رسولون اَعمال 26
26
1آگْریپاس پاتشاه پولُسش بوات: «اجازه داری اِشتنَ دَ دفاع بکری.»
اُخُری پولُس اِشتن دستش دراز آکه و اِشتن دفاع کردن را همنه بوات: 2«ای آگْریپاس پاتشاه، اِشتن پر خوش بخت زونم که هارو اشته پیش وندرم، تا همه‌ی یهودیان شکایتون پیش اِشتنَ دَ دفاع بکرم. 3اللخصوص که زونم تَه هودیون آداب و رسومه و اختلافاتی که دارِنده کاملاً آشنایش. هننه، خواهش کرم صبرییم چمن لاوعون گوش آده.
4«یهودیه همَه چمن زیندیگی جوانی اولَ دَ زوننده، هَه اَولَ که چمن قوم میون و اورشلیمَ دَ زیندیگیم کردَی. 5اَوُن قَدیمَ دَ زوننده و اگم بِگَوِنده، تونِنده شهادت بدینده که از ای فَریسی اِمُ، چما دین سختگیرترین فرقه دَ پیرویم کرده. 6و هارو اَ امیدی خونین که خدا چَما اَجدادِش وعدِه داعه، محاکمه بیم. 7اَم هه وعده‌ای اِسه که چَما دونزده قبیله، امیدشون دَ که اَجو به دست بایرنده. چمه خونین صدق دلییم شبانَه روز پرستش شون کردَی تا اَجو آرَسِسِنده. ای پاتشاه، هم امید خونینِ که یهودیه اَمِن متهم کرنده. 8چرا شَما را که بییا وِندَردییا، عجیب غریبه که خدا مردعون زنده کره؟
9«ازی اعتقادِم دَ که گون عیسای ناصری ضد هر کاری چِمِن دسَ دَ ابر اومییَی انجام بدیم. 10و اَم دِرِست هَه کاری بِه که اورشلیمَ دَ کردِمَی. سران کاهنانَ دَ، اختیار ایگَتَنییم، پِر مقدسونی زندان دراینتِمَی، و وختی به مردن محکوم بَینده، چون ضد رایم دایَی. 11چند را چون مجازات کردنه را، عبادتگاهیه دَ شَیم علایده عبادتگاه و تقلام کردَی اَجون وادار بکرم کفر بوانده. هَنده چون کودَ بدِم اومَی که حتی تا اَجنبیون شهرونَ نی چون پَش شی اَیم.
12«ای سفر اَم سفرونَ دَ، حق و اختیار کاملییم که سران کاهنانَ دَ ایگَتِم به، شی اَیم دمشق. 13ای پاتشاه، ظهر نزدیکییه راه دَ ای دفعه نوری که آوتاوعه نورَ دَ درخشان تر به آسمانَ دَ چمن و چمن همراهان دویر دِکَت. 14همَّه زمین سر ایکَتَیوم، و از صصیم بشنوس که عبرانیان لفظییم اَمِن واتِشَی: ”شائول، شائول، چرا اَمِن اذیت آزار کری؟ اَم کارییَم فقط اِشتن لطمه زَنی!“
15«آپرسسمه: ”خداوندا، ته کییش؟“
«خداونده بوات : ”از هَه عیسی اِسیم که ته اَجو اذیت و آزار کری. 16اوپاب ببه و اِشته پا سر وِنده. از اِشرا ظاهر بِبَیم تا اته چمن خادم و چِمن شاهد بکرم تا بَر اَ چی که اَمِنِر وینته و بَر اَ چی که چو د اِشرا ظاهر بیم، شهادت بیدی. 17از اَته اِشته قوم دسَ و غیر یهودیان دسَ که اَتَه خرسِم چون ور، نجات دیم 18تا چون چشمِ آکری، جوری که تاریکی دَ آگردنده نور طرف، و شیطان قدرتَ آگردنده خدا طرف، تا چون گناهان بخشسه بیبینده، و اَ ایمانی خونین که اَمِن دارِنده، کسونی میون که مقدس بییِنده یقا بِدارِنده.“
19«پس، ای آگْریپاس پاتشاه، آسمانیه رؤیا دَ سرپیچیم نکرده. 20بلکم اول دمشقیان میونَ، اُخُری اورشلیمَ و تموم یهودیه سرزمین، و همَ نی غیریهودیان میون اَم پیامم اعلام بکه که گون توبه بکرنده و آگردنده خدا طرف و اِشتن رفتارییم نشون بدینده که واقعا توبشون کرده. 21چمه خونین به که یهودیان اَمِنشون معبدَ دَ دستگیر بکه و گَوِسَینده اَمِن بکوشنده. 22امّا تا هارویین روز، خدا اَمِن کمک کرده و هننه بییا وندردَیم و همُّنِ را، ولِگَ دَ گته تا پیله نفرِ را، شهادت دیم. اَچی ای که وام چی ای نییه جز اَ چیونی که پیغَمبران و موسی واتشونه گون اتفاق دگنه: 23اَم که مسیح گون رنج بوینه و اولین کسی بیبی که گون مردنه پش زنده بیبی، تا هَم قومه را و هَم علایده قومون را نور اعلام بِکَره.»
24وختی پولُس اَم لاوَعونییم اِشتنَ دَ دفاش کَردَی، فِستوسه جیکیلش بکه: «پولُس، اِشته عقلر از دس داعه! پر زونِسَن، اَتِش دلو کرده.»
25پولُس جواو بدا: «دلو نیم، فِستوس خان، بلکم اَ چی که وام عین حقیقت اِسه. 26پاتشاه اِشتن اَم چیونَ دَ خَوَر داره و ازَ نی جراتییم چو اَم لاوه کرِم، چون مطمئنِم اَمه هیچ کومین چو چشمونَ دَ مخفی نینده، چون هیچی نییه که خلوتی اتفاق دِکَته بیبی. 27ای پاتشاه آگْریپاس، پیغَمبران اعتقاد داری؟ زونِم که داری.»
28آگْریپاس پولُسِش بوات: «هم زودی گوی اَمِن قانَع بکری مسیحی بیبیم؟»
29پولُس چو جواوَ بوات: «خدا کودَ گَوِم که دیر یا زو، نه تنها شَما، بلکم همه‌ی کسانی که هارو چمن لاوعون گوش دینده، چمن شارین بیبینده، البته نه قول و زنجیرییم!»
30اُخُری پاتشاه اوپاب ببه و چو خمنا والی و بِرنیکی و علایده مجلسییَه نی اوپاب ببنده، 31و لاوه کردنییم اَبَر بِشنده، هندیگرییَم واتشونَی: «اَم مردک کاری نِکرده که بمره یا زندانی بیبی.»
32آگْریپاس فِستوسِش بوات: «اگم اَم مردک نِگَوِسِش بَی که اَم مسئَلَه امپراطوری محکمه دلَ رسیدگی بیبی، بی اَی هننه اَجو آزاد کردن.»
@ 2024 Korpu Company