رسولانِ اعمال 11
11
پِطرُس کلیسا یَ گزارش فَده
1رسولان و براران سراسر یهودیه ولایت درون بیشتاوستید کی غیر یهودیانَم خُدا کلامَ قُبیل بُکوده ئید. 2پس وقتی پِطرُس اورشلیمِ شار بُشو، اوشانی کی ختنه رسمَ قُبیل دَشتید، پطرُسِ جا ایراد بیگیفتید و بگفتید: 3«تو، اوشانی کی ختنه نُبوستیدِ خانه درون بُشوئی و اوشان اَمرا غذا بُخوردی.»
4پِطرُس تمان جریانَ از سر اَشان ره واشکافانه و بگفت: 5«من یافا شار درون دُعا کودن دُبوم کی رویا درون بیدِم ایچی ایتا پیله سفره مانستن، کی جه چار گوشه آویزان بو، آسمان جا بیجیر بامو و مرا فارسه. 6وقتی خُب فندرستم، حیوانات و واشی جانوران و خزنده ئان و پرنده ئانَ اُ سفره رو بیدِم. 7بازون ایتا اوخان می گوش فارسه کی گفتی: ”پِطرُس، ویریز، سِرابین و بُخور.“
8«ولی من جواب بدَم: ”هرگس نیبه خُداوندا، چونکی من هی وقت نجست و حرام چیانَ لب نِزم.“
9دومین وار آسمان جا اوخانی فارسه کی”اونچی کی خُدا پاک بُکوده، تو نجست بحساب ناور.“ 10و اَ اتفاق سه وار تکرار بُبوست، بازین تمان اُ چیان آسمان سمت، بُجور ببرده بُبوست.
11«هو موقع، سه نفر کی قیصریه شار جا می ور اوسه بُبوسته بید، اُ خانه درون کی اویا ایسأ بوم فارسه ئید. 12خُدا روح مَره بگفته اوشان اَمرا بَشم و هی فرقی نَنَم. اَ شیش تا برارم می اَمرا باموئید، و اَمان اُ مرداک خانه بدرون بُشوئیم. 13اون اَمرا تعریف بُکود کی چُطو ایتا فیریشته خو خانه درون بیده و اونَ بگفته: ”چن نفرَ یافا شار سو روانه کون کی شمعون شناس به پطرُسَ اَیا باوَرید. 14اون تَره ایتا پیغام خوائه اَوردن کی بواسطه ی اون، تو و تمان تی خانه آدمان نیجات گیریدی.“
15«وقتی بنا به گب زئن بُکودم، روح القّدس اوشان سر قرار بیگیفت، دُرُست هُطوکی اول اَمی سر قرار بیگیفته بو. 16هو موقع من خُداوند گبَ بیاد باوردم کی بگفته بو: ”یحیی آب اَمرا غُسل تعمید دئی ولی شُمان روح القدّس اَمرا تعمید خوائید گیفتن.“ 17پس اَگه خُدا هو عطایَ کی اَمان، بعد اَنکی عیسی مسیح خُداوندَ ایمان باوردیم اَمرا فدَه بو، اَشانَم فَده من کی بوم کی بتانِستِه بیم خُدا کار جُلُویَ بیگیرم؟»
18هَطوکی اوشان اَ گبانَ بیشتاوستید، تام بزه ئید و خُدایَ جلال بدَئید و بگفتید: «پس خُدا غیر یهودیانم اَ فرصتَ ببخشه کی خوشانِ گُنائان جا توبه بُکونید و ابدی زیندگیَ بدَس باورید!»
اَنطاکیه کلیسا
19اُ ایماندارانی کی بعد استیفانِ اذیت و آزار دِئِن، پخشَ بوسته بید، تا فینیقیه و قبرس و اَنطاکیه سمت سفر بُکودید. اوشان فقط خُدا کلامَ یهویان ره اعلام کودید و وَس. 20ولی اوشانِ میان چن نفر قبرس و قیروان شین بید. وقتی اوشان اَنطاکیه فارسه ئید، یونانیان اَمرائَم گب بزه ئید و عیسیِ خُداوند خُب خبرَ اوشانَ فدَه ئید. 21خُداوند دسَم اَشان اَمرا بو، و خَیلیان ایمان باوردید و خُداوندِ سمت واگردستید.
22اَ خبر اورشلیم کلیسایَ فارسه و بَرنابایَ اَنطاکیه اوسه کودید. 23وقتی کی بَرنابا اویا فارسه و خُدا فیضَ بیده، ذوق بُکود و همتانَ تشویق بُکود تا تمان خوشانِ دیل مرا خُداوندَ وفادار بیبید، 24چونکی بَرنابا ایتا خُرم آدم بو، و روح القدّس و ایمانِ جا پُر بو. جه اَ رو پیله جماعتی خُداوندَ ایمان باوردید.
25پس، بَرنابا تارسوس شار بُشو تا شائولَ بیابه. 26و وقتی شائولَ بیافت، اونَ اَنطاکیه باورد. اوشان اویا یک سال تمام کلیسا آدمانِ اَمرا جمَ بوستیدی و ایتا پیله جماعتَ تعلیم دیئیدی. اَنطاکیه درون بو کی اولین وار عیسی شاگردانَ ’مسیحی‘ دوخوادید. 27اُ روجان درون چن تا پیغمبر اورشلیم جا اَنطاکیه باموئید. 28ایتا جه اوشان کی آگابوس نام دَشتی، ویریشت و خُدا روح اَمرا پیشگویی بُکود کی سراسر دُنیا میان بدجور قحطی خوائه اَمون. اَ قحطی کلودیوس حکومت زمات درون ایتفاق دکفت. 29پس شاگردان تصمیم بیگیفتید کی هرتا خوشان توان اَندر، یهودیه براران ره کمک اوسه کونید. 30پس، اَطو بُکودید و خوشان کُمکانَ بَرنابا و شائول دَس فدَه ئید تا ریش سیفیدانَ فارسانید.
Currently Selected:
رسولانِ اعمال 11: GIL
Highlight
Copy
Compare
Share
Want to have your highlights saved across all your devices? Sign up or sign in
@ 2024 Korpu Company
