انجیلِ لوقا 3

یحیی رَه عیسی نَه آمایَه ایکِنِه

1مِنِه پونزَهِمین سالِ حکومتِ تیبِریوس، امپراتورِ روم، وختی که پُنتیوس پیلاتُس فَرمُندار یهودیَه بی، هیرودیس حاکمِ وِلاتِ جلیل وِ کَکاش فیلیپُس حاکم ایتوریه وِ تراخونیتیس بی وِ لیسانیوس حاکم آبیلینی بی، 2وِ حنّا وِ قیافا هَم کاهِنلِ اعظم بییِن، کلام خدا مِنِه بیابون وَ یحیی، کِر زکریا نازل وابی. 3یحیی ایرَت وَ سرتاسر هیبِی رو اردن وِ سی مردم موعظَه ایکِه که سی آمرزشِ گِنایَلِشون توبه کِنن وِ غُسلِ تعمید بِگِرِن. 4درموردِ یِه مِنِه کتابِ اِشعیایِ پیغمبر اومَیِه که:

«صییِی وِه که مِنِه بیابون قیرَه ایزَنِه،

"رَه خداوندَ آمایَه کِنیت!

رَه‌یَلِ وِّ نَه راس کنیت!

5تَمومِ دَرِه‌یَل پُر

وِ تَمومِ کُویَل وِ تُلَل یِه دَس ایابون؛

رَه‌یَلِ کَج، راس

وِ رَه‌یَلِ چَلی‌کِلوپی، صاف ایابون.

6اوسِه تمومیِ بَشَر نجاتِ خدا نَه ایبینِن."»

7یحیی ری وَ جماعَتَلی که سی غُسلِ تعمید گِرُتن، اییومَن طِیش، ایگُت: «ای افعی زادِه‌یَل، کی وَتون هشتار دا تا وَ غَضَبی که نَهاتونِه، بِدَرِیت؟ 8پَ توبِۀ خِتونَه بِی اعمال وِ رفتاری که ایکِنیت، نِشون بِئیت وِ بِی خِتون نَگِیت که: "جَدِ ایما ابراهیمِه." سی‌یِکِه وَ ایشا ایگُم، خدا ایتَرِه وَ ای بَردَل اولادَلی سی ابراهیم دِرُس کِنِه. 9هَمیسِه تیشَه وَ ریشۀ دارَل نهایَه وابی‌یِه. هر داری که میوۀ خوب نَیِه، بِرییَه وِ مِنِه تَش وِردایَه ایابو.»

10جماعت وَش پُرسییِن: «پَ چه کنیم؟» 11یحیی جواب دا: «وِه که دِتا جومَه دارِه، یِکی شَه بییِه وَ وِه که نیارِه، وِ هرکه غذا دارِه هم هَمی کارَ کِنه.» 12خَراجگیرَلَم اومَن تا تعمید بِگِرِن. اونگَل وَش پُرسییِن: «استاد، ایما چِه کنیم؟» 13یَحیی وَشون گُت: «بیشترَ اوقَه که تعیین وابیِه خراج مَسونیت.» 14سربازَلَم وَش پُرسییِن: «پَ ایما، ایما چِه کنیم؟» وَشون گُت: «وَ زور وَ کسی پیل نسونیت وُ وَ هیشکَه تهمتِ دِرو مَزَنیت وُ وَ حقِ خِتون قانع بِئیت.»

15مردم بِی شوق بَندیرِش بییِن وِ مِنِه دِلِشون فکر ایکِردِن که مَه ایابو یحیی همو مسیحِ موعود بو؟ 16جواب یحیی وَ همۀ اونگَل یِه بی: «مِ ایشا نَه بِی اُو تعمید اییُم، امّا کسی قَویتَر وَ مِ ایایِه که مِ حتی لیاقت نیارُم که بند اُرسی‌یَلِشَه واز کِنُم. وِّ ایشا نَه بِی روح‌القدس وِ تَش تعمید اییِه. 17وِّ اُوسِۀ خِشَه مِنِه دَس دارِه تا خَرمَنِ خِشَه پاک کِنه وِ گندِمَه ذخیرَه کِنه مِنِه امبارِ خُوش، امّا کَه نَه مِنِه تَشی که وَتَه کور نیابو ایسوزَنِه.»

18وَ ای ترتیب یحیی بِی مَهلی نَصیحَتَلِ دَ خَوَرِ خَشِ پادشاییِ خدا نَه وَ مردم اعلام ایکِه. 19امّا سی‌یِکِه هیرودیسِ حاکم، درموردِ زنِ کَکاش هیرودیا، وِ تَمومِ کارَلِ گَندِش، وَ طَرفِ یحیی توبیخ وابی، 20یحیی نَه وِردا وَ زندان وِ ایطو کارِ گَندی وَ کارَلِ گَندِش اضافَه کِه.

غُسلِ تعمید عیسی وِ شجره‌نامِۀ وُّ

21موقِی که مردم هَمَه تعمید ایگِرُتِن وِ عیسی هم تعمید گِرُته بی وِ دعا ایکِه، آسمون واز وابی 22وِ روح‌القدس وَ شکل جسمانی، مِی کموتری نِشَس وَ ریش، وِ صییِی وَ آسمون اومَه که: «تِ کِرِ عزیزِ مِنی! وِ مِ وَت راضی‌یَم!»

23عیسی حدودِ سی سال داشت که خذمت خِشَه شروع کِه. وَ گَمون مردم وِّ کِرِ یوسف بی، وِ یوسف، کِرِ هِلی، 24هِلی کِر مَتّات، مَتّات کر لاوی، لاوی کر مِلکی، مِلکی کر یَنّا، یَنّا کر یوسُف، 25یوسُف کر مَتّاتیا، مَتّاتیا کر عاموس، عاموس کر ناحوم، ناحوم کر حِسلی، حِسلی کر نَجَّی، 26نَجَّی کر مَعَت، مَعَت کر مَتّاتیا، مَتّاتیا کر سِمِعین، سِمِعین کر یُسِک، یُسِک کر یهودا، 27یَهودا کر یوحَنان، یوحَنان کر ریسا، ریسا کر زِروبابِل، زِروبابِل کر شِئَلتیئیل، شِئَلتیئیل کر نیری، 28نیری کر مِلکی، مِلکی کر اَدّی، اَدّی کر قوصام، قوصام کر اِلمادام، اِلمادام کر عیر، 29عیر کر یوشَع، یوشَع کر اِلعازار، اِلعازار کر یوریم، یوریم کر مَتّات، مَتّات کر لاوی، 30لاوی کر شَمعون، شَمعون کر یهودا، یهودا کر یوسُف، یوسُف کر یونام، یونام کر اِلیاقیم، 31اِلیاقیم کر مِلیا، مِلیا کر مِنّا، مِنّا کر مَتّاتا، مَتّاتا کر ناتان، ناتان کر داوود 32داوود کر یَسا، یَسا کرعوبید، عوبید کر بوعَز، بوعَز کر سَلمون، سَلمون کر نَحشون، 33نَحشون کر عَمیناداب، عَمیناداب کر رام، رام کر حِصرون، حِصرون کر فِرِص، فِرِص کر یهودا، 34یهودا کر یعقوب، یعقوب کر اِسحاق، اِسحاق کر ابراهیم، ابراهیم کر تارَح، تارَح کر ناحور، 35ناحور کر سِروج، سِروج کر رِعو، رِعو کر فِلِج، فِلِج کر عِبِر، عِبِر کر شِلَخ، 36شِلَخ کر قینان، قینان کر اَرفَکشاد، اَرفَکشاد کر سام، سام کر نوح، نوح کر لَمِک، 37لَمِک کر مَتوشالَح، مَتوشالَح کر خَنوخ، خَنوخ کر یارِد، یارِد کر مَهَلَلئیل، مَهَلَلئیل کر قینان، 38قینان کر اَنوش، اَنوش کر شِیث، شِیث کر آدم وِ آدم کر خدا بی.

Currently Selected:

انجیلِ لوقا 3: SLB

Highlight

Copy