اوّلین نامه قُرِنتیان وَسین 16
16
هدایا مقدسین وَسین
1اَسِه هدایای جَم هَکُردَنِ بارِه، مُقدسینِ وَسین: شما هَم اونچه که غلاطیِه یه کلیساها رِه باگوتَم، انجام هَدین. 2هر هفته اوَّلین روز، شیمی جی هر کُدامِ به نسبت شیمی درآمدِ، یِچّی کِنار بَنه، جمع هَکونه، تا اون موقِه که شِیمی ور هَنَم، لازم نَبوُ هدایا جَم هَکنین. 3وَختی بومَم، اون آدَمایی که شُما اوشانه اطمینان دارین رِه معرفی نامِه هایی دَنَم و اوشانه شِیمی هَدایای هَمرَه به اورشلیمِ شهر روانه کانَم. 4اَگِه اینجور صَلاح هَبو که خودَم هَم بوشوم، اون موقِه اوشان مَرِه هَمراهی کانَن.
نَخشه ها سفر وَسین
5بعدِ اینکه مقدونیه یه منطقه یه جی بُگذَشتَم شِیمی وَر هَنَم، چون مقدونیه یه جی رَد بونَم. 6شاید یه مدت شِیمی وَرجه بمانَم، و یا حتی تمام زِمِسّان شِیمی هَمرَه دَبوم، تا هر کوجه که شونَم مَرِه می سفَرِه دِلِه کُمک هَکُنید. 7چون اَلآن نَخَنَم راهِ دِلِه شِمِرِه بِینَم؛ بلکه اُمید دارَمِ، اگه خداوند بِخواد، چن وَقتی شِیمی وَر دَبوم. 8وَلی تا پِنتیکاستِ عید اَفِسُسِ شهرِ دِلِه ماندِنَم. 9چون ایتا گَتِه دَر، خِدمتِ وَسین مَرِه واز هَبا، که خیلی فایده داره، ودشمنان هم زیادِن.
10وقتی تیموتائوس بوماَ، اونه هَمرَه جوری رفتار هَکُنید که شیمی وَرجه هیچ نگرانی نِداشتِه بو. چون اون هَم می مِثان خُداوندِ کارِ انجام دَنِه؛ 11پَس کسی اونه کوچِک نِشمارِه. اونه سلامتی یه هَمرَه سَفرِ وَسین راهی هَکُنید تا می وَرجه وَگِرده؛ چون مَن و اَداشان اونه منتظِریم.
آخرین نصیحتها
12اَسِه اَمیی اَداش آپولُسِ بارِه، خیلی اونه جی بِخَسَّم که بَقیه اَداشانِ هَمرَه شیمی وَرجه بیه، وَلی اصلاً راضی نَبا که اَلآن بیه، هر وَخت فُرصَت هَکونِه، هَنهِ.
13هوشیار هَبین؛ ایمان دِلِه پایدار بُمانید؛ جوانمرد و رَسدار هَبین. 14تمام شیمی کاران محبتِ هَمرَه هَبو.
15دانید که اِستِفاناسِ خانوادِه اوَّلین کَسایی بان که اَخائیه منطقه یه دِلِه ایمان بیاردِن، وَ اوشان خودِشانِ رِه مُقَدَسین خِدمتِ وَسین وقف هَکُردَن. اِی اَداشان، شیمی جی خَواهِش کانَم 16اینجور آدمانِ مطیع هَبین و هَمینجور هر کَسِ دیگَرِ مُطیع هَبین که این خِدمَت دِلِه همکاری کانه و زَحمَت کَشِنِه. 17اِستِفاناس، فورتوناتوس و اَخائیکوس بموئَنِ جی خوشحال هَبام، چون شِیمی جای خالی رِه پُر هَکُردن. 18چون اوشان می روح و شیمی روح رِه هم تازِه هَکُردَن. اینجور آدَمانِ قَدرِ بِدانید.
سلامها
19آسیایی کلیساهائِشان شِمِرِه سلام رِساندِنَن. آکیلا و پْریسکیلا، و کلیسایی هم که اوشانه سِرِه یه دِلِه برپا بونه، شِمِرِه خُداوَندِ دِلهِ گرمی یه هَمرَه سلام رِساندِنَن. 20تمام اَداشانی که ایجه دَرِن شِمِرِه سلام رِساندِنَن. مُقَدَّس خُوشِ هَمرَه هَمدیگَرِ سلام باگویید.
21مَن، پولُس، می دَس خَطِ هَمرَه این سلامِ شِمِرِه نِویسِنِم.
22لعنت به اونیکه خُداوَندِ دوس نِداره. اَمیی خُداوند، بِیه!
23خُداوند عیسی یه فیض شیمی هَمرَه دَبو.
24می مُحبت مسیحِ عیسی دِلِه شیمی همه هَمرَه دَبو. آمین.
Currently Selected:
اوّلین نامه قُرِنتیان وَسین 16: GMB
Highlight
Copy
Compare
Share
Want to have your highlights saved across all your devices? Sign up or sign in
@ 2024 Korpu Company
