اعمال 25
25
پولُس فِستوس حُضوروندا
1اؤچ گؤن ایدی کی والی فِستوس ولایته ائتیشمیشدی کی قیصریه شَهریندن گئتدی اورشلیمه. 2اؤردا باش کاهِنلَر و یهودیلارینگ آدی سانلی آداملاری، والی فِستوسا پولُس شکایتینی ائدیلَر و اِصرار ائده-ائده 3والیدان سئدیلر کی اوللارا لُطف ائده و پولُسی احضار ائده اورشلیمه، بو سَبریه کی اوللار نقشه چَکمیشلردی کی یولدا پولُسی اؤلدورَلَّر. 4والی فِستوس جواب وئردی کی پولُس قیصریه شَهرینده زنداندا دیر و بو کی، فِستوسونگ اؤزو ده سئیردی ائله بو تئزلیگلرده گئده اؤرا. 5فِستوس دئدی: «پس سیزینگ آراینزدان، نئچه باشی بویوک آدام منیم اینن گلسین تا اگر بو آدام بیر خطا ائدمیش اولا، اؤنونگ شکایتینی ائدَلَّر.»
6والی فِستوس سکّیز - اون گؤن اوللار اینان قالدی و اوندان سورا دا قیصریهیه بؤکولدو و او گؤنونگ صاباسی، حکم ائدمک یئرینده اوتوردو و اَمر ائدی کی پولُسی گتیرَلَّر. 7پولُس ائتیشنده، اورشلیمدن گلَن یهودیلار، پولُسینگ دئییرینه توردولار و چوخ آغیر آغیر اِتّهاملار پولُسا ووردولار، آما باشارمادیلار او اِتّهاملاری ثابت ائدلَّر.
8پولُس اؤزوندن دفاع ائدی و دئدی: «من نه یهودیلار شَریعتینه، نه مَعبده، نه ده روم پادشاهینینگ ضدّینه خطا ائدمیشم.»
9آما والی فِستوس کی سئیردی یهودیلارا لُطف ائدمیش اولا، پولُسا دئدی: «سئیرَینگ کی گئدَینگ اورشلیمه و اؤردا بو اِتّهاملار ایچی منیم حُضورومدا مُحاکمه اولانگ؟»
10آما پولُس جواب وئردی: «من روم پادشاهینینگ مَحکمهسینده تورموشام، یعنی ائله اؤرا کی منه حکم اولوناسی. من یهودیلارا هئچ خطا ائدمهمیشم ائله اولهیین کی سیزینگ اؤزونز ده بونو چوخ خوب بیلیرَینز. 11پس اگر من تَقصیر کارام و بیر ایش گؤرموشَم کی حَقّیم دیر اؤلوم، بونونگ قولونجوندا دهییلم کی اؤلومدن قَچم. آما اگر او اِتّهاملار کی اوللار منه وورموشلار یالان دیر، هئچکَس باشارماز منی وئره اوللار اَلینه. من سئیرَم کی روم پادشاهینینگ مَحکمهسینده محاکمه اولام.»
12اوندا والی فِستوس، اؤز شوراسی آداملاری اینان شوهْر ائدنن سورا جواب وئردی: «سئمیشَینگ کی روم پادشاهینینگ مَحکمهسینده محاکمه اولانگ؟ روم پادشاهینینگ مَحکمهسینده دا محاکمه اولارانگ.»
فِستوس آگْریپاس اینان شوهْر ائدیر
13نئچه گؤندَن سورا، آگْریپاس پادشاه و بِرنیکی، والی فِستوسا خوشگلدینگ دئمک ایچی، قیصریه شَهرینه گلدیلر. 14اوللار چوخ گؤنلَر اؤردا قالدیلار. فِستوس پولُس جریانینی پادشاه ایچی تعریف ائدی و دئدی: «بوردا بیر کیشی وار کی فِلیکْس اؤنو زنداندا ویل ائدمیش. 15اوندا کی اورشلیمده ایدیم، باش کاهِنلَر و یهودیلارینگ شیخلَری بئلسیندن منه شکایت ائدیلَر و مندن سئدیلر کی اؤنو محکوم ائدَم. 16من اوللارا جواب وئردیم کی روملیلارینگ رسمی دهییل کی بیر مُتَّهمی تَسلیم ائدلَّر بوندان ایلَری کی اؤنو، شاکیلاری اینان قَرشی به قَرشی ائدلَّر و او مُتَّهم بو فُرصتی واری اولا تا او اِتّهاملار بارهسینده کی بئلَسینه وورولموش، اؤزوندن دفاع ائده. 17پس اوندا کی بوردا کُپ اولدولار، معطل ائدمهدیم بلکی او گؤنونگ ائله صاباسی، حکم ائدمک یئرینده اوتوردوم و فرمان وئردیم کی او کیشییی گتیرَلَّر. 18اوندا کی او کیشینینگ شاکیلاری توردولار آیاقی تا دانیشالّار، او کیشییی، گمان ائدیگیم پیس پیس اِتّهاملارینگ هئچ بیرینه مُتَّهم ائدمهدیلر. 19بلکی بیر نئچه زاد اوستونه کی اؤز دینلری بارهسینده ایدی و بیر عیسا آدلی کیشینینگ بارهسینده کی اؤلموش آما پولُس اِدّعا ائدیر دئرّیدیر، جَر و بحث ائدیرلَردی. 20من کی بیلمئیردیم نهیین بیر بئلهیین مَسئلهلره ائتیشهسیم، او کیشیدن خبر آلدیم کی آیا سئیر گئده اورشلیمه تا اؤردا بو اِتّهاملار ایچی محاکمه اولا. 21آما اوندا کی پولُس سئدی کی روم پادشاهینینگ رأییی صادر اولانانچاز زنداندا قالا، من ده دستور وئردیم کی پولُسی، او زامانانچاز کی باشارام بئلَسینی یوللایام روم پادشاهی یانینا، زنداندا ساخلایالّار.» 22اوندا آگْریپاس، فِستوسا دئدی: «سئیرم کی اؤزوم بو آدامینگ سؤزلرینی ائشیدم.»
فِستوس ده دئدی: «صابا ائشیدهرَینز.»
23پس او گؤنونگ صاباسی، آگْریپاس و بِرنیکی چوخ دَبدَبه و کبکبه اینن گلدیلر و نظامی فرماندهلَر اینن و شَهرینگ باشی بویوکلری اینان گئتدیلَر عمومی تالارا. اوندا فِستوس دستور وئردی و پولُسی گتیردیلر. 24فِستوس دئدی: «ای آگْریپاس پادشاه! و ای واری سیزلر کی بوردا بیزیم اینن حاضراینز! بو آدام کی گؤرورَینز، ائله او آدام دیر کی بوتون یهود خلخی اؤندان منه شکایت ائدمیشلَر، هم اورشلیمده و هم بوردا و داد و بیداد یولا سالمیشلار کی بو آدام داها دئرّی قالمایاسی. 25آما من بو نتیجهیه ائتیشدیم کی او بیر ایش گؤرمهمیش کی سزاسی اؤلوم اولا و بو سَبریه کی بو آدامینگ اؤزو سئدی کی روم پادشاهینینگ مَحکمهسینده محاکمه اولا، پس من ده تَصمیم توتدوم کی اؤنو یوللایام. 26آما هئچ حتمی سؤز یوخوم کی بو آدام بارهسینده، آقام روم پادشاهی ایچی یازام. بو سَبریه ده اؤنو گتیرمیشَم وارینزینگ حُضورونزا، علیالخصوص دا آگْریپاس پادشاه سیزینگ حُضورونزا، تا بلکم بازجولیگدان سورا، بیر سؤز واریم اولا تا روم پادشاهینا یازام. 27بو سَبریه کی منه بَلَهواریس گلیر کی بیر زندانییی یوللایام روم پادشاهی یانینا، آما یازمایام کی جُرمی نه دیر.»
Currently Selected:
اعمال 25: QII
Highlight
Copy
Compare
Share
Want to have your highlights saved across all your devices? Sign up or sign in
@ 2024 Korpu Company
