یوحنا 13
13
عیسا شاگردلَرینگ قیچلَرینی یویور
1-2پِسَخ عیدینینگ موقعسی ایدی و عیسا اینان شاگردلَری پِسَخ شامینی یئییرلَردی. اِبلیس ایلَرتردن شَمعون اوغلو، یَهودا اَسخَریوطینگ اؤرهکینه قؤیموشدو کی عیسایی اَله وئره. عیسا کی بیلیردی بونونگ وختی ائتیشمیش کی بو دنیادان گؤیدهکی بووآ یانینا گئده، اؤز شاگردلَرینی کی بو دنیا ایچینده ایدیلَر مُحبّت ائدی. عیسا اوللاری تمام و کمال مُحبّت ائدی. 3عیسا کی بیلیردی کی گؤیدهکی بووآ واری زادی اؤنونگ اَلینه تاپشیرمیش و بو کی تارئ طَرفیندن گلمیش و تارئ یانینا دا دؤنیر، 4سُفره اوستوندن توردو آیاقی و عاباسینی دالیندان چیخارتدی، بیر حوله گؤتوردو و باغلادی بئلینه. 5اوندا بیر لَگن ایچینه سو تؤکدو و شاگردلَرینگ قیچلَرینی یویوردی و بئلینه باغلادیگی حوله اینَن ده قورّودوردی. 6شَمعون پِطرُسا ائتیشنده، پِطرُس اؤنا دئدی: «آقا، سن منیم قیچلَریمی یویورانگ؟» 7عیسا جواب وئردی: «سن ایندی آنگلامئیرانگ کی من نه ایش گؤرورَم، آما بعداَزی آنگلایارانگ.» 8پِطرُس عیسایا دئدی: «من هئچوخت قؤیمام کی سن منیم قیچلَریمی یویانگ!» عیسا اؤنا دئدی: «اگر سنی یومایام، منه تَعلّق یوخونگ.» 9شَمعون پِطرُس عیسایا دئدی: «آقا، ایندی کی بئله دیر، نه فقط قیچلَریمی، بلکی اَللَریمی و باشیمی ده یوو!» 10عیسا بئلَسینه دئدی: «او آدام کی سویا گیرمیش، داها یویولماگا احتیاج یوخو، بهغیری قیچلَری. بو خاطره کی او داها تَمیز دیر. سیز ده تَمیزَینز، آما نه سیزینگ وارینز.» 11بو کی عیسا دئدی: «سیزینگ وارینز تَمیز دهییلینز،» بو سَبریه ایدی کی بیلیردی کیم بئلَسینی اَله وئرهر.
12عیسا اؤز شاگردلَرینینگ قیچلَرینی یویاندان سورا، عاباسینی گئیدی و گئنه شام سُفرهسی قیراقینا اوتوردو. اوللارا دئدی: «آنگلادینز کی سیزینگ ایچی نه ایش گؤردوم؟ 13سیز منی ’اُستاد‘ و ’آقا‘ چاغیریراینز و دؤز ده دئییرَینز، چونکی وارام. 14پس اگر من کی سیزینگ آقاینز و اُستادینزام، سیزینگ قیچلَرینزی یوموشام، سیز ده بیر بیر قیچلَرینی یوآسینز. 15من بو ایش اینن سیزه بیر نمونه وئرمیشَم تا سیز ده بیر بیر اینن ائله بئلهیین رووآل ائدَینز کی من سیزینگ اینن رووآل ائدمیشَم. 16گرچَکینی سیزه دئییرم، نه نوکر اؤز اَربابیندان اوخاری دیر، نه ده ائلچی اؤز یوللایانیندان. 17ایندی سیز بو حَقیقتی بیلیرَینز و اگر اؤنا عَمل ائدَینز بَرکت توتارانز. 18منیم گپیم سیزینگ وارینزدا دهییل؛ بو سَبریه کی من سیزینگ تَک به تَکینزی کی سَچمیشَم تانییرام، بیلیرَم کی سیزینگ بیرینز من دئدیگییی ائدمز. بو اولونار تا مُقدّس یازیلیلاردا یازیلان سؤز یئرینه ائتیشه کی دئییر: ”منیم چؤرهکیمی یئیَن، منیم اینن دشمنلیگ ائدمیش.“ 19ایندی من بو ایشینگ اولماگیندان ایلَری، سیزه دئییرم، تا اوندا کی بو ایش اولدو، ایمان گتیرَینز کی من اویام. 20گرچَکینی سیزه دئییرم، هَرکَس کی من یوللایان آدامی قبول ائده، منی قبول ائدیر، و منی قبول ائدَن، منی یوللایان گؤیدهکی بووآیی قبول ائدیر.»
عیسا دئییر کی شاگردلَرینینگ بیری بئلَسینی اَله وئرهر
21عیسا بو زادلاری دئیَندن سورا، روحو پَریشان اولدو و گواهلیگ وئردی و دئدی: «گرچَکینی سیزه دئییرم، سیزینگ بیرینز منی اَله وئرهر.» 22شاگردلَر بیر بیره باخیرلاردی و حیران قالمیشلاردی کی عیسا کیمی دئییر. 23عیسا شاگردلَرینینگ بیری کی عیسا اؤنو چوخ سئیردی، سُفره قیراقیندا چؤرهک یئیَنده، دیرسگی اوستونه یان دؤشموشدو و باشی، عیسا دؤشونه یووق ایدی. 24شَمعونِ پِطرُس اؤنا گؤز آتدی و بئلَسیندَن سئدی کی عیسادان خبر آلا کی کیمی دئییر. 25پس او شاگرد، بیر آز گئری چَکیلدی و باشینی عیسا دؤشونه دایادی و خبر آلدی: «آقا، او آدام کیم دیر؟» 26عیسا جواب وئردی: «او آدام ائله او دور کی بو تیکه چؤرهکی پایلا ایچینه باتیراندان سورا، اؤنا وئرهرَم.» اوندا بیر تیکه چؤرهک پایلا ایچینه باتیردی و اؤنو شَمعون اوغلو، یَهودا اَسخَریوطا وئردی. 27یَهودا تیکهیی اوتاندا، شیطان اؤنونگ ایچینه گیردی. اوندا عیسا یَهودایا دئدی: «او ایشی کی سئیرَینگ گؤرَینگ، تئز گؤر.» 28آما سُفره قیراقینا اوتورانلارینگ هئچ بیری، بیلمهدیلَر کی نه ایچی عیسا بو گپی یَهودایا چالیر. 29شاگردلَرینگ بیر پاراسی گمان ائدیلَر کی بو سَبریه کی خَرجلیگ پیلینینگ کِسّهسی یَهودا یانیندا دیر، عیسا اؤنا دئییر کی: «هَرنه عید ایچی لازم دیر، آل،» یا دا بو کی یَهودا یوخسوللارا بیر زاد وئرهسی. 30یَهودا تیکهیی یئیندن سورا، فوری یازّیا چیخدی. و گئجه ایدی.
عیسا بیر تازّا حکم وئریر
31یَهودا یازّیا چیخَندن سورا، عیسا دئدی: «ایندی بونونگ وختی دیر کی انسان اوغلونونگ شوکتی آشکار اولا و گؤیدهکی بووآنینگ شوکتی انسان اوغلو طَریقیندن آشکار اولا. 32اوندا کی انسان اوغلو تارئ شوکتینی آشکار ائده، تارئ ده انسان اوغلونونگ شوکتینی آشکار ائدَر و تارئ ائله بو تئزلیگده بو ایشی گؤرَر.
33اوشاقلاریم، بیر آز مُدّت داها سیزینگ اینَنَم. منیم قولونجوما گَزَرَینز و ائله او طور کی بو خلخه دئدیم، ایندی ده سیزه دئییرم کی، اؤرایا کی من گئدیرَم، سیز گله بیلمَینز. 34من سیزه بیر تازّا حکم وئریرَم و او دا بو دور کی بیر بیره مُحبّت ائدینز. ائله او طور کی من سیزه مُحبّت ائدمیشَم، سیز ده بیر بیره مُحبّت ائدهسینز. 35اگر سیز بیر بیره مُحبّت ائدَینز، واری خَلخ بیلَرلَر کی سیز منیم شاگردلَریمَینز.»
عیسا دئییر کی پِطرُس بئلَسینی حاشا ائدهر
36شَمعون پِطرُس دئدی: «آقا، هارا گئدیرَینگ؟» عیسا جواب وئردی: «سن ایندی منیم قولونجومدان من گئتدیگی یئره، گله بیلمَینگ؛ آما بعداَزی قولونجومدان گلَرَینگ.» 37پِطرُس دئدی: «آقا، نه ایچی ایندی قولونجونگدان گله بیلمهیَم؟ من جانیمی سَنینگ ایچی وئرهرَم.» 38عیسا دئدی: «سَن جانینگی منیم ایچی وئرهرَینگ؟ گرچَکینی سنه دئییرم، خوروس بونگ وئرَندن ایلَری، سن اؤچ دفعه منی حاشا ائدهرَینگ.»
Currently Selected:
یوحنا 13: QII
Highlight
Share
Copy
Want to have your highlights saved across all your devices? Sign up or sign in
@ 2024 Korpu Company
