکرده و دلیلش آورده و خدا پادشاهی درباره اَوانش قانع کردنده. 9امّا بعضی زیر بار نیشیردنده و ایمانشان ناوردرده و همان چشمان پرانک اهل، ’طریقت‘ یعنی ایمانداران، بدیشان واته. پس پولُس اَوانک جدا آبه، اِشتن شاگردش اَکَتنده و هر روج تیرانوسه مدرسک لاوش کرده و دلیلش آورده. 10دو سال ایزه اِورده و اِم مدتک، همهی ایالت آسیا مردم، چِه یهودی و چِه یونانی، خداونده کلام شان بَشنوس.
اِسکیوایی زاره
11خدا پولُسه دسنه عجیب غریبه معجزاتش انجام بدا، 12ایزه که مردم دستمالان و پیشبندانی که چَوه جانه گِسَه بنده، مریضان را بردردشانه، و چَوان مریضی چاک آبییرده و پلید ارواح اَوانک بَر شییردنده.
13پس چند نفر یهودی که جن گیر و دویره گرد بِنده نی تقلاشان بکه عیسی خداوند نامه کسانی را که پلید ارواح شان داشته، بخوانِنده. اَوان واترده: «شاما قسم دیام به اَ عیسایی که پولُس اَوه موعظه کره!» 14کسانی که اِیزشان کرده، اِسکیوایی هفت گله زاره بنده که یهوده ایگله سران کاهنانک بنده. 15امّا پلید روح چَوان جواوک باتشه: «عیسی آزانم، پولُسه نی آزانم، امّا شاما دَ کیه ران؟» 16اَ مردکی که پلید روح داشتشه چَوان سر حملش بکه، ایزه اَوش بیزینده که لخت و زخمی اَ کییه نه دِوشتنده.
17همهي اِفِسُسیه مردم، چِه یهودی و چِه یونانی، اِم کارک خبردار ببنده، همان جانک ترس دگس، ایزه که چَوه پَش عیسی خداوند نامشان پِر احترام نِسه. 18و پِر کسانی که ایمانشان آورده به نی، پران بامنده، آشکارا اِشتن کارشان اعتراف بکرده. 19پر کسه نی که چَوه پران تر جادوگری شان کرده، اِشتن کتابشان بوعَردنده و همان چشمان پرانکشان بوسوجانس. وختی کتابان پولشان حساب بکرده، پنجاه هزار گله نقره سکه بِه. 20ایزه، خداوند کلام همه یاگاک پخش بییرده و قوّتش کَترده.
21اِم اتفاقانه پَش، پولُس، خدا روحک هدایت ببه که مقدونیه و اَخائیه منطقه را نه، آگرده اورشلیم. پولس باتشه: «چِمن اَگا شییَنه پَش، گه روم شهره نی بینِم.» 22چاوش دو نفر اِشتن همکارانک، تیموتائوس و اِراستوسش بخرسانس مقدونیه و اِشتن چند وقت آسیا ایالتک بِندَرِس.
بلوا اِفِسُسک
23اِم موقعک، اهل ’طریقت‘ یعنی ایمان داران ضد، ایگله یکه بلوایی برپا ببه. 24ایگله نقره کاری که چَه نام دیمیتریوس به، آرتمیسه معبده را نقره چی یانش رچ آکرده و اِم راه نه پره درآمدی صنعتگران نصیب کردش به، 25دیمیتریوس صنعتگران و ایزنه کاران صاحبانش بیدا آکتنده و اَوان نه باتشه: «آقایان، زانسرا که چاما درآمد اِم کسب و کارک اِسه. 26امّا ایزه که ویندرا و اَشنوسرا، اِم پولُس نه فقط اِفِسُسک، بلکم تقریباً تمان آسیا ایالتک، پر یکه جماعتش قانع و گمراه کردنده. اَو واتر خدایانی که آدمه دستنه رچ آبینده، خدایان نینده. 27پس اِم خطر اِسه که نه فقط چاما کسب و کار رونقک دگنه، بلکم آرتِمیس چاما پیله الهۀ معبد نی هیچ آبییه و حتی اِشتن عظمته از دس بدییه. اَ الهه ای که تمان آسیا ایالتک و تمانِ دنیاک پرستش بییه.»
28اَوان وختی اِمشان بشنوش، پر عصبانی آبنده، جرشان بکه که «پیله اِسّا اِفِسُسیان آرتِمیسه!» 29تمان شهرک بلوا ببه! همهی مردم همدس بِبنده و هجوم ببردشانه مسابقات میدانه طرفه را. اَوان گایوس و آریستارخوس که مقدونیه اهالیک بِنده و پولُسه همراهانک بنده، دورانتن دورانتننه اِشتن نه ببردشاننده. 30پولُس رایش به بیشی جماعته دلَه، امّا شاگردان نَشتِه. 31حتی آسیا ایالته حاکمانک بعضی که چَه رفق بنده، چَوه را پیغامشان بخرسانس، خواهش شان بکه که مسابقاته میدانک مَشی.
32جماعته دلک غوغا بِه و مردم گیج بنده. همه جرشان کردرده و هر کسی ای چی ای واتَرده و پرتره مردم نزانسردشانه چیه را بیدا آبینده. 33بعضیان ایزشان گمان کردرده که اسکندر مسئول اِسته، چون یهودییان، اسکندرشان پران درنده به، و بعضی جماعته میاننه اَوشان دستورانی آدیَرده. اسکندر اِشتن دسش تکان آدا، مردمک آخاشته که ساکت بیبینده و تقلاش بکه که چی ای باجه و اِشتنک دفاع بکره. 34امّا وختی مردم بزانسشانه یهودییه، همه ای صدا، حدوداً دو ساعت جرشان کردرده: «پیله اِسا اِفِسُسیان آرتِمیسه!»
35آخر سر، شهره داروغۀ جماعتش آرام بکه و باتشه: «ای اِفِسُسیه مردکان، کیه که مزانه اِفِسُسِه شهر پیله آرتِمیسه معبده نگهبانا؟ کیه که مزانه اِفِسُسه شهر مقدس سِگی نگهبانا که آسماننه جیگیسا جیر؟ 36پس چون نیبی اِم چییان هاشا کردن، شاما گه آرام ببا و هویل هویلکی کاری مَکَرا. 37چون شاما اِم مردکانی که یاران آوردَنده، نه چاما معبدشان بی حرمتی کرده و نه چاما الهۀ نه شان کفر واته. 38پس اگم دیمیتریوس و صنعتگرانی که اَونه همکارنده کسیک شکایت دارنده، دادگاهان بر آواجه و حاکمه نی حاضرنده. تانده اِشتن شکایتان ببرنده اَگا. 39امّا اگم علوده شکایتی دارا، گه اَوه، شهره انجمنک حل و فصل بِکراه. 40چون آما راس راسینه اِم خطرک اِسمان که اُوری اتفاقان واسنه، شورشگری را محکوم ببام. اگم ایزه بیبی، نتانام اِم بلوا را دلیلی بوعَرام.» 41وقتی که داروغه اِمش باته جماعتش پخش آکه.
Currently Selected:
اعمال رسولان 19: TIT
Highlight
Copy
Compare
Share
Want to have your highlights saved across all your devices? Sign up or sign in
@ 2024 Korpu Company