یَعقوب 3
3
دیلی رام ائدمَک
1کاکالاریم، سیزلَردَن چوخ آدام تارئ کلامی‌نینگ معلّمی اولماک قولونجوندا اولماسین. چون بیلیرَینز کی بیزلَره کی تارئ کلامینی درس وئریرَک، محاکمه چتین‌تر اولور. 2چونکی بیزیم واریمیز چوخ زادلاردا خطا ائدیرَک. اگر بیر آدام دانیشماکیندا خطا ائدمئیه، او آدام بیر کامل آدام دیر و باشاریر کی بوتون بَدنی‌نینگ اوسارینی آلا اَلینه. 3اگر بیز آت‌لار آغیزینا لگام ووروراک بونونگ ایچی دیر کی بیزدَن اطاعت ائدلَّر و بوتون دارلارینی دا سئدیگیمیز یئره ساری آپاراک. 4کشتی‌لَره دا باخینز: با بو حال کی چوخ بویوک دیرلَر و گؤجلی یئل‌لَر اوللاری سؤریرلَر، آما بیر کوچوک سُکّان اینن ناخدا سئدیگی یئره ساری آپاریلیرلار. 5ائله بئله ده، دیل بَدنینگ بیر کوچوک عُضوی دیر، آما گئنه ده بویوک بویوک اِدّعالار واری. بیر کوچوک قیمیشیق نه‌یین بیر بویوک جَنگلی اوتا چَکیر! 6دیل بیر اوت دور. بیر دنیا شَریرلیگ دیر. دیل بیر عُضو دیر بَدنیمیزینگ عُضو‌لاریندان کی بوتون بَدنی کثیف ائدیر و بوتون زندلیگ دورانینی اوتا چَکیر، بیر اوت کی جَهنّم اونو اَلوولاندیریر. 7چون واری رَقم وحشی حیوان، گؤیده‌کی قوش، یئرده سئرینَن و دریاداکی جاندارلار، بَشر اَلی اینن رام اولا بیلیر و رام دا اولموش، 8آما هئچ بَشر دیلی رام ائده بیلمئیر. دیل بیر آرام توتمایان شَریرلیگ دیر و اؤلدورَن زَهردَن دؤلو دیر. 9بو دیل اینن رَبّیمیزی و گؤیده‌کی بووآمیزی حَمد و ثنا ائدیرَک و ائله بو دیل اینن دا آدام‌لاری کی تارئ‌یا بنزه‌یین یارانمیشلار، لَعنت ائدیرَک. 10بیر آغیزدان هم حمد و ثنا چیخیر، هم دا لَعنت. کاکالاریم، بو زادلار بئله‌یین اولمایاسی. 11بئیه اولور کی بیر چشمه‌دن هم شیرین سو، هم ده شور سو چیخه؟ 12کاکالاریم، بئیه اولور کی انجیر آغاجی‌نینگ ثَمری زیتون اولا، یا دا اوزوم آغاجی‌نینگ ثَمری انجیر؟ ائله بئله دا شور چشمه‌دن، شیرین سو روآن اولا بیلمَز.
حِکمَت گؤیدَن
13آراینزدا کیم بیر حِکمَتلی و بیر بیلَن آدام دیر؟ او آدام بونو، دؤز زندلیگ ائدمَکی اینن گؤرسَدسین. عَمل‌‌لَری اینن کی گؤنگول آلچاقلیگ اینن دیر و حِکمَتدَن سَرچشمه توتیر. 14آما اگر اؤره‌کینزده آچّی حَسودلیگ و خودخواهلیگ وارینز، اؤزونزه غَرّه اولمانز و حَقیقت ضدّینه دانیشماینز. 15بیر بئله‌یین حِکمَت گؤیدَن گلمئیر، بلکی یئردَن دیر، نَفْسانی دیر و شیطانلی دیر. 16بو سَبریه کی هر یئرده کی حَسودلیگ و خودخواهلیگ اولسا، اؤردا قَرمی‌قَریشیق‌لیگ و واری رَقم پیس رووآل دا اولور.
17آما او حِکمَت کی گؤیدَن دیر، اَوّل آرّی دیر، اوندا صُلح گتیرَن، آرام و نَصیحت قبول ائدَن دیر، رَحمدَن و خوب خوب ثَمرلَردَن دؤلو دیر، هئچ‌کَس آراسینا فَرق قؤیمئیر و صاپ صادق دیر. 18صالحلیگ، او ثَمر دیر کی صُلح و صفادا، صُلح سئیَن‌لَر اَلی اینَن اَکیلیر.
@ 2024 Korpu Company