مَتّی 20
20
اوزوم باغی‌نینگ فَحله‌لَری مَثَلی
1«گؤی پادشاه‌لیگی کی ائله تارئ پادشاه‌لیگی دیر، بیر باغ اَیه‌سینه بَنزه‌ییر کی سَحر ناماچاغی یازّیا چیخدی تا اؤز اوزوم باغی ایچی بیر پارا فَحله توتا. 2اَرباب فَحله‌لَر اینان گؤنده بیر دینار اوستونه کی بیر فَحله‌نینگ بیر گؤنونونگ دستمزدی ایدی صالاحا گئتدی، اوندان سورا دا اوللاری اؤز اوزوم باغینا یوللادی. 3سَحر دانی، ساعت دوقوزا یاخین، یازّیا چیخدی و بیر پارا آیری آداملاری گؤردو کی میداندا بیکار تورموشلار. 4اوللارا دئدی: ”سیز ده منیم باغیما گئدینز و حَقّینز هَرنه کی اولا وئره‌رَم.“ 5فَحله‌لَر دا گئتدیلَر. ظُهر چاغی ساعت اون ایکّیه یاخین و ظُهردان سورا، ساعت اؤچه یاخین گئنه یازّیا چیخدی و ائله او ایشی گؤردو. 6پَسین‌چاغی ده، ساعت بئشه یاخین، یازّیا چیخدی و گئنه بیر پارا آیری آداملار گؤردو کی تورموشلار، اوللارا دئدی: ”نه ایچی بوتون گؤن بوردا بیکار تورموشاینز؟“ 7اوللار جواب وئردیلَر: ”بو سَبریه کی هئچ‌کَس بیزی ایشه توتمامیش.“ اوللارا دئدی: ”سیز ده منیم باغیما گئدینز.“ 8آغشام چاغی، اوزوم باغی‌نینگ اَیه‌سی ناظری چاغیردی و دئدی: ”فَحله‌لَری چاغیر و مُزدلارینی وئر، آخیردان گلَن فَحله‌لَردَن باشلا، اَوّلکی گلَنلَرنچاز.“ 9او فَحله‌لَر کی پَسین‌چاغی ساعت بئشه یاخین ایشه گلدیلَر هر بیرسی بیر دینار آلدیلار. 10ایندی، اَوّلکی ایشه گلَنلَر، گمان ائدیلَر کی آرتیق مُزد آلارلار، آما اوللارینگ هر بیری دا، آداما بیر دینار آلدیلار. 11مُزدلارینی آلاندا، باغ اَیه‌سینه توغّولادیلار، 12دئدیلَر: ”بو آخیردان گلَنلَر فقط بیر ساعت ایش گؤردولَر و سَن اوللاری بیزیم اینَن کی گؤنونگ آغیرلوقونو و سیجاقینی چَکمیشَک، بیر سایمیشانگ.“ 13آما باغ اَیه‌سی اوللارینگ بیرینه جواب وئردی: ”یولداش، من سَنه ناحَقلیگ ائدمه‌ییرم. بئیه سَن منیم اینَن، بیر دینار اوستونه صالاحا گئدمه‌دینگ؟ 14مُزدینگی آل و گئد. من سئیرم ائله اوغاد کی سنه مُزد وئریرَم، بو آخیردان ایشه گلَنه دا اوغاد وئرَم. 15بئیه اختیار یوخوم کی اؤز مالیم اینان، سئدیگیم ایشی گؤرَم؟ گؤز یوخونگ منیم سخاوتیمی گؤرَینگ؟“ 16بئله، آخیرکی، اَوّلکی اولور و اَوّلکی، آخیرکی اولور.»
عیسانینگ اؤچونجو پیشگولیگی اؤلمَکی و دئرّیلمَکی باره‌سینده
17عیسا او منطقه‌دان چیخدی و اورشلیم شَهرینه ساری گئدَنده، یولدا اون ایکّی شاگردینی بیر قیراقا چَکدی و اوللارا دئدی: 18«باخینز، اورشلیم شَهرینه گئدیرَک و انسان اوغلو اؤردا باش کاهِن‌لَر کی مَعبد عالِم‌لَری دیرلار و تورات معلّم‌لَری اَلینه وئریلَر. اوللار انسان اوغلونو اؤلومه محکوم ائده‌رلَر 19و اؤنو بُت‌پَرست خَلخ اَلینه وئره‌رلَر تا اوللار اؤنو ریشخند ائدَلَّر و شلّاق وورالّار و اؤنو صَلیبه چَکلَّر، و او، اؤچونجو گؤنده، دئرّیلَر.»
بیر آنانینگ خواهشی
20یَعقوب و یوحَنّانینگ آناسی، اؤز ایکّی اوغلو اینان، عیسا یانینا گلدی. یَعقوب و یوحَنّا، زِبِدی اوغوللاری ایدیلار. آرواد عیسایا سجده ائدی و عیسادان سئدی کی بئلَسی ایچی بیر ایش گؤره. 21عیسا خبر آلدی: «نه سئیرَینگ؟» آرواد دئدی: «دئ تا منیم بو ایکّی اوغلوم سَنینگ پادشاه‌لیگینده، بیری ساغ طَرفینگه و او بیری چَپ طَرفینگه اوتورا.» 22عیسا جواب وئردی: «سیز بیلمئیرَینز کی نه سئیرَینز. آیا سیز او عَذاب پایلا‌سیندن کی من بو تئزلیگده ایچَرَم، ایچه بیلیرَینز؟» اوللار دئدیلَر: «بَله، ایچه بیلیرَک.» 23عیسا اوللارا دئدی: «سیز منیم ایچدیگیم پایلا‌دان ایچَرَینز، آما منیم ساغ طَرفیمه و چَپ طَرفیمه اوتورماکینگ اختیاری منیم اَلیمده ده‌ییل. بو یئرلَر او آداملار ایچی دیر کی منیم گؤیده‌کی بووآم اوللار ایچی آماده ائدمیش.»
24اوندا کی او اون شاگرد بو خَبری ائشیتدیلَر، او ایکّی کاکایا سَخت عصبانی اولدولار. 25عیسا اوللاری اؤز یانینا چاغیردی و دئدی: «سیز بیلیرَینز کی بُت پَرست‌لَرینگ رئیس‌لَری، اوللارا آقالیگ ائدیرلَر و اوللارینگ بویوک‌لَری، اوللارا حکم سؤرورلَر. 26آما سیزینگ آراینزدا بئله اولماسین. بلکی آراینزدا هَر کَس کی سئیر بویوک اولا، نوکرینز اولاسی 27و هَر کَس کی سئير اَوّل اولا، غُلامینز اولاسی. 28حتّی انسان اوغلو گلمه‌دی تا خدمت اولونا، بلکی گلدی تا خدمت ائده و اؤز جانینی چوخ آداملارینگ آزادلیگی ایچی وئره.»
عیسا ایکّی کور آدامی شفا وئریر
29عیسا و شاگردلَری اَریحا شَهریندن چیخَنده، بیر بویوک جمعیت عیسا آردی سورا گئتدی. 30یول قیراقینا ایکّی کور آدام اوتورموشلاردی. اوللار اوندا کی ائشیتدیلَر کی عیسا اؤردان گچیر، اوجا سَس اینَن چاغیردیلار: «آقا، ای داوود پادشاه اوغلو، بیزه رَحم ائد!» 31جمعیت اوللاری هَیله‌دیلَر و اوللارا دئییرلَردی کی بی سَس اولالّار آما او ایکّی آدام اوجاتر چاغیریرلاردی و دئییرلَردی: «آقا، ای داوود پادشاه اوغلو، بیزه رَحم ائد!» 32عیسا توردو و او ایکّی آدامی چاغیردی و دئدی: «سئیرَینز سیزینگ ایچی نه ایش گؤرَم؟» 33اوللار دئدیلَر: «آقا، سئیرَک گؤزلَریمیز آچیلا.» 34عیسانینگ اؤره‌کی اوللارا یاندی و اوللارینگ گؤزلَری اوستونه اَل قؤیدو و ائله او آن اوللارینگ گؤزلَری آچیلدی و عیسانینگ قولونجوندان یولا دؤشدولار.
Currently Selected:
مَتّی 20: QII
Highlight
Share
Copy
Want to have your highlights saved across all your devices? Sign up or sign in
@ 2024 Korpu Company
