اِنجیلِ لوقا 19
19
عیسی و زَكّای خَراجگیر
1عیسی اَریحایِ شهر دِلِه بَشَه و شَهرِ جی دَبا رَد هَبو. 2اوجِه ایتا پولدارِ مَردَای دَبا که اونه اِسم زَکّا با، اون خَراجگیرانِ رَئیس با. 3زَکّا خَسِّه بِینه عیسی کیِه، وَلی چون اون پاچ مَردَای با و اِزدحام زیاد با نَتَّنِسِّه. 4اینه وَسین، پِیش پِیش دُو هَکُردِه و ایتا پِلَت دارِ سَر جآر بَشَه تا عیسی رِه بِینه، چون عیسی اوجِه یه جی رَد بونِه با. 5وَختی عیسی اوجِه بَرِسیِیَه، جآرِ بِیشییِه و اونه باگوته: «زَكّا، زود جیر بییِه، بایسّی اِمروز تی سِرِه بییَسَم.» 6زَکّا دَرجا جیر بوما و خُشحالی یه هَمرَه اونه قَبول هَکُردِه. 7وَختی مَردُم اینه بَدییَن، هَمِه غُرغُر هَمرَه گونهِ بان: «ایتا گُناهکارِ سِرِه مِهمانی بَشَه.» 8وَلی زَكّا خودشه جایِ سَر وَرِسَه و عیسی یه خُداوندِ باگوته: «اِی آقا، اَلآن نِصفِ می اَموالِ فَقیرانِ دَنَم، وَ اگه یِنَفَری جی یِچی به ناحَق بِیته بوم، چهار بَرابَر اونه وَگِرداندِنَم.» 9عیسی باگوته: «اِمروز نِجات این سِرِه یِه دِلِه بوما، چون این مَردَای هم ابراهیمِ پِیغَمبَرِ وَچِئِه. 10چون انسانِ ریکا بوما تا گُم هَبوسِّه رِه واموجه و نِجات هَدِه.»
دَه تا سِکِّه یِه مَثَل
11همون موقه که اوشان این گَبا رِه گوش دَنِه بان، عیسی خودشه گَبِ دُمّال ایتا مَثَل بیاردِه، چون اورشلیمِ نَزیکی دَبا، مَردُم گَمان کانه بان خُدایِ پادشاهِی همون موقه ظاهِر بونه. 12پس باگوته: «ایتا نَجیب زادِه ایتا دور دَسِ مَملِکَت بَشَه تا خودشه وَسین مَقامِ پادشاهِی هَگیره و وَگِرده. 13پس، خودشه دَه تا پاکارانِ دُخوانِسِّه و هر کَدامِ ایتا سِکِّه طلا که سه ماه کارگری دسمُز قَدَر باهَدَه و باَگوته: ”تا می وَگَرِسَّن موقه این پولِ هَمرَه کاسبی هَکُنید.“ 14وَلی اون مَردُمی که قَرار با اوشانه سَلطَنَت هَکونه، اونه جی بیزار بان؛ اوشان اونه دُمّالسَر ایتا نَمایَنده روانه هَکوردَن این پِیغامِ هَمرَه که: ”اَما نَخَنیم این آدَم اَمَرِه سَلطَنَت هَکونه.“ 15با این وجود این مَردَای پادشاهِی مَقامِ رِه بِیته و وَگِرِسِّه، ایما اون پاکارانِی که اوشانه سِکِّه هَدَه با رِه دُخوانِسِّه تا بِفَهمِه هر کُدام چَنّی سود هَکُردَن. 16اوَّلی بوما و باگوته ”آقا، تی سِکِّه دَه تا سِکِّه یه دیگه سود بیاردِه.“ 17اونه باَگوته: ”آفَرین، اِی خُجیرِ پاکار! چون کَمِ چی یه دِلِه اَمین بِیی، دَه تا شَهرِ حکومَتِ تِرِه دَنَم.“ 18دُوّمی بوما و باگوته ”آقا، تی سِکِّه پنج تا سِکِّه یه دیگه سود بیاردِه.“ 19اونه هَم باَگوته: ”پنج تا شَهرِ حُکومَت هَکُن.“ 20ایما سِوّمی بوما و باگوته ”آقا، این هَم تی سِکِّه! اونِه ایتا دَسمالِ دِلِه دَپیتِم و بِداشتِم. 21چون تی جی تَرسِنِه بام، چون ایتا سَختگیرِ مَردَای هیسی. اونچه که نُزاشتی رِه گیرنی، وَ اونچه که نِکاشتی رِه دِرُو کانی.“ 22اَرباب اونه باگوته: ”اِی بَدِ پاکار، طِبقِ تی باگوته تِرِه مَحکوم کانَم. تو که دانِسّی مَن سَختگیرِ مَردای هیسَم، اونچه که نُزاشتَم رِه گیرنَم و اونچه که نِکاشتِم رِه دِرُو کانَم، 23چرا می پولِ صَرّافانِ نَدَیی تا وَختی وَگِردِنَم اونِه سودِ هَمرَه پَس هَگیرَم؟“ 24پس اوشانیکه اوجِه دَبان رِه باگوته: ”سِکِّه رِه اونه جی هَگیرین و به اونیکه دَه تا سِکِّه داره، هَدین.“ 25اونه باَگوتَن: ”آقا، اون که خودش دَه تا سِکِّه داره!“ 26اون مَردَای باگوته: ”شِمِرِه گونَم هر کی که دَاره، اونه بیشتر هَدهَ بونه، وَ اونیکه نِدارِه، حتّی هَمونی هم که دَاره اونه جی بِیته بونه. 27آسِه اون دُشمَنان که نَخَسَّن اوشانه سَلطَنت هَکُنَم رِه ایجه بیارین و اوشانه می جِلو بَکوشین.“»
عیسی اورشلیمِ دِلِه شونِه
28بعد از این گَبا، عیسی مَردُمِ جی جلوتر اورشلیمِ سَمت رادَکِتِه.
29وَختی بیتفاجی و بیتعَنْیایِ آبادی یه نَزیکی که زیتونِ کوه سَر دَبا بَرِسییَه، دو نَفَر از خودشه شاگِردانِ روانه هَکوردِه و باگوته: 30«به اون دِهاتی که شِیمی پِیش دَرِه، بیشین. وَختی دِلِه بَشَین، ایتا کُرِّه اُلاغ رِه دَبِسِّه پیدا کانید که تا اَلآن هیچکَس اونه سَر سَوار نَبا. اونِه واز هَکُنید و ایجه بیارین. 31اَگه كَسی شیمی جی بَپُرسیِه: ”چرا اونِه واز کانید؟“ باگوید: ”خُداوَند اونِه لازم داره» 32اون دو نَفر بَشَن و هَمِه چیرِه هَمونجور كه عیسی اوشانه باگوته با پیداهَکُردَن. 33وَختی کُرِّه اُلاغ رِه واز کانه بان، اونه صاحِبان اوشانه باگوتَن: «چِرا کُرِّه اُلاغ رِه واز کانید؟» 34اوشان باگوتَن: «خداوند اونِه اِحتیاج داره.» 35اوشان کُرِّه اُلاغ رِه عیسی یه وَرجه بیاردِن. ایما خودِشانِه قَوا شانه اونه سَر تووادَن و عیسی رِه اونه سَر بِنیشاندِن. 36هَمینجور كه عیسی شونه با، مَردُم خودِشانِه قَوا شانِه رایِسَر پَهن کانه بان. 37وَختی زیتونِ کوه سَراجیری وَر بَرِسییَه، تمام شاگِردان هَمِه خُشحالی یِه هَمرَه خُدا رِه بخاطِر مُعجِزاتی که اونه جی بَدیه بان شُکر کانه بان 38و گونه بان:
«موبارکِ پادشاهِی که خُداوند اِسم همرَه هَنِه!
صُلح و سَلامتی آسِمانِ دِلِه و جَلال آسِمانِ عَرشِ دِلِه!»
39عُلَمایِ فِرقِه فَریسی جی بعضیان جَماعتِ میَن عیسی رِه باگوتَن: «اُسّا، تیِ شاگِردانِ ساکِت هَکُن!» 40عیسی اوشانه باگوته: «شِمِره گونَم اگه ایشان ساکِت هَبون، این سَنگِشانِ داد دَر هَنه!»
41وَختی عیسی اورشلیمِ نَزدیک هَبا و شَهرِ بَدییَه، بِرمِه هَکُردِه 42و باگوته: «كاش تو هم اِمروز فَهمِنِه بِی چی تی وَسین صُلح و سَلامتی هارنه. وَلی حیف که اَلآن ایشان تی چِشمِ جی پِنهانِ. 43روزایی رَسِنه تی دُشمَنان تی دور و وَرِه گیرنَن وتِرِه مُحاصِرِه کانَن و هر طَرف جی تِره فِشار هارنَن 44و تو و تی وَچِه هان رِه تی زَمینِ دِلِه به خاک و خون کَشِنَن. وَ سَنگ سَنگِ سَر نُماندِنِه، چون موقه ایی که خُداوند تی کُمَکِ وَسِّین بوما با، اونه جی غافِل بُمانِسّی.»
عیسی مَعبدِ تمیز کانه
45ایما عیسی مَعبَدِ دِلِه بَشَه و شروع به دِرگا هَکُردَنِ اوشانی هَکُردِه که اوجِه کاسبی کانِه بان، 46اوشانه باگوته: «نِوِشتِه های مُقَدَّسِ دِلِه بَنویشتِه هَبا ”می سِرِه عِبادَتِ جائِه،“ وَلی شُما اونِه ’دُزِّلانه‘ هَکُردین.» 47عیسی هر روز مَعبَدِ دِلِه تَعلیم دَنه با. مَعبَدِ گَتِه کاهِنان و توراتِ مُعَلِمین و قومِ رَئیسان اونه بَکوشتَن دُمّال دَبان، 48وَلی خودِشانِه کارِ وَسین هیچ راهی نَتَّنِسَّن پیدا هَکُنَن، چونکه تمام مَردُم عاشِقِ اونه گَب زَدَن بان.
Currently Selected:
اِنجیلِ لوقا 19: GMB
Highlight
Share
Compare
Copy
Want to have your highlights saved across all your devices? Sign up or sign in
@ 2024 Korpu Company
