مَتّی 23

وای حالینزا!

1او زامان عیسا جماعته و شاگردلَرینه دئدی: 2«تورات معلّم‌لَری و فَریسی فِرقه‌سی‌نینگ عالِم‌لَری، موسای پیغمبر یئرینه اوتورموشلار. 3پس هَرنه‌یه کی سیزه دئییرلَر، عَمل ائدینز و یئرینه ائتیردینز، آما نه او ایشی کی اوللار ائدیرلَر، چونکی اوللارینگ اؤزو خَلخه اؤرگدیگیه، عَمل ائدمئیرلَر. 4اوللار آغیر-آغیر یوک‌لَر باغلاییرلار و خَلخ چینینه ایکله‌ییرلَر. او یوک‌لَر کی آغیرلیقی آداملارینگ بئلینی اَگیر. آما اؤزلَری اوللاری تَرپدمَک ایچی سَمئیرلَر بیر بورماق دا وورالّار. 5ائدیگی ایشلَری‌نینگ واریسی بونونگ ایچی دیر کی خَلخینگ گؤزونه گلَلَّر. اوللار مُقدّس یازیلی‌لاری بویوک-بویوک چیغین‌لاییرلَر و قول‌لاریندان و آل‌لاریندان باغلاییرلار و قابا‌لاری‌نینگ گومپول‌لارینی اوزون-اوزون ائدیرلَر. 6قوناقلوق‌لاردا، مَجلسینگ باشیندا اوتورماگی و عبادتگاه‌لَرده باشدان اوتورماگی چوخ سئیرلَر. 7اوللار چوخ سئیرلَر کی خَلخ بازارلاردا اوللارا سلام ائدلَّر و اوللاری اُستاد چاغیرالّار. 8آما سیز، قؤیماینز هئچ‌کَس بئلَینزی ”اُستاد“ چاغیرا، چونکی سیزده بیر اُستاد وار و سیزینگ وارینز، کاکایانز. 9هئچ‌کَسی دا یئر اوستونده بووآ چاغیرماینز چونکی سیزده فقط بیر ”بووآ“ وار، او دا گؤیده دیر. 10و نه ده قؤینز بیری بئلَینزی ”معلّم“ چاغیرا، چونکی سیزده فقط بیر معلّم وار، او دا مَسیح دیر. 11او کی سیزینگ آراینزدا واری‌کَسدَن بویوکتر دیر، سیزینگ نوکرینز اولاسی. 12هَر کَس کی اؤزونو اوجالادا، آلچاق اولور و هَر کَس کی اؤزونو آلچاق ائده، اوجالانار.

13«آما، وای سیزینگ حالینزا! ای تورات معلّم‌لَری و فَریسی فِرقه‌سی‌نینگ عالِم‌لَری، ای ایکّی‌ایزلی‌لَر! سیز گؤی پادشاه‌لیگی یعنی تارئ پادشاه‌لیگی‌نینگ دَرینی آداملار اوستونه باغلاییراینز. نه اؤزونز ایچَری گلیرَینز، نه ده قؤیوراینز اوللار کی سئیرلَر، ایچَری گلَلّر. 14وای سیزینگ حالینزا ای تورات معلّم‌لَری و فَریسی‌لَر، ای ایکّی‌ایزلی‌لَر! سیز بیر یاندان دول آروادلارینگ ائوینی چاپیراینز، بیر یاندان دا اؤزونزو خوب گؤرسَدمَک ایچی دُعا‌لارینزی اوزون ائدیرَینز. بو سَبریه ده سیزینگ جَزاینز چوخ سَخت‌ اولور. 15وای سیزینگ حالینزا ای تورات معلّم‌لَری و فَریسی‌لَر، ای ایکّی‌ایزلی‌لَر! سیز دریا و قورّولوقو آیاق آلتینا قؤیوراینز تا بیرینی اؤز دینینزه گتیرَینز و اوندا کی اؤنو اؤز دینینزه گتیریرَینز، او آدامی اؤزونز‌دان ایکّی برابر آرتیق، جَهنّم لایقی ائدیرَینز.

16«وای سیزینگ حالینزا ای کور بَلَدچی‌لَر کی دئییرَینز: ”اگر بیر کَس مَعبده آند ایچسه، هئچ‌نه ده‌ییل، آما اگر بیر کَس مَعبدینگ طلاسینا آند ایچسه او آدام، ایچدیگی آندینا وفا ائده‌سی.“ 17ای کور نافَهم‌لَر! هانی بیری‌نینگ هَمیتی آرتیق دیر؟ طلا یا مَعبد کی طلایی مُقدّس ائدیر؟ 18سیز دئییرَینز کی: ”اگر بیر کَس قُربانگاها آند ایچسه، هئچ‌نه ده‌ییل، آما اگر بیر کَس او قُربانلوقا کی قُربانگاه اوستونده دیر آند ایچسه، او آدام ایچدیگی آندینا وفا ائده‌سی.“ 19ای کورلار! هانی بیری‌نینگ هَمیتی آرتیق دیر؟ قُربانلوق یا قُربانگاه کی قُربانلوقی مُقدّس ائدیر؟ 20پس هَر کَس قُربانگاها آند ایچیر، قُربانگاها و هَرنه‌یه کی اؤنونگ اوستونده دیر آند ایچیر. 21و هَر کَس دا کی مَعبده آند ایچیر، مَعبده و تارئ‌یا کی مَعبد ایچینده ساکن دیر آند ایچیر. 22و هَر کَس گؤیه آند ایچیر، تارئ‌نینگ پادشاه‌لیگی تختینه و تارئ‌یا کی او تخت اوستونه اوتوریر آند ایچیر.

23«وای سیزینگ حالینزا ای تورات معلّم‌لَری و فَریسی‌لَر، ای ایکّی‌ایزلی‌لَر! سیز، شَریعتینگ اوندا-بیر وئرمَک حکمینی، حتّی نعناع، شوید و زیره ایچی دا یئرینه ائتیردیرَینز، آما شَریعتینگ مهم حکم‌لاریندا کی، عِدالت، رَحمت و وفالی‌لیگ دیر کوتاهلیگ ائدیرَینز. واجب دیر کی، اوندا-بیر وئرمَک حکمینی یئرینه ائتیردَینز و عِدالت، رَحمت و وفالی‌لیگده ده کوتاهلیگ ائدمئیَینز.» 24ای کور بَلَدچی‌لَر! سیز پخشه‌یی سیزَکدَن گچیردیرَینز آما دؤوه‌یی اوتیراینز!

25«وای سیزینگ حالینزا ای تورات معلّم‌لَری و فَریسی‌لَر! ای ایکّی‌ایزلی‌لَر! سیز پایلا و بشقابینگ یازّیسینی آرّیدیراینز، آما اوللارینگ ایچی، طَمع‌دن و عیش و نوش‌دان دؤلو دور. 26ای کور فَریسی‌لَر! اَوّل پایلا بشقابینگ ایچینی آرّیدینز کی یازّیسی ده آرّینار.

27«وای سیزینگ حالینزا ای تورات معلّم‌لَری و فَریسی‌لَر! ای ایکّی‌ایزلی‌لَر! سیز قَشنگ دؤزه‌لَن مزارلار له‌یینَینز کی یازّی‌لاری قَشنگ گؤرولیر آما اوللارینگ ایچی اؤلولَر سوموکوندَن و واری رَقم نَجس‌لیگدَن دؤلو دور! 28ائله بئله ده سیز یازّی‌دان صالح گؤرولیرَینز آما ایچینز ایکّی‌ایزلی‌لیگدان و پیس ایش‌دان دؤلو دیر.

29«وای سیزینگ حالینزا ای تورات معلّم‌لَری و فَریسی‌لَر! ای ایکّی‌ایزلی‌لَر! سیز پیغمبرلَر مزارلارینی دؤزَتیرَینز، و صالح آداملارینگ مزارلارینی بَزَتیرَینز، 30دئییرَینز: ”اگر بیز جَدلَریمیز زامانیندا وار ایدیک، پیغمبرلَر قانینی تؤکمَکده اوللار اینَن شَریک اولمازدیک.“ 31بئله سیزینگ اؤزونز اؤز ضدّینزه گواهلیگ وئریرَینز کی پیغمبرلَری اؤلدورَن آداملارینگ اوشاق‌لاری‌یانز. 32ایندی کی بئله دیر، جَدلَرینز باشلادیگی ایشی، سیز تؤکَدینز. 33ای ایلان‌لار، ای اَفعی‌لَر نَسلی! نه‌یین جَهنّم اوتوندان قَچه‌رَینز؟ 34من پیغمبرلَر، حِکمَتلی کیشی‌لَر و تورات معلّم‌لَری سیزه یوللاییرام؛ سیز اوللارینگ بیر پاراسینی اؤلدورَرَینز، بیر پاراسینی صَلیبه چَکرَینز، بیر پارایی دا عبادتگاه‌لَرده شالّاق ووراراینز و شَهردَن شَهره اوللارا جَفا ائده‌رَینز. 35پس واری صالح آداملارینگ یئره تؤکولَن قانی سیزینگ بویونینزدا اولور. صالح هابیل قانیندان توتموش، بَرخیا اوغلو، زَکریا قانی‌نانچاز کی اؤنو قُربانگاه و مَعبدینگ مُقدّس یئری آراسیندا اؤلدوردینز، 36گرچَکینی سیزه دئییرم، واری بو زادلار بو نَسلینگ دامانینی توتار.

عیسا اورشلیم شَهری ایچی یاش تؤکیر

37«ای اورشلیم، ای اورشلیم، ای پیغمبرلَری اؤلدورَن شَهر، ای سَنینگ یانینگا یوللانان‌لاری، سَنگسار ائدَن! نئچه دفعه سئدیم، بیر طوغ له‌یین کی جوجه‌لَرینی قاناتلاری آلتیندا کوپ ائدیر، سَنینگ اَته اولادینگی بیر یئره کوپ ائدم آما سَن سئمه‌دینگ. 38باخینز، اوباینز سیزه خالی قالمیش. 39سیزه دئییرم، مَنی داها گؤرمه‌ینز، او زامانانچاز کی دئیه‌رَینز: ”مُتبارک اولسون او کی رَبّینگ آدیندا گلیر.“»

Currently Selected:

مَتّی 23: QII

Highlight

Copy