اعمال رسولان 17
17
پولس و سیلاس تِسالونیکییک
1پولُس و سیلاس، شهران آمْفیپولیس و آپولونیاک اِوردندِه و آرسسنده شهر تِسالونیکی، که اَگارک یهودیان عبادتگاه داشته. 2پولُس طبق اِشتن عادت بشه عبادتگاه، اَ، سُه گله مقدسه شنبه روجک درباره مقدسه نیویشته هان اَواننه بحثش کردرده 3و توضیحش آدییرده، دلیلش آوردرده که لازم به که مسیح رنج بکشه و مردهان دلَک زنده آبی. پولس واتردشه: «اِم عیسی که اَوه شاما را اعلام کَرِم، هَ مسیحه موعود اِسه.» 4بعضی از اَوان قانع ببنده که پولس و سیلاسه همراه بیبینده. و ایزه نی ایگله پیله گروهی خداپرست یونانیانک و پر سرشناسه زلیان اَوان ملحق بِبنده.
5امّا یهودیان پخیلتی شان بکه و چند نفر قالتاقه آدم شان بازارک بیدا آکته، ای دسته شان راه دِرنده و شهرک بلواشان به پا بکرده. یهودیان پولُس و سیلاس پَشه گردسِنده و حملشان بکرده یاسون کییه تا اَوان جماعت دلنه بوعرنده بر. 6وختی اَوان شان نیویندنده، یاسون و بعضی عَلوده برارانشان ببردنده شهره حاکمان ور و جرشان بکه که «اِم مردکه که همهی دنیاشان هندیگر زییه، اِسا آمیینده اِنگا 7و یاسون اَوانش بردَنده اِشتن کییه. اِمِه همبلنه امپراطوره دستورانکشان سرپیچی کرده و ادعا کردرنده که علوده پادشاهی اِسه که چَه نام عیسیه.» 8وختی مردم و شهر حاکمان اِم شان بشنوسه، پریشان ببنده. 9چاوش یاسون و اَدرینان کشان ضمانت اَرگته، و اَوانشان آزاد بکردنده.
پولُس و سیلاس بیرییک
10براران شوانه، البحل پولُس و سیلاس شان بخرسانس بیریه شهره را. اَوان وختی آرَسسنده اَ شهر، بشنده یهودییان عبادتگاه دله. 11اِم یهودییان اَ یهودیانیک که تِسالونیکی شهرک بنده، نجیبتر بنده، اَوان ذوقنه پیغامشان قبول بکرده و هر روج مقدّس نیویشته شان خوانده تا بیننده که پولس و سیلاسه لاوَه خدا کلامه شوار اِسه یا نه. 12ایزه، خیلی از یهودیان ایمانشان بوعرده و زلیانی که ایمانشان آورده به نی کم نبنده و یونانیَه سرشناسه مردکه نی ایمان شان بوعرده.
13امّا وختی تِسالونیکی یهودیان بِزانسشانه که پولُس بیریه شهرک نی خدا کلامه اعلام کره، بِشنده اَگا و مردم شان جوکو بداه، شهرکشان بلوا به پا بکرده. 14براران البحل پولُس شان بخرسانس ساحل طرفه را، امّا سیلاس و تیموتائوس بیریک بِماندنده. 15کسانی که پولسه شان همراهی کرده، اَوشان تا آتن شهر ببرده و چَوه پَش که پولس اَوانش دستور بدا که آگردنده بیریه شهره را و سیلاس و تیموتائوسه البحل بخرساننده چَه ور.
پولُس آتنک
16اَدمی که پولُس آتنک اَ دو نفره منتظر به، وقتی ویندردشه شهر، بُتان نه فِته، چَه روح ناراحت ببه. 17چِمه واسنه، عبادتگاک یهودیان و یونانیانی که خداپرست بندنه و ایزه نی هر روج شهره میدانک را اِوَراراننه بحثش کَرده. 18چندگله از اپیکوری و رواقی فیلسوفان نی اَوه نه بحثشان بکه. بعضی از اَوان واتردشانه: «اِم پره لاوَه کر، رایشه چِه باجه؟» اَدرینان واتردشانه: «چه شی بیگانه خدایان تبلیغ کردره.» چون پولُس، عیسی و مردان زنده آبیینه درباره چوان را لاوش کردرده. 19هَ موقع پولوسشان اَکته، ببردشانه ’آریوپاگوس‘ ، ه یاگایی که مردم اَگارک بیدا آبسنده، و اَگارک اَونه باتشانه: «تانام زانسن اِم تازه تعلیم که ته دییَری، چیه؟ 20اِشته لاوَه چاما گوشک عجیب غریبنده. پس رایمانه بزانام چَوان معنی چییه.» 21همهی آتنه مردم و خَلکانی که اَگارکشان زندگی کردرده، کاری چِمه غیراز نداشته شانه که اِشتن وقته بنینده تازه عقایدان درباره لاوَه بکرنده و گوش آدینده.
22پس پولُس ’آریوپاگوس‘ جَمعه دلَک بِهِشت و باتشه: «ای آتنیه مردکان، از شامام هر نظرک پِر دیندار بیندمه. 23چون وقتی شهر دلک گرسردم و اَ چی ای که شاما پرستش کردرده بیندمه، ایگله قربانه یاگایی بیندمه که چَه کفاینه سرک نیویشتشان به: ”تقدیم به خدایی که ناشناسه“. اِسا، اَز اَ چی که شاما اَوه آنزانا و پرستش کردرا، شاما را اعلام کَرم.
24«خدایی که دنیا و هر چی که چَه دلَکه خلقش کرده، آسمان و زمینه صاحاب اِسه و معبدانی کی که آدمه دسنه رچ آبییَنده زندگی نکره. 25و چییانی که آدمه رایشانه اِشتن دسِنه خدا را رچ آکرنده محتاج نییه، چون اَ اِشتن همهی مردمه زندگی و نَفَس و هر عَلوده چیش بخشسه. 26اَ همهی قومش ایگله انسانی کی به وجود بوعرده تا تمانِ زمینک زندگی بکرنده؛ و چَوان را وقتش تعیین بکرده و چَوان زندگی یاگا را حد و حدودش تعیین بِکه. 27تا مردم خدا پَشه بگردنده، بلکم چوه پشه بیشینده و اَوه پیدا بکرنده، هر چند خدا، هیچ کامین از آماک دور نییه. 28چون که،
”چوه دلَکه که زندگی کرام و لِوسرام و اِسِمان؛“
اَجوره که بعضی از شاما شاعره نی واتشانه که:
”حقیقتا چَه نسلکمان.“
29«اِسا که خدا نسلکمان، چاک نییه ایزه فکر بکرام که خدا، ایگله طلا یا نقره یا سِگی شوار اِسه، یا ایگله مجسمه ای شوار که آدمه هنر و خیالاتنه تِراشسه بییه. 30قدیمان، خدا ایزه نادان کارانک چشم پوشیش کرده. امّا اِسا همهی مردم را هر یاگاک که اِسنده دستور دییشه که توبه بکرنده. 31چون اَ، ای روجش تعیین کرده که اَ روجک اَ مردکه واسطنه که معیینش کرده، عدالتنه دنیا داوری بکره، و چَه زنده آکردننه مَردان دلَک، همش اِم ماجراک خاطر جمع بکردنده.»
32وختی اَوان مردان زنده آبیینه درباره بشنوسشانه، بعضی نیش خند بیزیشانه، امّا اَدرینان باتشانه: «آما رایمانه اِم چییان درباره، هنی تک بشنوام.» 33پس پولُس، چَوان جمعه دلنه بشه. 34ولی چند نفر اَونه همراه ببنده و ایمانشان بوعرده. و چَوان دلَک دیونیسیوس، که ’آریوپاگوسه‘ ایگله آدمانک به، ایگله زلی ای که چَه نام داماریس به، و چند نفر علوده نی، اَواننه بِنده.
Currently Selected:
اعمال رسولان 17: TIT
Highlight
Copy
Compare
Share
Want to have your highlights saved across all your devices? Sign up or sign in
@ 2024 Korpu Company