انجیلِ مَتّی 11

گَپَلِ عیسی درموردِ یحیِی تعمیددَهندَه

1دِندِی یِکه عیسی ای دستورَلَه وَ او دُوازَه شاگردِش دا، وَ وُچه اُفتا وَ رَه تا مِنِه شهرَلِ دَ تعلیم بییِه وِ موعظَه کِنِه.

2وختی یحیی مِنِه زندان، تعریف کارَلِ مسیحَ اِشنُفت، شاگردَلِ خِشَه بِسی کِه طِیش 3تا وَ عیسی بِپُرسِن: «مَه تِ هَم وِّنی که ایبایِس بیایِه، یا بَندیرِ یِکیدَه بِیم؟» 4عیسی مِنِه جواب گُت: «بِرِیت وِ اوچییَلی که ایبینیت وِ ایشنِفیت سی یحیی تعریف کِنیت، که: 5تییِۀ کورَل بِر ایابو، شَلَل رَه ایرَن، جذامی‌یَل شفا ایگِرِن، کَرَل ایشنِفِن، مُردِه‌یَل زندَه ایابون وُ وَ فقیرَل خَوَرِ خَش اعلام ایابو. 6خَش وَ حالِ کسی که وَم شک نَکِنِه.»

7وختی شاگردَلِ یحیی ایرَتِن، عیسی درموردِ یحیی شروع وَ صُبت کِه وُ وَ جماعت گُت: «سی دییَنِ چه رَتیت وَ بیابون؟ سی دییَنِ نی‌ای که وَ باد ایجُمبِه؟ 8اَر نَه، پَ سی دییَنِ چه رَتیت؟ سی دییَنِ مِردی که جومه‌ای مَلمَل وَرِشِه؟ اونگَلی که جومِه‌یَلِ مَلمَل ایکِنِن وَرِشون مِنِه کاخَلِ پادشایَلِن. 9پَ سی دییَنِ چه رَتیت؟ سی دییَنِ یِه پیغمبر؟ بَلِه، وَ ایشا ایگُم کسی که وَ پیغمبر هم بالاتَرِه. 10سی‌یِکِه وِّ هَموِّنِه که درموردِش مِنِه کتابَلِ مقدس نِوشتَه وابی‌یه:

«"ایسِه رسولِ خِمَه نِهِی تِ بِسی ایکِنُم

که رَتَه سیت آمایَه ایکِنِه.»

11وراسی، وَ ایشا ایگُم، که کسی گَوترَ یحیِی تعمیددَهندَه وَ دِیش زادَه نَوابی‌یِه، امّا کِچِلوترین مِنِه پادشاییِ آسمون وَش گَوتَرِه. 12وَ زمون یحیِی تعمیددَهندَه تا ایسو، پادشاییِ آسمون آزار وِ اذیتَلِ زیادی دییِه وِ آیَمَلِ زوردار وِه نَه وَ زور ایگِرِن. 13تَمومِ پیغمبرَل وِ تورات تا زمون یحیی، وَ چییَلی که باید اتّفاق بییُفته خَوَر دانِه. 14وِ اَر یِنَه قبول داریت، باید بِیونیت یحیی هَمو ایلیا یَه که ایبایِس بیا. 15هرکه گوشِ شنوا دارِه، بِشنِفِه.

16«بِگُم مَردِمونِ ای نَسل مِی چِنِن؟ مِی بَچه‌یَلی یَن که مِنِه بازار ایشینِن وِ هُمبازی‌یَلِ خِشونَه صیا ایکِنِن، ایگُن:

17«"سیتون نی زِیم، نَوَربازییت؛

شَربَه خُوندیم، نَگِریوِسیت."

18سی‌یِکِه یحیی اومَه که نَه ایخَه وِ نَه اینوشی؛ هَمَه ایگُن: "دیو دارِه." 19کِرِ انسان اومَه کِه ایخَرِه وِ اینوشِه؛ ایگُن: "سِیلِش کِنیت، مِردی یَه کِمو وِ عرق خَر، رفیقِ خَراجگیرَل وِ گِناکارَل." امّا دِرِسی هَر حِکمتی نَه نتیجه‌ای که وَ بار ایارِه نِشون اییِه.»

وای وَ حالِ شَهرَلِ توبَه نَکِردَه

20اوسِه عیسی شروع کِه وَ سرزَنشِ شَهرَلی که بِی یِکِه بیشترِ معجزه‌یَلِش مِنِه اونگَل اَنجوم وابی‌یَه بی، امّا توبَه نَکِردَه بییِن. 21«وای وَ حالِت ای خورَزین! وای وَ حالِت ای بِیت‌صِیدا! سی‌یِکِه اَر معجزه‌یَلی که مِنِه ایشا اَنجوم وابی مِنِه شَهرَلِ صور و صیدون ایابی، مردمِ وُچه یِکِلی زیتَر جومِۀ سِه پوشییَه بییِن وِ مِنِه خُل نِشَسَه بییِن وِ توبه کِردَه بییِن. 22امّا وَ ایشا ایگُم که مِنِه روزِ داوری، تحمل مجازات سی شَهرَلِ صور و صیدون آسونتر ایابو، تا سی ایشا. 23وِ تِ ای کفرناحوم، مَه تا وَ فلک سَر اینی؟ نَه، بلکم تا وَ دِلِ جَنَم سرنگون ایابِی. سی‌یِکِه اَر معجزه‌یَلی که مِنِه تِ اَنجوم وابی مِنِه سُدوم اتّفاق اییُفتا، تا وَ اُمرو وَجا ایمُند. 24امّا وَ ایشا ایگُم که مِنِه روز داوری، تحمل مجازات سی شهرِ سُدوم آسونتر ایابو، تا سی تو.»

بی‌یِیت طِی مو

25مِنِه او مُوقَع، عیسی اعلام کِه: «ای بُو، مالکِ آسمون وِ زمین، تِنَه شکر ایکِنُم که ای حقیقَتَه وَ حَکیمَل وِ دونایَل پَنون کِردی‌یِی وُ وَ بَچه‌یَلِ کِچِلو آشکار کِردی‌یِی. 26بَلِه، ای بُو، سی‌یِکِه خواسِ تِ یِه بی. 27بُوم همَه چینَه دایِه وَ دَسُم. هیشکَه کِرَ نیشناسِه غیرَ بُو، وِ هیشکَه بُو نَه نیشناسِه غیرَ کُر، وِ اونگَلی که کُر بِخوا بُو نَه وَشون آشکار ایکِنِه.

28«بی‌یِیت طِی مو، ای تَمومیِ زحمتکَشَل وِ کَسَلی که زِرِ بارَلِ سنگینیت، که مِ وَ ایشا راحتی اییُم. 29جیِ مِنَه بِنیت وَ کولِتون وُ وَ مِ تعلیم بِگِریت، سی‌یِکِه صبور وِ کوچِک‌نظمُم، وُ وَ جونِتون راحتی اییُم. 30سی‌یِکِه جیِ مِ آسونِه وِ بارِ مِ سبک.»

Currently Selected:

انجیلِ مَتّی 11: SLB

Highlight

Copy