انجیلِ مَتّی 21

وارد وابی‌یَنِ شاهانۀ عیسی وَ اورشلیم

1وختی عیسی وِ شاگِردَلِش وَ اورشلیم نِزِنگ وابی‌یِن وِ رَسییِن وَ دهاتِ بِیت‌فاجی که پِی کُو زیتون بی، عیسی دِتا وَ شاگردَلِشَه بِسی کِه، 2وَشون فرمایش کِه: «بِرِیت وَ دهاتی که دَمِ ریتونِه. هَمیِکِه رَتیت مِنِه دهات، خَری نَه که بِی کِرَه‌ش بَسَه یَه ایجوریت. اونگَلَه واز کِنیت وِ بیاریت طِیم. 3اَر کَسی وَ ایشا گَپی زَه، بِگِیت: "خداوند اونگَلَه لازم دارِه،" وُ وِّ زی اونگَلَه بِسی ایکِنِه.» 4بِی ای کار پیشگوییِ اِشعیایِ پیغمبر وَ اَنجوم رَسی، که گُتَه بی:

5«وَ دویَرِ صَهیون بِگِیت،

"سِی کُ، پادِشات

سُوار وَ خَر وِ کِرَه خَر

بِی کوچِک‌نظمی ایا طِیت."»

6او دِتا شاگرد رَتِن وِ طبقِ اوچیئی که عیسی وَشون گُتَه بی، عمل کِردِن. 7اونگَل خَر وِ کِرَه‌شَه آوُردِن وِ قَبایَلِشونَه وَشون بِسِن وِ عیسی سُوار وابی. 8یِکِلی جمعیت هَم قَبایَلِشونَه پَن کِردِن سَرِ رَه عیسی وِ عِدِه‌ای هم کِلغِه‌یَلِ دارَلَه ایبِرییِن، پَن ایکِردِن مِنِه رَه. 9جمعیتی که نِهِی عیسی ایرَتِن وِ عِدِه‌ای که وَ دِنداش اییومَن، قیرَه ایزَن، ایگُتِن:

«هوشیعانا وَ کِرِ داوود!»

«مبارکِه وِه که وَ نومِ خداوند ایایِه!»

«هوشیعانا مِنِه عرشِ بَرین!»

10وختی عیسی واردِ اورشلیم وابی، تَمومِ شهر وَ شور و شوق اومَه. مردم ایپُرسییِن: «یِه کیَه؟» 11وِ او جماعت جواب ایدان: «یِه عیسِی پیغمبرِه، اهلِ ناصرۀ جلیل!»

عیسی معبدِ خدا نَه تَمیز ایکِنِه

12اوسِه عیسی رَت مِنِه صحنِ معبدِ خدا وِ کَسَلی نَه که وُچِه معامِلَه ایکِردِن، وِر دا وَدَر وِ تَختَلِ صرّافَل وِ بَساطِ کَموتَرفروشَلَه دَمِری کِه 13وُ وَشون فرمایش کِه: «مِنِه کتابَلِ مقدس نوشتَه وابی‌یِه که، "حونِی مِ حونِی دعا خوندَه ایابو،" امّا ایشا وِه نَه "کِرِ رازَنَل" کِردیتِه.»

14مِنِه معبد، کورَل وِ شَلَل اومَن طِیش وِ عیسی اونگَلَه شفا دا. 15امّا وختی کاهنلِ گپو وِ معلملِ تورات کارَلِ عجیبِ عیسی نَه دییِن وِ هم اِشنُفتِن که بَچه‌یَل مِنِه معبد قیرَه ایزَنِن وِ ایگُن: «هوشیعانا وَ کِرِ داوود،» تَش گِرُتِن. 16وَ عیسی گُتِن: «ایشنِفی اینگَل چه ایگُن؟» عیسی وَشون جواب دا: «بَلِه. مَه مِنِه کِتابَلِ مقدس نَخوندیتِه که،

«"حتی بَچه‌یَل وِ شیرخوارَل

وِّ نَه حمد وِ ستایِش ایکِنِن"»

17اوسِه عیسی اونگَلَه نَها وُ وَ شهر زَه وَدَر، وِ رَت وَ دهاتِ بِیت‌عَنیا وِ شُو نَه وُچِه مُند.

خشک وابی‌یَنِ دارِ انجیر

18صبا صُبِش، وختی عیسی اییَرگَشت وَ شهر، گُسنَش وابی. 19هیبِی رَه، دارِ انجیری دی وِ رَت وَ طرفِش، امّا غیرَ بَلگ چیئی دَمِش نَجُس. پَ ری کِه وَ دار وِ گُت: «دَ وَتَه میوه‌ای وَت وَ عمل نیا!» جاوَجا دار خشک وابی. 20شاگردل که وَ دییَنِ ای اتّفاق حیرت‌زَیَه بییِن، وَ عیسی پُرسییِن: «چِطو دار انجیر ایطو زی خشک وابی؟» 21عیسی مِنِه جوابِشون گُت: «وَراسی، وَ ایشا ایگُم، اَر ایمون داشتَه بِیت وِ شک نَکِنیت، نَه تِنا ایتَریت اوچیئی که سی ای دار انجیر اتّفاق اُفتا اَنجوم بِئیت، بلکم اَر وَ ای کُو بِگِیت "وَ جاش کَندَه وابو، وَ دریا وِردایَه وابو،" ایطو ایابو. 22اَر ایمون داشتَه بِیت، هر چیئی نَه بِی ایمون مِنِه دعا درخواس کِنیت، ایجوریت.»

سؤال درموردِ اقتدارِ عیسی

23اوسِه عیسی رَت مِنِه معبدِ خدا وِ مردِمَه تعلیم ایدا. مِنِه ای موقَع، کاهنلِ گَپو وِ شیخَلِ قومِ یهود اومَن طِی عیسی وِ گُتِن: «وَ چه حقی ای کارَلَه ایکِنی؟ چه کسی ای اقتدارَ وَت دایِه؟» 24عیسی مِنِه جوابِشون گُت: «مِ هَم وَ ایشا سئوالی دارُم. اَر جواب دِیت، مِ هَم وَتون ایگُم وَ چه اقتداری ای کارَلَه ایکِنُم. 25تعمیدِ یحیی وَ جانبِ کی بی؟ وَ جانبِ خدا بی یا وَ جانبِ انسان؟» اونگَل بینِ خِشون شُور کِردِن وِ گُتِن: «اَر بِگِیم وَ جانبِ خدا بی، وَمون ایگُ، "پَ سیچه وَش ایمون ناوُردیت؟" 26وِ اَر بِگِیم وَ جانبِ انسان بی، وَ مردم زَلَمون ایرَه، سی‌یِکِه هَمَه یحیی نَه یِه پیغمبر دونِن.» 27پَ وَ عیسی جواب دان: «نُونیم.» عیسی گُت: «مِ هَم وَ ایشا نیگُم بِی چه اقتداری ای کارَلَه ایکِنُم.

مَثَل دِ کُر

28«نظرِ ایشا چِنِه؟» مِردی دِ کُر داشت. رَت طِی یکی وَ کِرَلِش وِ گُت: "رو، اُمرو بِرَه وَ تاکستونُم وِ کار کُ." 29کُر گُت: "نیرَم" امّا بعداً نظَرِش عوض وابی وِ رَت. 30بُو رَت طِی او کِرِ دَش وِ هَموِنَه وَش گُت. کُر جواب دا: "ایرَم، آقا،" امّا نَرَت. 31کویکی وَ او دِ کُر خواسِ بُوشَه وَجا آوُرد؟» شاگِردَل جواب دان: «اَوَلی.» عیسی وَشون گُت: «وراسی، وَ ایشا ایگُم، خَراجگیرَل وِ فاحشه‌یَل نِهِی ایشا وَ پادشاییِ خدا داخل ایابون. 32سی‌یِکِه یحیی اومَه طِیتون وِ ایشا نَه رانَمایی کِه، که چِطو صالح زِندِیی کِنیت امّا وَش ایمون ناوُردیت، امّا خَراجگیرَل وِ فاحشه‌یَل ایمون آوُردِن. وِ ایشا حتی بِی دییَنِ یُو، نظرتون عوض وانَبی وِ وَش ایمون ناوُردیت.

مَثَل باغبونَلِ شرور

33«وَ مَثَلی دَ گوش کِنیت. صاحابِ مِلکی تاکستونی دِرُس کِه وِ دورِشَه دیوار کَشی وِ حوضچه‌ای مِنِش واکَند سی لَه کِردَنِ انگورَل سی شراب وِ برجی هَم بنا کِه سی ناتوری. اوسِه تاکستونَه اجارَه دا وَ چَن باغبون، وِ خُوش رَت وَ سفر. 34وختی موقِی چییَنِ مَصول وابی، غلامَلِشَه بِسی کِه طِی باغبونَل تا بَهرِ خِشَه وَ میوَه بِسونِه. 35امّا باغبونَل غلامَلِ وِّ نَه گِرُتِن، یکی نَه زَن وِ یکیدَه نَه کُشتِن وِ سومی نَه سنگسار کِردِن. 36صاحابِ باغ یِه دَف‌دَه، غلامَلِ بیشتری بِسی کِه طِیشون، امّا باغبونَل بِی اونگَل هم هَموطو رفتار کِردِن. 37عاقبت کِرِ خِشَه بِسی کِه طِی باغبونَل وِ بِی خُوش گُت: "وَ کِرُم حرمت اینِن." 38امّا موقِی که باغبونَل کِرَ دییِن، وَ یَک گُتِن: "یِه وارثِه. بی‌یِیت وِّ نَه بِکِشیم وِ میراثِش این خِمون وابو." 39پَ وِّ نَه گِرُتِن وَ تاکستون وِردان وَدَر وِ کُشتِن. 40بِی ای حساب، وختی صاحابِ تاکستون بیا بِی ای باغبونَل چه ایکِنِه؟» 41شاگِردَل جواب دان: «او مِردَلِ شرورَ بِی بی‌رحمیِ تموم نابود ایکِنِه وِ تاکستونَه وَ باغبونَلی دَ اجارَه اییِه تا بَهرِشَه وَ موقَع وَش بییِن.»

42عیسی وَشون گُت: «مَه تا ایسِه مِنِه کتابَلِ مقدس نَخُوندیتِه که،

"بَردی که معمارَل رَد کِردِن،

بَردِ اصلیِ بنا وابی‌یِه.

خداوند ای کارَ کِردِه

وُ وَ نظرِ ایما عجیب ایا،"

43پَ وَ ایشا ایگُم که پادشاییِ خدا وَ ایشا گِرُتَه ایابو وِ دایَه ایابو وَ قومی که ثَمَرِشَه بییِن. 44[هرکه بییُفته وَ ری او بَرد، خُرد ایابو، وِ اَر او بَرد بییُفته وَ ری کسی، وِّ نَه مِنه یَک خُرد ایکِنِه.]»

45وختی کاهِنَلِ گپو وِ عالِمَلِ فرقۀ فَریسی مَثَلَلِ عیسی نَه اِشنُفتِن، فَمِسِن که درموردِ خِشون گَپ ایزَنِه. 46پَ خواسِن عیسی نَه دَسگیر کِنِن، امّا وَ مردم زَلَشون ایرَت سی‌یِکِه مردم عیسی نَه یِه پیغمبر دونِسِن.

Currently Selected:

انجیلِ مَتّی 21: SLB

Highlight

Copy