بیرینجی نامه تَسالونیکیلی‌لَره 2
2
پولُسینگ خدمتی تَسالونیکی‌لَره
1کاکالار، سیزینگ اؤزونز بیلیرَینز کی سیزینگ یانینزا گلمه‌کیمیز هئچ ده‌ییلدی. 2بلکی ائله اوله‌یین کی بیلیرَینز، هَرچند ایلَرتر فیلیپی شَهرینده جور و جفا چَکمیشدیک و بئلَمیز اینن پیس رووآل اولموشدو، آما تارئ‌میزدا شهامت ائدیک تا بو هَزَره چکمه‌چکیشینگ اورتاسیندا سیزه تارئنینگ اینجیلینی اعلام ائدَک. 3بو خاطره کی بیزیم تَشویقیمیز، یالاندان یا دا ناپاک نیّتدَن سَرچشمه توتمئیر؛ یا دا تلاش ائدمئیرَک کی سیزی آلداتاک، 4بلکی ائله اوله‌یین کی تارئ بیزی تأیید ائدمیش تا اینجیل بیزه تاپشیریلا، پس بیز دا دانیشیراک، نه تا انسانی خُشنود ائدَک، بلکی تا اؤره‌ک‌لَریمیزی امتحان ائدَن تارئ‌یی خُشنود ائدَک. 5چون ائله او طور کی بیلیرَینز بیز هئچ وَخت نه دیلی یاغلی‌لیگ ائدیک، نه ده آج گؤزلولیگی اؤرتَن بیر نقاب اینان گلدیک، تارئ شاهد دیر. 6نه ده آدام‌لار ائدَن عِزّت قولونجوندا ایمیشاک. ایندی چه سیز ائدَن عِزّت، چه ده باقّی کَس ائدَن.
هرچند کی مَسیح‌نینگ حَواری‌لاری مَقامیندا بو حَقّی واریمیز ایدی کی بونو سیزدَن طَلب ائدَک. 7آما بیر آنا له‌یین کی اوشاق‌لارینا اَیه چیخیر، سیزینگ آراینزدا مُلایم ایدیک. 8بیزیم علاقه‌میز سیزه ائله چوخ ایدی کی بیز آماده ایدیک تا نه فقط تارئنینگ اینجیلینی بئلَینزه ائتیشتیرَک بلکی تا اؤز جانیمیزی ده سیزینگ یولونزا وئرَک. بو خاطره کی سیز بیزیم ایچی چوخ عَزیز اولموشدونز.
9چونکی کاکالار، بیزیم سزاواریمیز و زَحمتیمیز یادینزدا دیر، بیز گئجه گؤندوز ایش گؤردوک تا بلکم اوندا کی تارئنینگ اینجیلینی بئلَینزه اعلام ائدیرَک، سیزینگ هئچ بیرینزه یوک اولمایاک.
10سیز شاهدَینز و تارئ دا شاهد دیر کی بیزیم رووآلیمیز سیز ایماندارلار اینان ناغاد مُقدّس، صالح و عیب‌سیز ایدی. 11چونکی بیلیرَینز کی نه‌یین بیر بووآ له‌یین کی اوشاق‌لاری اینان رووآل ائدیر، 12بیز سیزی آدام باشینا نَصیحت ائدیک و دلگرم‌لیگ وئردیک و بئلَینزه تاپشیردیک کی بیر رَقم رووآل ائدَینز کی تارئ شآنیندا اولا، ائله او تارئ کی سیزی اؤز پادشاهلیگی و شوکتی ایچینه چاغیریر.
13بیز ده دائم تارئ‌یی بونونگ ایچی شُکر ائدیرَک کی اوندا کی تارئ کلامینی قبول ائدینز، ائله او کلام کی بیزدَن ائشیتدینز، بو کلامی بَشر کلامی له‌یین قبول ائدمه‌دینز بلکی اونو تارئ کلامی له‌یین قبول ائدینز، کی گرچکدَن ده وار؛ ائله او کلام کی سیز ایماندارلاردا ایش گؤرور. 14چونکی کاکالار، سیز تارئنینگ یهودیه‌ده‌کی کلیسالاریندان کی مَسیح عیسادا دیرلار سَرمشق توتدینز. بو خاطره کی سیز اؤز هَموطن‌لَرینزدَن ائله او جور و جفالاری چکدینز کی اوللار یهودی‌لاردان چکدیلَر، 15ائله او یهودی‌لاردان کی هم رَب عیسایی اؤلدوردولَر، هم پیغمبرلَری، و بیزی ده سالدیلار یازّیا. اوللار تارئ‌یی خُشنود ائدمئیرلَر و بوتون بَشر اینن ضدّ ائدیرلَر 16و قؤیمئیرلار بیز، غیری یهودی‌لار اینن دانیشاک تا نجات توتالّار. بئله، همیشه‌کی له‌یین اؤز گُناه‌لاری‌‌نینگ پیمانه‌‌‌سینی دؤلدوریرلار. آما آخیردان تارئنینگ غَضّبی باش‌لارینا گلمیش.
17آما کاکالار، بو سَبریه کی بیر آز مُدّت ایچی سیزدن آرالی دؤشدوک، اَلبت جسمده نه اؤرکده، چوخ آرتیق شوق و ذوق اینان تالاش ائدیک تا سیزینگ ایزینزی گؤره‌ک. 18بو خاطره کی سئیردیک گلَک یانینزا - منیم اؤزوم پولُس، نئچه دفعه تالاش ائدیم - آما شیطان بیزه مانع اولدو. 19چونکی بیزیم امیدیمیز یا شادلیگیمیز یا فَخر تاجیمیز رَبّیمیز عیسا حُضوریندا اوندا کی گلیر نه دیر؟ بئیه سیز ده‌ییلَینز؟ 20چونکی سیز بیزیم شوکتیمیز و شادلیگیمیزَینز.
@ 2024 Korpu Company