اوّلتا نامه تَسالونیکیان ره 5
5
خُداوند روج
1هسّا اَی براران، وقت ئان و زمانان باره نیازی نیئه ایچی شمرأ بنویسم. 2چونکی شُمان خودتان خُب دانیدی کی خُداوند عیسی واگردستنِ روج، هُطو دزد مانستن کی شبِ درون آیه، فارسه. 3هو موقع کی مردوم گیدی: «صلح و سلامتی و اَمن و امانِ»، بازین ناخورَکی هلاکت اَشانِ دامنَ گیره، هُطوکی ایتا شکمدار زنای دردِ زایمان بیگیره، و اوشان نتانید جیویزید.
4ولی اَی براران، شُمان تاریکی درون نئسائید، تا اُ روج دوزد مانستن شمرأ غافلگیر بُکونه. 5چونکی شُمان همتان، نور زاکان و روج زاکانید. امان شب و تاریکی شین نیئیم. 6پس الباقی مانستن، امرا بخواب نزَنیم، بلکی بیدار و هوشیار بیبیم. 7چون اوشانی کی خوسیدی، شبِ موقع خوسیدی، و اوشانی کی مَست کونیدی، شبِ موقع مَست کونیدی. 8ولی جه اویا کی امان روج شینیم، بایستی هوشیار بیبیم، ایمان و محبت زره یَ دوکونیم و نجاتِ اُمیدَ ایتا کلاهخود مانستن اَمی سر بَنیم. 9چونکی خُدا امرا غضب ره تعیین نکوده، بلکی نجاتِ بدَس آوردنِ واسی بواسطه ی اَمی خُداوند عیسی مسیح، تعیین بُکوده، 10اونکی اَمی واسی بَمرد تا چی بیدار بیبیم چی خواب، اونِ امرا زیندگی بُکونیم. 11پس همدیگرَ تشویق بُکونید و ایمانِ درون تقویت بُکونید، اوجورکی هه الانَم کودَن درید.
آخرتا سفارشان و دُعای خیر
12هسّا اَی براران، شیمی جا خوائیم، اوشانیَ کی شیمی میان زحمت کیشیدی و خُداوندِ درون شیمی رهبر ایسید، و شمرأ نصیحت کونیدی احترام بَنید، 13و محبت درون اُ کار واسی کی کونیدی، اوشانَ خَیلی احترام بَنید. همدیگر امرا صلح و سلامتی درون زیندگی بُکونید.
14اَی براران، شیمی جا خواهش کونیم کی تنبلانَ نصیحت بُکونید؛ ترسوئانَ تشویق بُکونید؛ ضعیفانَ کمک بُکونید؛ همتان امرا صبور بیبید. 15واخُب بیبید هیکَس بدیَ بَدی امرا جواب نَدِه، بلکی همیشک اَنه دُمبال بیبید کی همدیگرَ و تمانِ مردومَ خُبی بُکونید.
16همیشک شاد بیبید، 17دائم دُعا بُکونید، 18هر وضعِ درون شکر بُکونید؛ چونکی خُدا خواسته مسیح عیسی درون شمرأ اَنه.
19خُدا روحِ آتشَ دُنکوشانید؛ 20نبوّتانَ کوچک نَدَنید، 21بلکی همه چیَ امتحان بُکونید؛ و اونچیَ کی خُبِ، قائم بچسبید. 22هر جور بَدی جا دوری بُکونید.
23هسّا، صلح و سلامتی خُدا، خودش شمرأ تمام و کمال، تقدیس بُکونه، و شیمی روح و جان و تن تا اَمی خُداوند عیسی مسیح آمون، بی عیب بمانه. 24اونکی شمرأ دوخوانه، وفادار ایسه؛ اون حتمی اَ کارَ کونه.
25اَی براران، اَمی واسی دُعا بُکونید. 26تمانِ برارانَ ایتا مقدّس ماچی امرا سلام فاراسانید. 27خُداوند جُلو، شمرأ قسم دَئَم کی اَ نامه یَ تمان براران ره بخوانید.
28اَمی خُداوند عیسی مسیحِ فیض شیمی امرا بِبه.
Currently Selected:
اوّلتا نامه تَسالونیکیان ره 5: GIL
Highlight
Copy
Compare
Share
Want to have your highlights saved across all your devices? Sign up or sign in
@ 2024 Korpu Company
