انجیلِ مرقس 1

یحیی تعمید دهنده، مسیح راه حاضر کرار

1شاده خَوَری که درباره عیسی مسیح، خدا زا، اِسه، هِمنَه شروع بی.

2اِشَعیای پیغمبره کتابَ دَ نویشتشونه:

«از چِمن قاصدِ اِشته پیش خرسِم،

که اِشته راه، حاضر بِکَره»

3«ای نفر بیابونَ دَ جیکیلَییَم بوا:

خداونده راه، آماده آکراه!

چو راهون دوز آکرا.»

4پس، یحیای تعمیددهندَه بیابون دَ ظهورِش بکه، و اعلامش بِکَه که مردم اِشتن گناهان بخشِسَنه را توبَه بکرنده و غسل تعمید بگیرنده. 5یهودیه منطقه همه‌ی مردم و اورشلیمه شهره همه‌ی مردم، شَینده یحیی وَر و اِشتن گناهِشون اعتراف کَردَی، و اُردن رووار دَ یحیی دَسییَم غسل تعمیدشون ایگَتَی. 6یحیی خلاوِ، شترِ پشمَ دَ به و چرمیه قِیشی اِشتن کمرش دِبستَی، و چو غذا مَلو و کوهیه عَسَل بِه. 7یحیی اعلامش بِکَه و بوات: «چِمن پَش، کسی آ که چَمِنَ قویتره از حتی لیاقت نِدارِم دِلا آبیبم و چو پای جارِ بنده آکرم. 8از شَماهون آوییَم تعمید دیم، امّا اَو شَماهون خدا مقدس روح ییَم تعمید دی.»

عیسی تعمید

9اَ روزون، عیسی ناصره شهرَ دَ که جلیله منطقه دَ به بومه و اُردن رِووارَ دَ یحیی دسییَم غسلِ تعمیدِش بِگت. 10وختی عیسی آوَ دَ اَبَر بومه، اَ لحظَه بوینتشه که آسمون آشکاجِسشه و خدا روح، کوتَری شارین اشنیوَ بومه و عیسی سَرَ قرارِش بگَت. 11و آسمونَ دَ صصی بومه که «تَه چِمن عزیزه زایش، از اِشتَ دَ پِر راضیم.»

عیسی آزمایشونَ دَ

12خدا روح البحل عیساش ببه بیابون 13عیسی چهل روز بیابونَ دَ بِه و شیطان اَوِش امتحان کَردَی. عیسی وحشیه حیوونونییَم وندَرد و فرشتَه عه چو را خدمتشون کَردَی.

عیسی اشتن خِدمَته شروع کره

14بعد یحیی دستگیر بییَن عیسی بِشه جلیله منطَقه و خدا شادَ خَوَرِش اعلام بکه 15و بوات: «چو وقت آرَسِسه و خدا پاتشایی نزدیک آبه. توبَه بکرا و اَم شادَ خَوَره ایمان بایرا.»

عیسی اولین شاگرده

16وختی عیسی جلیله دریاچه ورَ آوردَی شَمعون و شَمعون برا، آندریاسش بوینت که آوَ دَ تورشون فِر دایَی چون که اَوُن ماهیگیر بِنده. 17عیسی اَجون بِوات: «چِمِن پَش بایا و از شَما وام که چه طَرَه مردمه خدا را صید بکرا.» 18اَوُن اَلَبحل اِشتن تورشون ول بِکه و عیسی پَش بشنده. 19وختی عیسی ایکه پیش تر بِشه، یعقوب و چو برا یوحناش بوینت که زبدی زا بِنده. اَوُن قایقَ دَ اِشتن تورشون حاضر کردَی. 20عیسی اَلَبحل اَجونش وُنگ بِکه. اَوُن اِشتن پِه زِبِدی شون کارگرونونییم قایقَ دَ باشتشونه و عیسی پَش بشِنده.

ای مردی که پلیده روح دردشه

21اَون بشنده شهر کَفَرناحوم. وختی مقدسه شنبه روز آرَسس، عیسی البَحَل بِشه یهودیون عبادتگاه و تعلیمش آدا. 22مردم چو تعلیم داینه را پِر تعجبشون کرده به، چون اجونش کسونی شارین تعلیم دایَی که قدرت و اقتداره صاحاب به، نه توراته معلمین شارین. 23اَ موقع چون عبادتگاهَ دَ مردکی بِه که پلیده روحیش دَ. اَو جیکیلَییَم بوات: 24«ای عیسای ناصری، ته اَجَما چِه کار داری؟ اومیش اَجَما نابود بکری؟ زونِم تَه کییش، تَه هَه قدوسی اِسیش که خدا طرفَ اومَیش!» 25ولی عیسی اَ پلیدِ روح را غَیضِش بِکَه و بِوات: «صَص مکه و بوره بَرَسَر!» 26اَ موقع اَ پلید روح، اَ مردکش شدتییَم تکونِش بدا و بِلنده صصییَم جیکیلِش بِکَه و اَ مردکَ دَ اَبَر بومه 27مردمِ همَّه هِمنَه تعجبشون کرده به که همدیگر دَ آپَرسِسِشونَی: «ام دِ چیه؟ ای تازه تعلیم قدرت و اقتدار! اَو حتی پلید روحون فرمان آدی و اَوُن چو کودَ اطاعت کرنده.» 28پس طول نِکَشِس که عیسی شور و شویرَت تمام جلیله منطقه دَ آپیچس.

عیسی خیلیون شفا دی

29وختی عیسی عبادتگاش ترک بکه، البحل یعقوب و یوحنا خَمنا بشِه شمعون و آندریاسه کییَه. 30شمعونه زن ما تبِش دَ و مریض یقاعَه دَ خواو بِه. اَوُن البحل عیساشون چو حالَ دَ باخَوَر بکه. 31عیسی بِشه چو وَر و چو دسش بگَت، اَوِش اوپاب بِکه. اَ زَنَکِ تَب قطع آبه و چونَ دَ پذیراییش بِکَه.

32غروو دم، آوتابه نشتنه پَش، همَّه‌ی مریضون و دیوزدَه عونشون بایردِندِ عیسی ور. 33همه‌ی شهره مردم، اَ کییه بَره پیش جمع آبیه بِنده! 34عیسی خیلیون که جور وا جوره مریضیونشون دَ، شفاش آدا و پِر دیوُنَ نی آدمونَ دَ اَبَرِش بِکه و ناشتِشه دیوه لاوه بکرنده، چون اَوُن عیسی شون آزونِسَی.

عیسی تعلیم در جلیلِ منطَقَه

35صبح تولو که هلا هوا تاریک به، عیسی اوپاب ببه و کیَیه دَ اَبَر بشه، خلوته یقایی بشه و بِر دِعاش بِکَه. 36شَمعون و چو همراهه عیسی پَش گَردِسَینده. 37وختی عیسی شون بِوینت بواتشون: «همَّه اِشته پَش گردِنده!» 38عیسی اَجون بِوات: «بایا بشوم ام دویر و بره شهرون تا بِرَ نی تعلیم بدیم، چون چمه خونَین اومَیم.» 39پس عیسی راه دکَت و بِشه جلیله منطقه ام سَر تا اَ سَر. عیسی چون عبادتگاهونَ دَ تعلیمش آدایَی و دیونش آدمونَ دَ اَبَر کردَی.

عیسی، ای جذامیه مردی شفا دی

40ای جذامیه مردکی بومه عیسی وَر، زانوش بزه و مندتیم بِوات: «اگم ته بگَوی، تونی اَمِن شفا بدیی.» 41عیسی دل اَ مردکه را بسوجِس و اِشتن دسش پیش بایرد و اَوِش دس بزه و بِوات: «گَوِم، شفا بیگی» 42اَلبحل، جذام اَ مردکه دَ اَبَر بِشه و شفاش بگت. 43عیسی اَلَبحل اَ مردکش رایی بِکَه و اَجوش قدغن بِکَه 44بِوات: «ویراجون بِبِه کسی را چیزی موای ولی بِشه و اِشتن معبدِ کاهنه نشون آدِ و اِشتن پاکی خونین اَ چی که موسی پیغمبره دستورش آدایه قربانی بِکه، تا چون را ثابت بیبی که شفار گَتِه.» 45امّا اَ مردک بِشِه آشکاری درباره اَم اتفاق لاوِش بِکَه و چُو خَوَرِش پخش آکه. چمه خونین عیسی دِ نتوِسِشه آشکاری بیشی شهر، بلکم شهره خلوت یقاهونَ دَ وندَرد و مردم همَّه ی یقاعونَ دَ اومَینده عیسی ور.

Currently Selected:

انجیلِ مرقس 1: KTT

Highlight

Copy