مَرقُسِ انجیل 10
10
تعلیم ازدواج و طلاق باره
1عیسی کفرناحوم شارَ تَرکا کود و اُ طرف اُردنْ روخانْ یهودیه منطقه بُشو. ایوار دِه خلق اونِ ورجه جما بوستید، و اون بنا به خو عادت، اوشانَ تعلیم دئی.
2فَریسی فرقه عالمان عیسی ورجه باموئید و اونَ امتحان کودن ره واورسه ئید: «شرعا دُرُسته کی مرد خو زنَ طلاق بده؟» 3عیسی اوشان جواب بدَه: «موسی پیغمبر چی حُکمی شمرأ فدَه؟» 4اوشان بگفتید: «موسی اجازه بده کی مردای ایتا طلاقنامه بینیویسه و خو زنَ ولا کونه.» 5عیسی اوشانَ بگفت: «موسی شیمی سنگدیلی واسی اَ حُکمَ شمرأ بینیویشت. 6ولی جه دُنیا بنا خلق بوستن، ”خُدا اوشان مرد و زن بساخته.“ 7و ”هنه واسی، مَرد خو پئر و مار جا سیوا به، و خو زنَ چسبه 8و اُ دوتا، ایتا تَن خوائید بوستن“ اَنِ واسی، بازین پس دِه دوتا نیئید بَلکی ایتا تَن ایسید. 9پس، اونچی کی خُدا جُفتَ کونه، آدمی نبایسی سیوا بُکونه.»
10وقتی کی عیسی و اون شاگردان خانه درون ایسابید، ایوارده شاگردان اَ جریان واسی عیسی جا سؤال واورسه اید. 11عیسی بگفت: «هر کی خو زنَ طلاقَ ده و ایتا دیگر زن بیگیره، در حقِّ خو زن زینا بُکوده دَره. 12و اَگه ایتا زنای خو مرداک جا سیوا ببه و اینفر دیگر زن ببه، زینا بُکوده دَره.»
عیسی و زاکان
13مردوم، زاکانَ عیسی ورجه اَوردید تا اوشان سر دَس بنه اوشانَ برکت بده. ولی شاگردان مردوم تشر بزئید. 14ولی، عیسی وقتی اَنه بیده، بَرزَخا بوست و خو شاگردانَ بگفت: «وائالید کوج زاکان می ورجه بائید اوشان جُلُویَ نیگیرید، چونکی خُدا پادشائی اَجور کَسان شینه. 15حئیقتن، شمرأ گَم، هرکی خُداپادشاییَ ایتا زاک مانستن قُبیل نُکونه، اونِ بدرون نخوائه شئون.» 16هو موقع زاکان کشه گیفت و اوشانِ سر دَس بنه و اَشانَ برکت بدَه.
مال دار جوان
17وقتی عیسی را دکفت، ایتا مردای بُدو بُدو بامو، عیسی جُلُو زانو بزه و واورسه: «خُرم اوستاد، چی بُکونم تا ابدی زیندگی وارث ببَم؟» 18عیسی جواب بدَه: «چره مَرا خُرم دوخوانی؟ هیکّس خُرم نیه جغیر خُدا. 19حُکمان دانی قتل نُکون، زینا نُکون، دوزی نُکون، دوروغ گُوائی ندن، دغل بازی نُکون، تی پئر و مار احترامَ بدَر.“ 20اُ مردای عیسیَ جواب بدَه: «اوستاد، تمان اَ کارانَ اُ زمات کی ترِ جوان بوم تا اَلَان بجا باوردم.» 21عیسی محبت امرا اونَ فندرست و بگفت: «تو ایچی کم دَری؛ بوشو هرچی دَریَ بُفروش و اون پولَ نادارانَ فَدَن کی آسمان درون گنج خوائی داشتن. بازون بیا و مَرا دُمبال بُکون.» 22اُ مردای جه اَ گب نا امیدَ بوست و غُرصه دار جه اویا بُشو، چونکی خَیلی مال و منال دَشتی.
23عیسی دوروَر فندرست و خو شاگردان بگفت: «خُدا پادشائی بدرون شئون مالداران ره چنقدِ سخته!» 24شاگردان جه اون گبان ماتا بوستید. ولی عیسی ایوار دِه اوشانَ بگفت: «اَی زاکان، خُدا پادشائی بدُرون شئون چنقدِ سخته! 25شتر ردّا بوستن سوزن سولاغ جا سَألتره تا مالدار آدمِ بدرون شئون، خُدا پادشائی درون.» 26شاگردان خَیلی ماتا بوسته بید و عیسیَ بگفتید: «پس کی تانه نیجات پیدا بُکونه؟» 27عیسی اَشان چوم بُدوخت و بگفت: «اَن آدمی ره محاله، ولی خُدا ره اَطو نیه؛ چونکی خُدا ره همه چی ممکنه.»
28پِطرُس بنا به گب زئن بُکود و بگفت: «بیدین، اَمان همه چیَ وِلا کودیم و تی دُمبال باموئیم.» 29عیسی بگفت: «حئیقتن، شمرأ گَم، هیکّس نیه کی خانه یا براران یا خاخوران یا مار یا پئر یا زاکان و یا خو زمینانَ می خاطری و انجیل خاطری وِلا کوده بِبِه، 30و هه دُنیا درون صد برابر ویشتر خانه ئان و براران و خاخوران و ماران و زاکان و زمینان اذیت و آزار مرا بدَس ناوَره، و اُ دُنیا درونم زیندگی ابدی اونِ قسمت نَبه. 31ولی خیلیان کی اوّل دَرید آخر بیدی، و اوشانی کی آخر ایسائید اوّل بیدی!»
عیسی پیشگویی سیوم بار خو مَردن و زنده بوستن ره
32عیسی و اون شاگردان اورشلیم شار راه درون ایسابید و عیسی جُلُوتر جه اوشان شئون دوبو. شاگردان مات بید و کسانی کی اوشانِ دُمبال شئون دیبید، بترسه بید. عیسی ایواردِه اُ دوازده شاگردَ ایتا گوشه ببَرد و اون چیَ کی بایسی اون سر بایه، اوشان ره بگفت. 33عیسی بگفت: «فندرید، اورشلیم سو شئون دریم. انسان پسرَ کاهنان سَران و تورات آموجگاران دَس تسلیم خوائید کودن. اوشان اونَ مَردن ره محکوم کونیدی و غیر یهودیان دَس خوائید واسپاردن 34اَشان اونَ رَخشن گیریدی، اونِ سر فیلّی فکونید و شَلاق زنیدی و اونَ خوائید کوشتن و سَه روج بازین اون، زنده خوائه بوستن.»
یعقوب و یوحنا خواسته
35زِبِدی پسران یعقوب و یوحنا، عیسی ورجه باموئید و بگفتید: «اوستاد، خواهش کونیم اونچی کی تی جا خوائیم، امرا انجام بدی!» 36عیسی اَشان بگفت: «چی خوائیدی شمرأ بُکونم؟» 37اوشان بگفتید: «اجازه بدَن کی تی جلال درون اینفر جه اَمان تی راس دس و اویتا تی چپ دس ور بینیشینه.» 38عیسی اوشان بگفت: «شُمان نانیدی چی خوائیدی! شُمان تانیدی اُ جامِ جا کی من بایسی بُنوشَمَ، بُنوشید؟ و غسل تعمیدیَ کی من گیرم، بیگیرید؟» 39اوشان بگفتید: «بله، تانیمی.» عیسی بگفت: «اُ جام جا کی من نوشم، نوشیدی، و تعمیدیَ کی من گیرم، گیریدی. 40ولی می راست دس و چپ دس وَر نیشتن، می ایختیار نیه تا اونَ اینفر فدم. اَ جایگا اوشان شینه کی اَشان ره حاضیر بُبوسته.»
41وقتی اُ دَه تا شاگرد اَنه بیشتاوستید، یعقوب و یوحنا سر غیظ بُکودید. 42عیسی اَشانَ دوخواد و بگفت: «شُمان دانیدی اوشانی کی دیگر مردومانِ حاکمان دوخواده بیدی اَشانِ سر آقایی کونید و اوشانِ پیله تران اَشانَ دستور دیئیدی. 43ولی شیمی میان اَطو نبه. هر کی خوائه شیمی میان پیله ببه، بایسی شیمی خیدمتکار ببه. 44و هر کی خوائه شیمی میان اول ببه، بایسی همه کَس نوکر ببه. 45چونکی حتی انسان پسرم نامو تا اونَ خیدمت بُکونید، بلکی بامو تا خیدمت بُکونه و خو جان مرا خیلیان رهائی بهایَ فدِه.»
عیسی کورِ بارتیمائوسَ شفا دئه
46هو موقع اوشان اَریحا شار درون باموئید. وقتی عیسی خو شاگردان و اُ خلقِ مرا اَریحایَ تَرک کودن دوبو، ایتا کورِ گدا بارتیمائوس نام، اونِ راه سر نیشته بو. بارتیمائوس،تیمائوسِ پسر، بو. 47بارتیمائوس وقتی بیشتاوست کی عیسیِ ناصریه، داد بزه: «اَی عیسی، داوود پادشا پسر، مَرا رحم بُکون!» 48خیلیان اونَ تشر بزه ئید و بگفتید کی تام بِزنه، ولی اون ویشتر داد زئی: «اَی داوود پادشا پسر، مَرا رحم بُکون!» 49عیسی بئسا و بگفت: «اونَ دوخوانید.» پس اُ کور مرداکَ دوخوادید و اون بگفتید: «تی دیل قرص ببه! ویریز کی عیسی تره دوخوانه.» 50بارتیمائوس، فیلفور خو قبای ایتا کنار تَوَدَه، واز بُکود و عیسی ورجه بامو. 51عیسی اون جا واورسه: «چی خوائی تره بُکونم؟» اُ کور مردای جواب بده: «اوستاد، خوائم می چومان بیدینه.» 52عیسی اونَ بگفت: «بوشو کی تی ایمان تره شفا بده.» اُ مرداک، هو دَم ایوارده وینا بُبوست و عیسی دُمبال رادکفت.
Currently Selected:
مَرقُسِ انجیل 10: GIL
Highlight
Share
Compare
Copy
Want to have your highlights saved across all your devices? Sign up or sign in
@ 2024 Korpu Company
