لوقایِ انجیل 4
4
عیسی امتحان به
1عیسی پُر جه روح القدس، اُردن روخان جا واگردست و روح، ویاوان درون اونَ رائنمایی کودی. 2چِل روج ابلیس اونَ اویا امتحان بُکود. عیسی اُ روجان درون هیچّی نُخورد، وقتی اُ زماتی کی روزه دَشتی تمانَ بو، ویشتا بو. 3ابلیس اون بگفت: «اَگه خُدا پسری، اَ سنگَ بُگو نان ببه.» 4عیسی جواب بدَه: «تورات درون بینیویشته بُبوسته کی ”آدمی خالی نانِ مرا زنده نیه.“
5بازون ابلیس اونَ ببرده ایتا بُجور جیگا و هو دَم تمان دُنیا ممالکَ اونَ نیشان بدَه 6و بگفت: «مَن تمان اَ قدرت و ایختیار و اوشانِ جاه و جلالَ تره خوائم فَدَن، چونکی مَرا واسپارده بُبوسته و تانم اونَ هرکیَ کی بخوائم فَدَم. 7پس اَگه مَرا پرستش بُکونی اَشان همه تی شین خوائه بوستن.» 8عیسی جواب بدَه: «تورات درون بینیویشته بُبوسته،
”تی خُداوندْ خُدایَ بپرست
و فقط اونَ عبادت بُکون.“
9ابلیس اونَ اورشلیم شار و معبد لچّه سر ببرد و بگفت: «اَگه تو خُدا پسری، تره جه اَیا تَوَد بجیر. 10چونکی زبور درون بینیویشته بُبوسته:
”تی واسی خو فیریشته ئانَ دستور خوائه دئن
تا تره بپائید.
11و اوشان تره خوشان دَسان سر دَریدی
نبه کی تی لنگَ سنگیَ بزنی.“
12عیسی اونِ جواب بدَه: «تورات درون بگفته بُبوسته ” تی خُداوندْ خُدایَ امتحان نَوا کودن.“ 13ابلیس، امتحانانَ تمان بو پسی، اونَ تا ایتا دیگر فرصت تَرکا کود.
آغاز عیسی خیدمَت جلیل درون
14عیسی روح القدسِ قُوّت درون جلیل ولایت واگردست و اونِ خبر سراسر اُ سامانسر بپیچست. 15عیسی یهودیان عبادتگائان درون اوشانَ آموختی، و همه اونِ تعریفَ کودید.
عیسیَ ناصره درون قُبیل نُکونید
16پس عیسی ناصره شار کی اون درون پیله بوسته بو بامو و یهودیان مُقدّسِ شنبه روج، بنا به خو عادت یهود عبادتگا درون بُشو. و سرپا بأسا تا خُدا کلامَ بخوانه. 17اِشْعيای پیغمبر طومارَ اونَ فَدَئید. هَطو کی اونَ وازا کود، اُ قسمتَ بیافتِ کی فرمایه:
18«خُداوندِ روح می سر نئَه،
چونکی مرا مسح بُکود تا خُب خبرَ نادارانَ فارسانم.
اون مَرا اوسه کوده تا اسیرانَ آزادیَ اعلام بُکونم،
کور چومانِ وینائیَ جار بزنم
و ستم بکشه ئانَ آزادَ کونم،
19و اعلام بُکونم کی اُ سال فارسه کی خُداوند مردومَ لوطف بُکونه.»
20بازون عیسی طومارَ فیویچانه و عبادتگا خیدمتکارَ واسپارد و بینیشت. همتان عبادتگا درون اونِ چوم بُدوخته بید. 21هو موقع اَطو بنا به گب زئن بُکود: «ایمرو اَ کلامِ بینیویشته، وقتی کی اونَ گوش کودن دیبید عملی بُبوست.» 22همه عیسی تعریفَ کودید و جه فیضی کی اون کلام میان بو حَیرانَ بوستید و گفتید: «مگه اَ رِی یوسف پسر نیه؟» 23عیسی اَشان بگفت: «حَتم دَرم اَ نَقلَ مَرا خوائید اَوردن کی ”اَی طبیب خودتَ شفا بدَن! اون چیَ کی کَفَرناحوم شار درون بُکودی و اَمان بیشتاوستیم، اَیا تی شار درونم انجام بدَن.“» 24بازون دُمباله بدَه: «حئیقتَن شمرأ گَم کی هی پیغمبری خو شار درون قُبیل نیبه. 25حَتم بدانید کی ایلیا زمات درون، وقتی کی آسمان سَه سال و نیم دوَسته بُبوست و سراسر اُ ولایتِ پیله قحطی بامو، خَیلی وِیوه زناکان اسرائیل درون ایسابید. 26ولی ایلیا هیکَس ورجه اوسِه نُبوست جغیر ایتا وِیوه زنائی، صَرِفَه شار کی صِیدون ولایت درون بو. 27اِلیشَع پیغمبر زمات، اسرائیل درونم خیلیان خوره دَشتید، ولی هیکّس خوره جا پاکَ نُبوست جغیر نَعَمانِ سُریانی.» 28بازون همۀ اوشانی کی عبادتگا درون ایسا بید، اَ گبان ایشتاوَستن جا اوشان غیظَ گیفته 29و ویریشتید، اونَ شار جا بیرون فاکشه ئید و کو لچّه سر کی شار اونِ رو بنا بُبوسته بو ببردید تا جه اویا اونَ بجیر تَوَدید. 30ولی عیسی اوشانِ میانِ ردّا بوست و بُشو.
دیو بزِه مرداک شفا
31بازون عیسی کَفَرناحوم کی ایتا شار جه جلیل میان بو، بُشو و شنبه روج درون مردوم آموختن ره دَس بکارَ بوست. 32اوشان اونِ آموختن جا ماتا بوستید، چونکی اون گبان درون قدرت نئَه بو. 33عبادتگا درون، ایتا دیو بزِه مرداک ایسابو کی پلید روح دَشتی. اُ مردای پیله اوخان مرا داد بزه: 34«اَی عیسیِ ناصری، تو اَمی اَمرا چی کار دَری؟ باموئی امرا سر به نیستَ کونی؟ دانم کیسی؛ تو هو قدّوسِ خُدائی!» 35ولی عیسی پلید روحَ تشر بزه و بگفت: «تام بزن و اُ مرداک جا بیرون بیا!» هوموقع دیو اُ مرداکَ همه کَس چومانِ جُلُو بگِل بزه و بی اونکی هی صدمه ئی اون بزنه اونِ جا بیرون بامو. 36مردوم همه حَیرانَ بوستید و کَس به کَس گفتید: «اَن چوطو گُفتاریه؟ چونکی اون قدرت مرا پلید ارواحَ دستور دئه و اوشان بیرون اَئیدی!» 37جه اَ رو اون کارانِ خبر سراسر، اُ سامانسر بپیچست.
پطرُسَ زن مارشفا و خیلیانِ دیگر
38عیسی عبادتگایَ تَرکا کود و شَعمونِ خانه بُشو. شَمعونِ زن مار خَیلی تب دَشتی و ناخوش بو. پس، عیسی جا بخواستید اونِ شفا بده. 39عیسی اون سر جور فچمسته و تبَ تشر بزِه، و اون تب قَطا بوست. اون درجا ویرشت و اوشان جا پذیرائی بُکود.
40غروب دَم، مردوم تمان خوشان کسانی کی جورواجور ناخوشی دَشتید عیسی ورجه باوردید. عیسی ئم تمان اوشان سر دس بنه و همه تای شفا بدَه. 41دیوان ئم خیلیان جا بیرون اَموئید و داد زئید و گفتید: «تو خُدا پسری!» ولی عیسی اوشانَ تشر زئی و وَناشتی گبی بزنید، چونکی دانستید کی مسیح موعوده.
عیسی پند دئن عبادتگا درون
42صوب دمان، عیسی ایتا دور دکفته جیگا بُشو. ولی مردوم اونَ فامُجستید و چون اُ جایی کی ایسابو فارسه ئید، تقلّا بُکودید وانالید اوشانَ تَرکا کونه. 43ولی عیسی اوشانِ بگفت: «مَن بایسی خُدا پادشائی، اَ خُب خبرَ دیگر شارانَ ره ئَم فارسانم، چره کی اَنِ ره اوسِه بُبوستم.» 44پس اون موعظه کودن یهودیه عبادتگائان درون دُمباله بدَه.
Currently Selected:
لوقایِ انجیل 4: GIL
Highlight
Share
Compare
Copy
Want to have your highlights saved across all your devices? Sign up or sign in
@ 2024 Korpu Company
