رسولانِ اعمال 14
14
پولُس و بَرنابا قونیه درون
1پولُس و برنابا قونیه شار درون یهود عبادتگا میان بُشوئید و جوری گب بزه ئید کی خَیلی جه یهودیان و یونانیان ایمان باوردید. 2ولی اُ یهودیانی کی ایمان ناورده بید، غیر یهودیانَ تیرا کودید و اوشانِ فیکرَ برارانِ ضِد مسموم بُکودید. 3پس پولُس و بَرنابا خَیلی زمات اویا بأسائید و جرأت اَمرا خُداوند باره گب زِئید، خُداوندی کی اَشانَ قدرت فَدئی تا نیشانه ئان و مُعجزه ئانَ انجام بدید و اَطویی خو پیغام فیض بخشَ تصدِق کودی. 4ولی اُ شار مردوم دو دسته بُبوستید؛ ای دسته یهودیان طرف بید و اویتا دسته رسولان طرفَ گیفتید. 5وقتی غیر یهودیان و یهودیان خوشان پیله تران اَمرا بخواستید، پولُس و برنابا یَ اذیَت بُکونید و اوشانَ سنگسار بُکونید، 6پولُس و بَرنابا اَ جریان جا واخبر بُبوستید و لِستره و دِربِه سمت، کی جه لیکائونیه شاران بو، و اُ سامانسر فرار بُکودید. 7اوشان اویا خُب خبر دَئنَ دُمباله بدَه ئید.
پولُس و بَرنابا لِستره درون
8لِستره درون ایتا مردای نیشته بو کی نتانستی خو پایَ تکان بده و هرگس راه نُشو بو، چونکی مادرزادی ایفلیج بو. 9وقتی کی پولُس گب زِئی، اُ مردای گوش دَئی. پولُس اونَ چوم بُدوخت و بیدِه کی اَ ایمانَ دَره کی شفا بیگیره. 10پولُس بُلند صدا مرا اونَ بگفت: «تی پا سر بأس!» اُ مردای جه خو جا بپرست و رادکفت.
11هَطوکی مردوم اونچی کی پولُس بُکوده بویَ بیدِه ئید، لیکائونی زَوان اَمرا داد بزئید: «خُدایان، آدم مانستن اَمی میان بجیر باموئید!» 12اوشان بَرنابایَ ’زِئوس‘ و پولُسَ اَنه واسی کی اصلی سُخنران بو، ’هِرمِس‘ نام بنه ئید. 13زئوسِ کاهن، کی اونِ معبد شار دروازه بیرون نئه بو، چن تا گاو و چن تا تاج گُل، شار دروازه وَر باورد؛ زئوس و اُ خلق خواستید کی پولُس و برنابا ره قربانی پیشکش بُکونید.
14ولی وقتی اُ دوتا رسول، یعنی بَرنابا و پولُس، اَ کُفرَ بیشتاوستید، خوشان رختانَ چاک بدَه ئید و تأدی مرا خلق میان بُشوئید و داد بزئید کی: 15«اَی مرداکان، چره اَطو کونیدی؟ اَمانم شیمی مانستن آدمیم. اَمان خُب خبرَ شمرأ دیئیم کی جه اَ بیخود کاران دَس اُسانید و خُدای زنده یَ ایمان باورید کی آسمان و زمین و دریا و هر اونچیَ کی اوشان دُرونه، خلق بُکود. 16خُدا، جه قدیم نَسلان غیریهودیان ملّتَ، همتانَ ولا کود کی هرتا خوشان رائانَ بیشید، 17با اَ حال اون، خورَه بدونِ گُواه نَنه؛ چونکی اون آسمان جا وارش اوسه کوده و پُربارِ فصلانِ بخشئن اَمرا شمرأ خُبی بُکوده و خَیلی غذا شمرأ فَدِه و شیمی دیلانَ خوشی جا پُرَ کونه.» 18حتی اَ گبانِ مَرائَم، اوشان بسختی بتانستید مردوم جُلُویَ بیگیرید، کی اوشانِ ره قربانی نُکونید.
19ولی یهودیان، اَنطاکیه و قونیه جا باموئید و مردومَ خوشان مرا همدس بُکودید، پولُسَ سنگسار بُکودید و اَ خیال مرا کی بمَرده، اونَ شار جا بیرون فاکشه ئید. 20ولی وقتی شاگردان پولُس دور جمَ بوستید، پولُس ویریشت و شارَ سو واگردَست. فردائی، پولُس و بَرنابا دِربِه شار سمت بُشوئید.
21بازون اوشان اُ شار درونم خُب خبرَ اعلام بُکودید و خَیلیانَ عیسی شاگردان چاکودید. بازین لِستره و قونیه و اَنطاکیه سو واگردستید. 22اُ شاران درون شاگردانِ جانَ قوت دیئیدی، اوشانَ تشویق کودیدی کی خوشان ایمان درون بمانید و نَصیحت بُکودید کی: «خُدا پادشائی بدُرون شئون واسی بایسی خَیلی سختیانَ تاب باوریم.» 23اَشان هر کلیسا درون ریش سیفیدانَ، ایمانداران سر جور بَنه ئید و اوشانَ دُعا و روزه مرا اُ خُداوندیَ کی اونَ ایمان باورده بید، واسپاردید.
24بازین جه پیسیدیه منطقه دَوارستید و پامفیلیه منطقه بُشوئید، 25بعد اونکی اوشان پِرجه شار درون خُدا کلامَ موعظه بُکودید، جه اویا آتّالیه بندر سمت باموئید.
26آتّالیه جا کشتی مرا اَنطاکیه شار سمت واگردستید، هویا کی ایماندارن پولُس و بَرنابایَ به خُدا فیض واسپارده بید تا اُ کاریَ بُکونید کی اونَ انجام بِدَه بید. 27وقتی پولُس و بَرنابا اویا فارسه ئید، کلیسا آدمانَ جمَ کودید و واگویا بُکودید کی خُدا بواسطه اوشان چی کارانی بُکوده و چُطو ایمانِ دَرَ غیر یهودیانِ ره وازا کوده. 28اوشان خَیلی زمات شاگردان مرا اویا بأسائید.
Currently Selected:
رسولانِ اعمال 14: GIL
Highlight
Copy
Compare
Share
Want to have your highlights saved across all your devices? Sign up or sign in
@ 2024 Korpu Company
