نامه رومیان ره 16
16
سلام و درود
1اَمی خاخور فیبی سفارشَ شمرأ کونم. اون جه كِنخْريه شارِ کلیسا خیدمتکاران ایسه. 2اونَ خُداوند درون، اوجور کی مقدّسین لایق ایسه، قُبیل بُکونید و هر کمکی کی شیمی جا بخواسته مضاقا نُکونید، چونکی اون خَیلیانَ، حتی خودِ مَره، خَیلی کمک بُکوده دَره.
3می همکاران مسیحْ عیسی درون، پْريسكيلا و آكيلا یَ، سلام فارسانید. 4اوشان، خوشانِ جانَ می واسی خطر درون تَودَئید، و نه فقط من، بلکی تمان غیر یهودیان کلیسائانم اوشانِ جا تشکر کونیدی. 5هَطویَم، به اُ کلیسایی کی اوشانِ خانه درون همدیگر اَمرا جما بیدی، سلام فارسانید. می عزیز رفق اِپینِتوسَ سلام فارسانید، اون اولین کسی بو کی آسیا درون مسیحَ ایمان باورد. 6مریمَ کی شیمی واسی خَیلی زحمت بکشه، سلام فارسانید. 7می فامیلان، آندْرونیکوس و یونیاَ کی می اَمرا خولتانک درون ایسابید، سلام فارسانید. اوشان رسولان میان، سرشناس ایسید کی پیشتر جه من مسیحَ ایمان دَشتیدی. 8می عزیز رفق خُداوند درون آمپْلیاتوسَ سلام فارسانید. 9اَمی همکاران مسیحِ درون، اوربانوس، و می عزیز رفق اِستاخيسَ، سلام فارسانید. 10آپلیسَ کی خو امتحانَ مسیح درون پس فَده دَره، سلام فارسانید. آریستوبولُسِ خانواده ی سلام فارسانید. 11می خویش و قوم هیرودیون و نارکیسوسِ خانواده ی کی خُداوند درون ایسائید سلام فارسانید. 12تْريفينا و تْريفوسا، خیدمتکارانیَ کی خُداوندِ خیدمتِ درون زحمت کشیدی سلام فارسانید و پرسیسَم کی می اویتا عزیز رفقِ کی خُداوند درون خَیلی زحمت کشه، سلام فارسانید. 13روفُسَ کی خُداوند درون انتخاب بُبوسته و اونِ مار کی در حقِّ منم ماری بُکوده دَره، سلام فارسانید. 14آسینکْریتوس، فْلِگون، هِرماس، پاتْروباس و هِرمس و بقیه ی برارانی کی اَشانِ اَمرا ایسائیدَ، سلام فارسانید. 15فيلولوگوس، يوليا، نيرياس و اونِ خاخور، و اوليمپاس و تمانِ مُقّدسینی کی اوشانِ اَمرا ایسائیدَ، سلام فارسانید. 16همدیگره ایتا مقّدس ماچی اَمرا سلام بیگید. تمانِ مسیحِ کلیسائان شمرأ سلام فارسانیدی.
آخرتا سفارش
17ای براران، خوائم کی شیمی جا خواهش بُکونَم اوشان مراقب بیبید کی سیوایی باعث ایسید و شیمی راه درون سَد نیئیدی و اُ تعلیمی کی شُمان یاد بیگیفتیدِ اَمرا مخالفت کونیدی، اوشانِ جا دوری بُکونید، 18چونکی اَجور آدمان اَمی خُداوند مسیحَ خیدمت نُکونیدی، بلکی خوشانِ شِکمِ فکر ایسید و قشنگ گبان و خاش والیسی اَمرا، ساده آدمانَ گُول زنیدی. 19شیمی اطاعت کودَنِ آوازه همه کسِ میان دکَفته؛ و شیمی واسی خَیلی ذوق کونم. ولی شیمی جا خوائم کی، اونچی جُلُو که خُبِ، دانا و اونچی جُلُو کی بَدِ، ساده بیبید.
20صلح و سلامتی خُدا خَیلی زو شیطانَ شیمی لنگانِ جیر له کونه.
اَمی خُداوند عیسی فیض شیمی اَمرا بِبه.
21می همکار تیموتائوس شمرأ سلام فارسانه. می خویش و قوم لوکیوس، یاسون و سوسیپاتِر ئم شمرأ سلام فارسانیدی.
22من، تِرتیوس، کی اَ نامه یَ بینیویشتم، خُداوند درون شمرأ سلام کونم.
23گایوس کی من و تمان اوشانِ جا کی اَیا کلیسا درون ایساییدِ جا مِیمانداری بُکود، شمرأ سلام فارسانه.
اِراستوس که شار خزانه دار ایسه، و اَمی برار کوآرتوس شمرأ سلام فارسانیدی.
24«اَمی خُداوند عیسی مسیح فیض شُمان همتان اَمرا بِبه. آمین».
25هسّا جلال اونَ کی، تانه عین می انجیل و عیسی مسیحِ پیغامِ موعظه شمرأ تقویت بُکونه- یعنی عین ایتا راز واشکافتن کی خَیلی زمات جیگا بُخورده بمانسته بو، 26ولی الان بنا به پیغمبران بینیویشته ئان و ابدی خُدا حُکمِ اَمرا تمانِ ملتّانِ ره آشکار بُبوست، تا اوشان ایمان باورید و اطاعت بُکونید- 27اونَ کی تنها خُدای دانا ایسه، بواسطه ی عیسی مسیح تا ابد جلال بِبه! آمین.
Currently Selected:
نامه رومیان ره 16: GIL
Highlight
Copy
Compare
Share
Want to have your highlights saved across all your devices? Sign up or sign in
@ 2024 Korpu Company
