اِنجیل مَرقُس 1

یحیی تعمید دهندِه راه رِه آمادِه کانه

1عیسی یه مسیح، خُدایِ ریکایِ خَبَرِ خوش اینجور شِروع بونه.

2اِشعیایِ پیغمبرِ کِتابِ دِلِه بَنویشته هَبا:

«اَسِه مَن می قاصِدِ تی جی پیشتَر روانه کانَم،

که تی راه رِه آمادِه کانه؛

3یِنَفَر صَحرایِ دِلِه داد زَنِه:

”خُداوَندِ راه رِه آمادِه هَکُنید!

اونه راهان رِه هموار هَکُنید.“‌»

4پس یحیی تعمید دهنده صَحرای دله ظاهِر هَبا، اون مَردُمِ غُسلِ تعمید دَنِه با و اعلام کانِبا شیمی گُناهانِ آمُرزِشِ وَسین توبه هَکُنید و تعمید هَگیرین. 5تمام یَهودیِه منطقِه مَردُم و تمام اورشلیمِ مَردُم یحییِ وَرجه شونه بان و خودِشانِه گُناهانِ اِعتراف کانه بان و اُردُنِ روخِانه دِله اونه جی تَعمید گیرنه بان. 6یحیی یه لِواس شُتِر پَشم جی با و چَرمی قِیش خودشه کَمَر دَبِسّنِه با، وَ واش ووزی و صَحرایِی عَسَل خارنِه با. 7اون موعظه کانِبا و گونه با: «بَعدِ مَن، یِنَفَر هَنه که می جی قَویتَرِ و مَن حتّی لایِق نییَم دُلّا هَبوُم و اونه چَمیشِ بَندِ واز هَکُنَم. 8مَن شِمِره اُویه هَمرَه تَعمید هَدَم، وَلی اون شِمِره روح القُدُسِ هَمرَه تَعمید دَنه.»

عیسی یِه تَعمید

9اون روزان، عیسی ناصِره یه شَهرِ جی که جَلیلِ مَنطقه یه دِلِه با بوما و اُردُنِ روخانه دلِه یَحیی یِه جی تَعمید بِیته. 10وَختی عیسی اویه جی دِرگا بوما، دَرجا بَدییَه آسِمان واز هَبا و خُدایِ روح ایتا کَفتر مِثان اونه سَر جیر هَنِه. 11وَ ایتا صِدا آسِمانِ جی بوما که: «تو می عزیزِ ریکائی و مَن تی جی راضییَم.»

عیسی آزمون

12خدایِ روح دَرجا عیسی رِه صَحرایِ دِله بَبِرده. 13عیسی چِهل روز صَحرایِ دِلِه دَبا و شِیطان اونه آزمون کانِبا. اون وَحشی حِیوانانِ هَمرَه دَبا و فِرشتِگان اونه خِدمَت کانه بان.

عیسی خودشه خِدمَتِ شروع کانه

14بعدِ اینکه یَحیی دَسگیر هَبا عیسی جَلیلِ منطقه بَشَه. اون خُدایِ خَبَرِ خوش مُژدِه دَنِه با 15و گونه با: «اونه وَخت بَرِسییَه و خُدایِ پادشاهی نَزّیکه. توبِه هَکُنید و این خَبَرِ خوش ایمان بیارین.»

عیسی اوَّلین شاگِردان

16وَختی عیسی جَلیلِ دَریا کِنارِ جی رَد بونِه با، شَمعون و اونه اَداش آندریاسِ بَدییَه که دَبان اُویِه دِلِه سالی تُووادَن، چون اوشان ماهیگیر بان. 17عیسی اوشانه باَگوته: «می دُمّال بیئِین و مَن شِمِره مَردُم صَیّاد کانَم.» 18اوشان دَرجا خودِشانِ سالی شان رِه بَنَن و عیسی یِه دُمّال رادَکِتَن. 19عیسی وَختی یِکَم پیشتَر بَشَه، یعقوب و اونه اَداش یوحنا که زِبِدی یه ریکاشان بان رِه بَدییَه. اوشان خودِشانِه لوتکایِ دِلِه دَبان خودِشانِ سالی شان رِه آماده هَکونَن. 20عیسی دَرجا اوشانه دُخوانِسِّه اوشان هَم خودِشانِه پیَر زِبِدی رِه کارگَرانِ هَمرَه لوتکایِ دِلِه تنها بَنَن و اونه دُمّال رادَکِتَن.

عیسی ایتا مَردَای که پَلیدِ روح داشتِه رِه شَفا دَنه

21اوشان به کَفَرناحومِ شهربَشَن. وَختی مُقَدَّس شَنبِه بَرِسییَه، عیسی دَرجا یَهودیِانِ عِبادتگاه دِلِه بَشَه و تعلیم هَدَئنِ شروع هَکورده. 22مَردُم عیسیِ یِه تعلیم هَدَئنِ جی بُهت هَکُردَن، چون اون توراتِ مُعَلِّمانِ مِثان تعلیم نَدَنِه با، بلکه یِنَفَرِ مِثان تعلیم دَنِه با که قُدرَت و اختیار دارِه. 23همون موقه، اوشانه عِبادَتگاه دِلِه ایتا مَردای دَبا که پلیدِ روح داشتِه. اون داد بَزَه: 24«اِی عیسی یِه ناصری، اَمی هَمرَه چیکار داری؟ بُمَیی اَمَرِه نابود هَکُنی؟ دانَم کی هیسی! تو اون خُدایِ قُدّوسی!» 25وَلی عیسی پلیدِ روحِ زَمتُل بَزَه و باَگوته: «ساکِت هَبو و اونه جی دِرگا بیِه!» 26ایما پَلیدِ روح اون مَردَای رِه بَدجور تِکان هَدَه و نَعرِه هَمرَه اونه جی دِرگا بوما. 27تمام مَردُم جوری تَعَجُب هَکُردهِ بان که هَمدیگَرِ جی پُرسِنهِ بان: «این دِ چیِه؟ ایتا جدیدِ تعلیم قُدرَت و اختیارِ هَمرَه! اون حتّی پَلیدِ ارواح رِه هَم دَستور دَنه و اوشان اونه جی اطاعَت کانَن.» 28پس خِیلی نُگذَشتِه که عیسی یِه آوازِه تمام جَلیلِ مَنطقه دِلِه دَپیتِه.

عیسی خِیلیان رِه شَفا دَنه

29عیسی تا یَهودیِانِ عبادَتگاهِ جی دِرگا بوما، درجا یعقوب و یوحنایِ هَمرَه، شَمعون و آندریاس سِرِه بَشَه. 30شَمعونِ زَن مآر تَوْ داشتِه و لایِ دِلِه خاته با. اوشان دَرجا عیسی رِه اونه حالِ جی باخَبَر هَکُردَن. 31عیسی اون زِنایِ سَرِ وَر بَشَه و اونه دَسِ بِیته و اونه وَرِساندِه. اونه تَوْ قطع هَبا و اوشانه جی پَذیرایی هَکُردِه.

32نِمایِ سَر، بعدِ اینکه آفتو غُروب هَکُردِه، مَردُم تمام مَریضان و آلبَزِه شان رِه عیسی یِه وَرجه بیاردِن. 33شهرِتمام مردم، اونِ سِرِه یه دَرِ پیش جَم هَبا بان! 34عیسی خِیلیان که جور وا جور مریضی داشتِن رِه، شَفا هَدَه و خیلی آلِشان رِه هم آلبَزِه شانِ جی دِرگا هَکُردِه. اون نُذاشته آلِشان هیچ گَبی بَزِنِن، چون عیسی رِه اِشناسِنِه بان.

عیسی یِه تعلیم جلیلِ دِلِه

35صُبِ سَر که هَلَه هَوا تاریک با، عیسی وَرِسَه و سِرِه یه جی دِرگا بَشَه. اون ایتا خَلوتِ جا بَشَه و اوجِه دُعا هَکُردِه. 36شَمعون و اونه هَمراهان عیسیِ یِه دُمّال گَردِنِه بان. 37وَختی عیسی رِه پیداهَکُردَن، اونه باگوتَن: «هَمِه تی دُمّال گَردِنِن!» 38عیسی اوشانه باَگوته: «بیئِین این دور و وَر دِهاتانِ دِلِه بیشیم تا اوجِه هَم تعلیم هَدَم، چون اینِه وَسین بومَم.» 39پس عیسی رادَکِته و تمام جَلیلِ مَنطقه یه دِلِه بَشَه. اون اوشانه عبادتگاهانِ دِلِه تعلیم دَنِه با و آلِشانه دِرگا کانِبا.

عیسی ایتا جُذامی مَردَای رِه شَفا دَنه

40ایتا جُذامی مَردَای عیسی یه وَر بوما، زانو بَزَه و آجِز نالِه یه هَمرَه باَگوته: «اَگه بِخوائی، تانی مَرِه شَفا هَدی.» 41عیسیِ یِه دِل اون مَردَای وَسین بَسوتِه و خودشه دَسِ دِراز هَکُردِه، اونه سَر دَس بَنَه و باَگوته: «خَنَم، شَفا هَگیر!» 42دَرجا، اونه جُذام خوُب هَبا و شَفا بِیته. 43عیسی اون مَردَای رِه دَرجا مُرخَص هَکُردِه و اونه سِفارِش هَکُردِه 44و باَگوته: «تی حَواس دَبو این جَریانِ هیچ کَسِ وَر نَگویی؛ بلکه بوشو و تِرِه مَعبَدِ کاهِنِ نِشان هَدِه و تیِ شَفای خاطِری، قُربانی ایی که موسی دَستور هَدَه با رِه، پیشکَش هَکُن تا اوشانه ثابِت هَبو که تو شَفا بِیتی.» 45وَلی اون مَردَای وقتی دِرگا بَشَه، هَمه جا این جَریانِ گَبِ بَزَه و اونه خَبَرِ پَخش هَکُردِه. اینِه وَسین عیسی دِ نَتَّنِسِّه عَلَنی شَهرِ دِلِه بیه، بلکه شهر دِرگا خَلوَتِ جایِ دِلِه ماندِنه با. وَ مَردُم هر طَرَفِ جی عیسی یِه وَرجه هَنه بان.

Currently Selected:

اِنجیل مَرقُس 1: GMB

Highlight

Copy