یَعقوب 2
2
فَرق قؤیماک گُناهی
1کاکالاریم، سیزلَر کی او شوکتلی رَب، آقامیز عیسا مَسیحه ایمان وارینز، آداملار آراسینا فَرق قؤیماینز. 2چونکی اگر بیر آدام گلسه سیزینگ مَجلسینزه کی طلا اوزلوک سالمیش بورماقینا و اَعیانی رَخت گئیمیش و بیر یوخسول دا گلسه ایچری کی کُهنه رَخت گئیمیش، 3و اگر سیز او اَعیانی رَخت گئیَن آداما آغیرلیق قؤیاینز و بئلَسینه دئیینز کی: «بویور سن بورا بو خوب یئره اوتور،» آما او یوخسولا دئیینز کی: «سن ائله اؤردا آیاق باشیندا تور،» یا دا «منیم قیچیم دَمینه اوتور،» 4بئيه بئلهکین سیز اؤز آراینزدا فَرق قؤیمامیشاینز و شَریر فکرلَر اینن حکم ائدمَمیشَینز؟
5عزیز کاکالاریم، قولاق آسینز! بئیه تارئ اوللاری کی بو دنیادا یوخسول دیرلار سَچمهمیش تا ایماندا وارلی اولالّار و او پادشاهلیگی میراثا آپارالّار، ائله او پادشاهلیگی کی تارئ اؤنونگ وَعدهسینی اوللارا کی بئلَسینی چوخ سئیرلَر وئرمیش؟ 6آما سیز یوخسول آداما حُرمَتسیزلیگ ائدمیشینز. بئیه سیزه ظُلم ائدنلَر و سیزی مَحکمهیه چَکنلَر، ائله وارلیلار دهییللَر؟ 7بئیه اوللار دهییللَر کی او حُرمَتلی آدا کی سیزینگ اوستونزه قؤیولموش، کُفر دئییرلَر؟
8اگر سیز گرچَکدَن او شاهانه شَریعتی، مُقدّس یازیلییا گؤره یئرینه ائتیشتیرَینز کی دئییر: «قونشونگو اؤزونگ لهیین چوخ سئه،» خوب ایش گؤرورَینز. 9آما اگر سیز آداملار آراسینا فَرق قؤیاینز، گُناه ائدیرَینز و شَریعت سیزی تَقصیرکار گؤرور و بئلَینزی محکوم ائدیر. 10بو سَبریه کی هَر کَس کی شَریعتینگ واریسینی یئرینه ائتیشتیره آما بیر تَک داناسیندا خطا ائده، او آدام بونا تَقصیرکار اولیر کی شَریعتینگ واریسینی آیاق آلتینا قؤیموش. 11چون ائله او تارئ کی دئدی: «زِنا ائدمه،» بونو دا دئدی کی: «آدام اؤلدورمه.» سن اگر زِنا ائدمهیَنگ آما آدام اؤلدورَینگ، شَریعتی آیاق آلتینا قؤیموشانگ. 12پس او آداملار لهیین دانیشینز و او آداملار لهیین رووآل ائدینز کی آزادلیگ شَریعتینه گؤره اوللارا حکم اولونار. 13چونکی او آداما کی هئچکَسه رَحم ائدمهمیش، رَحم اینن حکم اولماز. رَحم، حکم ائدمَکه گؤج دیر.
عَملسیز ایمان، اؤلو دیر
14کاکالاریم، نه فایده واری اگر بیری دئسه ایمان واری آما اعمال یوخو اولا، بئیه بیر بئلهیین ایمان اؤنو نجات وئره بیلَر؟ 15اگر بیر کاکا یا دا بیر باجی رَخت یوخو اولا گئیه و او گؤنونونگ چؤرهکینه مُحتاج اولا 16و سیزینگ بیرینز اوللارا دئیه کی: «گئدینز به سلامت، ایسی گئیینز و توخ اولینز،» بدون بو کی اوللار بَدنینینگ احتیاجینی بئللَرینه وئره، نه فایده واری؟ 17ائله بئله دا تَک ایمان، اگر اعمالی اولمایا، بیر اؤلو ایمان دیر.
18ایندی بیری دئیهر: «سن ایمان وارینگ، من دا اعمال واریم!» سن ایمانینگی، عَملسیز منه گؤرسَد، من دا ایمانیمی عَمللَریم اینان سنه گؤرسَدهرَم. 19سن اینانیرانگ کی تارئ واحد دیر؛ خوب ائدیرَینگ! حتّی شیطانلی روحلار دا اینانیرلار و قورخودان تیترهییرلَر.
20ای نافَهم آدام، سئیرَینگ بیلَینگ کی نه ایچی ایمان، عَملسیز، هئچ ایشدن گلمئیر؟ 21بئیه بیزیم جَدّیمیز ابراهیم پیغمبر، اوندا کی اوغلو اِسحاقی قُربانگاهدا تقدیم ائدی، عَملی طَریقیندَن صالح ساییلمادی؟ 22گؤرورَینگ کی ایمان، اؤنونگ عَمللَری یانی سورا ایش گؤروردو و ایمان اؤنونگ عَمللَری اینن کامل اولدو. 23و توراتدا یازیلان سؤز یئرینه ائتیشدی کی دئییر: «ابراهیم تارئیا ایمان گتیردی و بو اؤنونگ ایچی صالحلیگ ساییلدی،» و ابراهیما، تارئ یولداشی دئییلدی. 24گؤرورَینز کی آدام اعمال طَریقیندَن دیر کی صالح ساییلیر، نه فقط تَک ایمان طَریقیندَن. 25ائله بئله دا، بئیه راحاب کی فاحشه ایدی، اوندا کی ائلچیلَره پناه وئردی و اوللاری بیر آیری یولدان یولا سالدی، عَمللَری طَریقیندَن صالح ساییلمادی؟ 26بو خاطره کی ائله اولهیین کی بَدن، روحسیز اؤلو دیر، ایمان دا عَملسیز اؤلو دیر.
Currently Selected:
یَعقوب 2: QII
Highlight
Copy
Compare
Share
Want to have your highlights saved across all your devices? Sign up or sign in
@ 2024 Korpu Company