پِطرُس ایکّینجی 2
2
یالان نَبی‌لَر و یالان مُعلّم‌لَر
1آما یَهود خلخی‌نینگ آراسیندا ده یالان پیغمبرلَر وار ایدی، ائله اوله‌یین کی سیزینگ آراینزدا ده یالان مُعلّم‌لَر اولور. اوللار پناه‌دا، یالان و ویرانا ائدن تعلیم‌لر گتیرَرلر و حتّی بئللَرینی آلان اَربابی ده حاشا ائدَرلَر و بئله‌یین، اؤز باشلارینا بیر نابودلیگ گتیرَرلَر کی یک‌غافل گلر. 2چوخ آداملار اوللارینگ هَرزه‌لیگی قولونجوندان گئده‌رلَر و اوللار سَبرسینه، حَقیقت یولونا کُفر دئیه‌رلَر. 3اوللار اؤز طمع‌لَری اوستوندن، حیله‌لی سؤزلر اینن، سیزی سویارلار. اوللارینگ محکوم اولماگی کی چوخ وقت بوندان ایلرتردن مَعین اولموش، بی‌کار اوتورماموش و اوللارینگ نابودلیگی ده یاتمامیش.
4چونکی اگر تارئ، اوندا کی فرشته‌لَر گُناه ائدیلَر بئللرینه رَحم ائدمه‌دی، بلکی اوللاری آتدی جهنّمینگ سیاه‌چالینا و اوللاری قَپ قرنگی‌لیگ زنجیرلَرینه چکدی تا محاکمه ایچی ساخلانالّار؛ 5و اگر قدیم دنیاسینا رَحم ائدمه‌دی، بلکی اوندا کی او تارئ‌سیزلَر دنیاسی اوستونه طیفان یوللادی، فقط نوحی کی صالحلیگ ایلچی‌سی ایدی و یئتدی نفر داهایی ساخلاتدی، 6و اگر سُدوم و عَموره شَهرلَرینی کیل ائدمَک اینن اوللاری نابودلیگه محکوم ائدی و اوللاری ائدی بیر عِبرَت، تارئ‌سیزلیگینگ آخیر عاقبتیندَن، 7و اگر صالح لوطی کی او شَریر آداملارینگ هَرزه‌لیگ‌لَریندَن سُتوها گلمیشدی، قورتاردی، 8چونکی او صالح کیشی گؤنده اوللار آراسیندا زندلیگ ائدیردی و اؤنونگ صالح جانی، اوللارینگ پیس عَمل‌لَرینی گؤرمکدن و ائشیدمکدن عذاب چکیردی، 9پس رَب بیلیر کی نه‌یین، دیندار آداملاری امتحان‌لاردان قورتارا و صالح اولمایان آداملاری ده قیامت گؤنونانچاز، جَزا آلتیندا ساخلایا، 10علی‌الخصوص ده اوللاری کی اؤزلَرینی ویل ائدیرلَر نجس ائدن هَوی و هَوس‌لرینگ شَهوتی ایچینه و اِقتداری حَقیر ساییرلار.
اوللار ائله بی‌پَروا و غَرّه دیرلَر کی گؤیونگ شوکتلی وارلیگ‌لارینا کُفر دئمکدن قورخو یوخلاری؛ 11با بو حال کی حتّی فرشته‌لَر کی گؤج‌لَری و قُدرت‌لری چوخ آرتیق دیر، رَبّینگ حُضوروندا، اوندا کی اوللارینگ محکومیتینی اعلام ائدیرلر، اوللارا اِهانت ائدمئیرلَر. 12آما بوللار، شُعورسیز حیوان‌لار له‌یین دیرلر کی اؤز غَریزه‌لَری اوستوندن رووآل ائدیرلَر و دوغولموش‌لار تا تَله‌یه دؤشلَّر و نابود اولالّار؛ و اوللار بیر زادلار باره‌سینده کُفر دئییرلَر کی او زادلاردان هئچنه حالی‌لاری ده‌ییل، پس اوللار اؤز هلاکت‌لَری ایچینده ده نابود اولارلار، 13و ائدیگلَری پیس عَمل‌لَرینگ عَوضینده پیس گؤرَرلَر. اوللارینگ خوشلیگی بو دور کی گؤندوز چاغی عَیّاشلیگ ائدلَّر. اوللار نَنگ لَکّه‌‌لَری دیرلَر کی حتّی اوندا کی سیزینگ اینن قوناقلوقدا دیرلر، اؤز حیله‌لَریندن کیف ائدیرلَر. 14اوللارینگ گؤزلَری زِناکارلیگدَن دؤلو دور و گُناه ائدمَکدن دویمئیرلار. اوللار او آداملاری کی سُست دیرلار آلداتیرلار. اوللارینگ اؤره‌کی آج گؤزلولیگه عادت ائدمیش، بو لَعنت اولونموش اولادلار! 15اوللار دوز یولو ویل ائدمیشلَر و یولدان چیخمیشلَر. اوللار بِعور اوغلو، بَلعام یولونو ایلری توتموشلار. ائله او بَلعام کی پیس عَمل اینن مَنفعت اَله گتیرمکی چوخ سئیردی. 16آما بَلعام، اؤز خطاسی سَبرسینه توبیخ اولدو. بیر دیلی باغلی اَشّک، آدمیزاد سَسی اینن دانیشدی و او پیغمبرینگ دَلی‌لیگی جلوسونو توتدو.
17بو یالان معلّم‌لَر، قورّو چشمه‌لَر و طیفان آپاران دومانلار له‌یین دیرلَر. اوللار ایچی قَپ قرنگی‌لیگ آماده اولموش. 18چونکی اوجا اوجا بیر گپ‌لَر چالیرلار کی غَرّه‌لیگدَن و اَبله‌لیگدَن دؤلو دور و جسمینگ هَرزه هَوی و هَوس‌لَری اینن، او آداملاری آلداتیرلار کی بو تازّالیگدا یولی اَیری‌لَرینگ چنگیندن قَچمیشلر. 19اوللارا آزادلیگ وَعده‌سینی وئریرلر، آما اوللارینگ اؤزلری فساد غُلام‌لاری دیرلر؛ چون هر نه کی آداما گؤج اولسا، آدام اونونگ غُلامی اولیر. 20چون او آداملار کی، رَبّیمیز و نجات وئرنیمیز عیسا مَسیح‌نینگ مَعرفتی طریقیندن دنیانینگ نَجس‌لیگ‌لَریندن قَچمیشلر، اگر گئنه اوللارا گرفتار اولالّار و اوللار بو آدام‌لارا گؤج اولالار، اوللارینگ آخیر عاقبتی اَوّلکیندن ده بدتر اولور. 21بوخاطره کی اوللار ایچی یئی‌تر ایدی کی هئچ‌وخت صالحلیگ یولونو تانیمامیش اولالاردی، تا بو کی اونو تانیاندان سورا، بئللَرینه تاپشیریلان مُقدّس حکمدن، گئری دؤنَلّر. 22هَر نه کی بو گرچک مَثل دئییر، اوللارینگ باشینا گلمیش. بو کی:
«کؤپَک گئری دؤنیر اؤز قوسدوگینا،»
و
«دونقوز یویولماگدان سورا، چامور ایچینه اَغَنَمَگه گئری دؤنیر.»
@ 2024 Korpu Company