اِنجیلِ لوقا 21

ایتا بیوِه زِنایِ هَدیِه

1عیسی خودِشه دورِوَرِ بِیشییِه و پولدارانی رِه بَدییِه که خودِشانِه هَدایا رِه مَعبدِ صِندوخِ دِلِه تووادِنِه بان. 2اوجِه ایتا فَقیرِ بیوِه زِنا رِه بَدییِه که دو قِران صِندوخِ دِلِه تووادَه 3عیسی باگوته: «راس راسی شِمِره گُونَم، این فَقیرِ بیوِه زِنا تمام اوشانه جی بیشتر هَدَه. 4چون تمام اوشان خودِشانِه مالِ زیادی یه جی هَدَن، وَلی این فَقیرِ زِنا تمام خودشه روزی رِه هَدَه.»

عیسی مَعبدِ خَرابی رِه پیشگویی کانه

5بَعضیان گَتِه مَعبَدِ گَبِ زَنه بان و قَشنگِ سَنگ و هَدایایِ جی که اونه هَمرَه تَزئین هَبا با تَعریف کانه بان، عیسی باگوته: 6«روزی رَسِنه تمام این چیزانِی که دینین، فور هَنِه و سَنگ، سَنگِ سَر نُماندِنِه.»

7اوشان بَپُرسیَن: «اُسّا، این اتّفاق كِی دَکِنه و اونه نَزدیک هَبوسَّنِ نِشانه چیِه؟» 8عیسی باگوته: «مُواظِب هَبین که گُمراه نَبین، چون خِیلیان می اِسمِ هَمرَه هَنِن اِدّعا کانَن: ”مَن همون مَسیحَم“ و گونَن ”دُنیا به آخَر بَرِسییَه.“ اوشانه جی پیروی نَکُنید.

9«وَختی جَنگها و جِدال های خَبَرِ اِشنَوِنید، نَتِرسین. چون بایِسّی اَوَّل این چیزان اتّفاق دَکِه، وَلی دُنیا دَرجا به آخَر نَرِسِنِه.» 10ایما اوشانه باگوته: «قومها و مَملِکَتها هَمدیگَر عَلیه جَنگ کانَن. 11گَتِه زِلزِلِه ها و قَحطی و طاعون خِیلی جاهان هَنه و اتفاقات وحشتناک دَکِنِه و آسِمانهِ دِلِه عجیب و غریب چیزان ظاهر بونه.

12«وَلی پِیش از این اتّفاق، شِمِره گیرنَن، اَذیَت کانَن و مُحاکِمه یه وَسین عبادتگاهِ دِلِه بَرنِن و شِمِره زِندانِ دِلِه تووادِنَن. می اِسمِ خاطِری شِمِره پادِشاهان و فرماندارانِ وَرجه بَرنِن 13وَلی این فُرصَتی بونه تا بَتَّنین شَهادت هَدین. 14اینه شیمی خاطِر بِدارین که پیش پیش دِلواپَس نَبین چطور شیمی جی دِفاع هَکُنید. 15چون مَن شِمِره کَلام و حِکمَتی دَنَم که هیچ کُدام از شِیمی دُشمَنان نَتَّنَن شیمی جَوابِ هَدِن و شِیمی پَس بَربییَن. 16حتّی شِیمی پیَر و مآر و اَداشان و فک و فامیلِان و شِیمی رَفیقِان شِمِره دُشمَنِ دَس تَسلیم کانَن و شیمی جی بَعضیان رِه کُشِنِن. 17تمام مَردُم می اِسمِ خاطِری شیمی جی بیزار بونِن. 18وَلی ایتا مو هَم شیمی سَرِ جی کَم نَبونه. 19شیمی تَحَمُلِ هَمرَه، شیمی جان نِجات دَنید.

20«وَختی بَدییَین دُشمَن لَشگَر، اورشَلیمِ دورِه هَکُردِه، بِدانید اونه نابودی نَزّیکِه. 21اونوَخت اوشانیکه یَهودیِه دِلِه دَرِن کوهِ سَمت دَربوشون و اوشانیکه شَهرِ دِلِه دَرِن شهرِ جی دِرگا بوشون، وَ اوشانیکه دَشت و صَحرایِ دِلِه دَرِن شَهرِ دِلِه نییَن. 22چون اون روزان مُکافاتِ روزِ، که اونه دِله هر چی بَنویشتِه هَبا به اَنجام رَسِنه. 23وای بِحالِ زِناکانی که شِکَمدارَن و مآرانی که خودِشانِه وَچِه رِه اون روزان دِلِه شیر دَنِن! چون گَتِ مُصیبَتی این سَرزمینِ دِلِه اتّفاق دَکِنه و خُدایِ غَضَب این قومِ دامَنگیر بونه. 24اوشانه شَمشیر هَمرَه کُشِنِن و اَسیر کانَن و ایتا دیگه مِلکِ دِلِه تَبعید کانَن و اورشلیم هَم غیرِ یَهودیِانِ دَس دَکِنه و لَگَد دَموج بونه تا موقه ایی که غیرِ یَهودیانِ دورِه تُمام هَبو.

25«خورشید و ماه و سِتارِه شانه دِلِه نِشانه هایی ظاهِر بونه. زَمینِ سَرِ مَردُم دَریایِ کولاکِ جی پَریشان بونِن. 26مَردُم اونچه یه تَرسِ جی که خَنِه دُنیایِ سَر بیه، بیهوش بونَن، چون آسِمانِ قُوَّتان به لَرزِه دَکِنه. 27ایما انسانِ ریکا رِه دینَن که قُوَّت و گَتِه جَلالِ هَمرَه اَبرِ دِلِه هَنِه. 28وَختی این اِتِّفاقان دَکِنه، راس بییَسید و شیمی سَرِ بالا هَگیرین، چونکه شیمی آزادی نَزّیکِه!»

اَنجیل دار جی دَرس بِیتَن

29عیسی این مَثَلِ اوشانه وَسین بیاردِه و باگوته: «اَنجیل دار و تمام دارِشان رِه بِیشین. 30وَختی وَلگ دَنِن تانید بِینین و بِفَهمین تابِسّان نَزّیکِه. 31اینه وَسّین، وَختی دینین این چیزان اتّفاق دَکِنه، فَهمِنِید خُدایِ پادشاهی نَزّیکِه. 32راس راسی شِمِره گونَم، تا تمام ایشان اتّفاقان دَنِکه این نسل از بِین نَشونِه. 33آسِمان و زَمین از بِین شونِن، وَلی می گَب هیچ وَخت از بِین نَشونِه.

34«هوشیارهَبین، نَکُنِه عیش و نوش و مَسّی و زندگی یِه نِگَرانی شِیمی دِلِ سَخت هَکونه و اون روز ایتا دامِ مَثان یِدَفِه شِمِره غافلگیر هَکونه. 35چون این اتّفاق تمام دُنیایِ مَردُمانِ سَر هَنِه. 36پَس هَمَش مُواظِب هَبین و دُعا هَکُنید تا بِتَّنید تمام این چیزانِ جی که خِیلی زود اتّفاق دَکِنه، دَر اَمان دَبین و انسانِ ریکایِ وَرجه بییَسین.»

37عیسی هَر روز یَهودیانِ عبادَتگاهِ دِلِه تَعلیم دَنِه با و هَر شُو شَهرِ جی دِرگا شونه با و زِیتونِ کوه سَر شُو رِه صُب کانِبا. 38صُبِ سَر مَردُم اونِه گَبِ بِشنَوِسَّنِ وَسین مَعبَدِ دِلِه جَمع بونه بان.

Currently Selected:

اِنجیلِ لوقا 21: GMB

Highlight

Copy