اعمال 4
4
پِطرُس و یوحَنّا شورا حُضوروندا
1پِطرُس و یوحَنّا حَلی خَلخ اینن دانیشیرلاردی کی کاهِنلَر و مَعبد ناتّورلارینینگ رئیسی و صَدوقی فِرقهسینینگ عالِملَری گلدیلَر 2و بو سَبریه کی حَواریلار خَلخَه تَعلیم وئریرلَردی و اعلام ائدیرلَردی کی عیسا طَریقیندن اؤلومدَن دئرّیلمَک وار، سَخت عَصبانی ایدیلار. 3پس اوللاری توتدولار و او گؤنونگ صاباسینانچاز آتدیلار زندانا، بو سَبریه کی داها آغشام چاغی ایدی. 4آما او کلامی ائشیدنلَرینگ چوخو، ایمان گتیردیلر و ایمان گتیرَن کیشیلَرینگ سایقوشی بئش مینگ نفره یاخین اولدو.
5او گؤنونگ صاباسی، یهودیلارینگ رئیسلَری، شیخلَر و تورات معلّملَری اورشلیم شَهرینده ییغیلدیلَر. 6ائنگ بویوک کاهِن حَنّا، قیافا، یوحَنّا، اسکندر و ائنگ بویوک کاهِنینگ بوتون اوباسی آدامی بو مَجلسده حاضر ایدیلار. 7اوللار پِطرُس و یوحَنّایی گتیردیلَر اورتایا و بئللریندن خبر آلدیلار: «سیز هانی قُدرت اینن یا دا نه آد اینان بو ایشی گؤردونز؟»
8اوندا پِطرُس تارئنینگ قُدّوس روحوندان دؤلدو و اوللارا دئدی: «ای خَلخینگ رئیسلَری و شیخلَر، 9اگر بوگؤن بیز بو خوبلیگ سَبرسینه کی بیر آخساق کیشییه ائدمیشَک بازخواست اولیراک کی نهیین بو کیشی شفا توتموش، 10سیزینگ وارینز و یهود خلخینینگ واریسی بونو بیلسین، کی ناصِرهلی عیسا مَسیحینگ آدی اینان بو کیشی سیزینگ قَرشینزدا بئله ساغ و سلامت تورموش. ائله او عیسا کی سیز بئلَسینی صَلیبه چَکدینز، ائله او کی تارئ بئلَسینی اؤلومدَن دئرّیتدی. 11بو عیسا ائله او داش دیر کی سیز بَنّالار رَد ائدینز، ائله او کی عِمارتینگ اَصل داشی اولموش. 12اوندان آیری هئچکَسده نجات یوخ. بو سَبریه کی گؤی آلتیندا آداملارا بیر آیری آد وئریلمهمیش تا اؤنونگ طَریقیندن نجات توتاک.»
13اوندا کی اوللار گوردولَر کی پِطرُس و یوحَنّا نهیین اؤرهکلی دیرلار و بیلدیلر دا کی بیر بی سواد و معمولی آداملار دیرلار مات قالدیلار. اوللار آنگلادیلار کی پِطرُس و یوحَنّا عیسا اینان ایمیشلار. 14آما بو سَبریه کی گؤردولَر کی او شفا توتان کیشی پِطرُس و یوحَنّا یانینا تورموش داها اوللار ضدّینه هئچنه دئیهبیلمَدیلَر. 15آما اوندا کی فرمان وئردیلَر تا پِطرُس، یوحَنّا و او شفا توتان کیشی شورادان چیخَلّر یازّیا، اؤزلَری شوهْر ائدمَکه اوتوردولار. 16اوللار دئییرلَردی: «بو کیشیلَر اینن نیجه ائدهسیک؟ بو سَبریه کی بوتون اورشلیم آداملاری بیلیرلَر کی بیر عالم آشکار مُعجزه بوللار طَریقیندَن اولونموش و بیز دا باشارماک کی بونو حاشا ائدَک. 17آما تا بوندان آرتیق بو خبر خلخ آراسیندا داغیلمامیش، بو کیشیلَره اخطار وئرهسیک کی داها عیسا آدیندا هئچکَس اینن دانیشمایالّار.»
18اوندا اوللاری چاغیردیلار و بئللَرینه قَدغَن ائدیلَر کی داها اصلاً عیسا آدیندا نه دانیشالّار نه ده تَعلیم وئرَلَّر. 19آما پِطرُس و یوحَنّا بئله جواب وئردیلَر: «سیزینگ اؤزونز حکم ائدینز، تارئ نَظرینده هانیسی دوز دیر؟ تارئیا قولاق آسماک یا سیزه قولاق آسماک؟ 20بو خاطره کی بیز باشارمئیراک کی گؤردیگیمیزدَن و ائشیدیگیمیزدَن دانیشمایاک.»
21شورا آداملاری پِطرُس و یوحَنّایی سَخت تَهدید ائدیلَر و اوندا بئللرینی ویل ائدیلَر. اوللار هئچ یول بولمادیلار تا پِطرُس و یوحَنّایی مجازات ائدَلَّر، بو خاطره کی واری خلخ او آخساق کیشینینگ خوب اولماکی ایچی تارئیی حَمد و ثنا ائدیرلَردی، 22بو سَبریه کی او کیشی کی بو شفا توتماک مُعجزهسی اؤنونگ اوستونه اولموشدو، یاشی قیرخدَن آرتیق ایدی.
ایماندارلار پِطرُس و یوحَنّا ایچی دُعا ائدیرلَر
23پِطرُس و یوحَنّا آزاد اولاندا، گئتدیلَر یولداشلاری یانینا و هَرنهیی کی باش کاهِنلَر و شیخلَر بئللَرینه دئمیشلَردی اوللارا تعریف ائدیلَر. 24ایماندارلار بونو ائشیدَنده، واری بئلینه اوجا سَس اینن تارئ درگاهینا دُعا ائدیلَر و دئدیلَر: «یا رَب، ای سَن کی واری زادا حاکمَینگ، ای سَن کی گؤی و یئر و دریا و بوتون اوللار ایچیندهکیلَری دؤزهتمیشَینگ، 25سن، تارئنینگ قُدّوس روحو طَریقیندَن، بیزیم جَدّیمیز داوود دیلیندَن کی سنینگ نوکرینگ ایدی، دئدینگ کی:
«نه ایچی ملّتلَر شورش ائدیرلَر
و خلخ ویل نقشه چَکیرلَر؟
26دنیانینگ پادشاهلاری صَف چَکیرلَر
و رئیسلَر بئلینه ییغیلیرلَر
رَب ضدّینه
و اؤنونگ ضدّینه کی رَب سَچمیش.»
27گرچَکدن کی ائله بو شَهرده، سنینگ مُقدّس خادمینگ عیسا ضدّینه کی سن اؤنو سَچدینگ، هم هیرودیس حاکم هم ده روملی والی، پُنتیوس پیلاتُس، غیرییهودیلار و یهودیلار اینن اَل وئردیلر بیر بیره، 28تا هَرنهیی کی سَنینگ اَلینگ و سَنینگ نَقشهینگ مُقَدّر ائدمیشدی، یئرینه ائتیشتیرلَّر. 29ایندی، یا رَب، سَن اوللارینگ تَهدیدلَرینه باخ و اؤز نوکرلَرینگه مَرحمت ائد تا گئنه دا بوتون جرأت اینن سنینگ کلامینگدان دانیشالّار 30و اَلینگی شفا وئرمَک ایچی اوزات و اؤز مُقدّس خادمینگ عیسا آدی طَریقیندَن، نیشانالار و مُعجزهلَر گؤرسَد.»
31اوللار دُعاسیندان سورا، او یئر کی اؤردا ییغیلمیشلَردی، تیترَدی و اوللارینگ واریسی تارئنینگ قُدّوس روحوندان دؤلدولار و تارئ کلامینی جرأت اینن اعلام ائدیرلَردی.
ایماندارلار واری زادی اؤز آرالاریندا بَهر ائدیرلَردی
32واری ایماندارلار اؤرهکدَن و جاندان بیر ایدیلار و هئچکَس دا دئمئیردی کی مالیم اؤزومونگ دیر، بلکی واری زاددا بئلینه شَریک ایدیلار. 33حَواریلَر چوخ قوّت اینن رَب عیسانینگ اؤلومدَن دئرّیلمَکینه گواهلیگ وئریرلَردی و بیر بویوک فِیض اوللارینگ واریسینینگ اوستونده ایدی. 34اوللار آراسیندا مُحتاج آدام یوخ ایدی. بو سَبریه کی هَر کَسده کی یئر یا دا ائو وار ایدی، اؤنو ساتیردی و ساتدیگینینگ پیلینی گتیریردی 35حَواریلار جلوسینا قؤیوردو تا هَر کَسینگ احتیاجینا گؤره داغیلا. 36یوسف دا کی لاوی طایفهسیندَن ایدی و قِپرسلی ایدی و حَواریلَر اؤنو بارنابا چاغیریرلاردی کی معنیسی تشویق ائدَن دیر، 37بیر اَکین یئری واری ایدی. او، او یئری ساتدی و پیلینی گتیردی، قؤیدو حَواریلار جلوسینا.
Currently Selected:
اعمال 4: QII
Highlight
Copy
Compare
Share
Want to have your highlights saved across all your devices? Sign up or sign in
@ 2024 Korpu Company
