کارَلِ رسولَل 13

بَرنابا وُ شائول بِسی ایابون

1مِنِه کلیسایی که مِنِه اَنطاکیَه بی، یِه‌پاره‌ای نبی وِ معلم بییِن، وِ مِنِشون: بَرنابا، شمعون که وَش ایگُتِن نیگِر، لوکیوسِ قیرَوانی، مَنائِن که مِی کَکِی هیرودیسِ حاکم بی که بِی یَک گَپو وابی‌یَه بییِن وِ شائول هَم بییِن. 2موقِی که اونگَل مِنِه عبادتِ خداوند وِ روزه بییِن، روح‌القدس گُت: «بَرنابا وِ شائولَ سی مِ جیا کِنیت، سی کاری که اونگَلَه سیش صیا کِردِمِه.» 3اوسِه، بعدَ روزه وِ دعا، دَس نَهان وَ ری او دِتا وِ مَسحِشون کِردِن وِ اونگَلَه رُونۀ سفر کِردِن.

بَرنابا وِ شائول مِنِه قبرس

4وَ ای ترتیب، او دِتا که وَ طرفِ روح‌القدس بِسی وابی‌یَه بییِن، رَتِن وَ سِلوکیَه وُ وَ وُچو وَ رَه دریا رَسییِن وَ قبرس. 5وختی اومَن مِنِه شهرِ سالامیس، مِنِه کنیسه‌یَلِ یهود، کلامِ خدا نَه موعظَه کِردِن. یوحنا معروف وَ مَرقسَ هَم باشون داشتِن تا کِمَکِشون بو.

6وَختی اونگَل سرتاسرِ جزیرَه نَه تا وَ پافُس نَهایَه بییِن زِرِ پا، وُچِه مِردی یهودی وَ نومِ باریَشوع نَه دییِن که جادوگر وِ نبی وَدِرو بی. 7وِّ وَ دوسَلِ «سِرگیوس پولُسِ» فَرمُندار بی. فَرمُندار که مِردِ دونایی بی، بَرنابا وِ شائولَ وَ حضورِش خواس، وِ خواس کلامِ خدا نَه بِشنِفِه. 8امّا عِلوماسِ جادوگر - که معنیِ نومِش عالم بی- وَ ضِدِ اونگَل وَریسا وِ تلاش کِه جلو ایمون آوُردَنِ فَرمُندارَ بِگِرِه. 9مِنِه ای موقَع شائول، که وَش پولُس هَم ایگُتِن، پُر وابی وَ روح‌القدس، وَ جادوگَر تییَه دُت وِ گُت: 10«ای کِرِ اِبلیس، ای دشمنِ هر راسی، ای که پُر وَ کَلَک وِ حیلَه یِی! سیچه وَ کج کِردَنِ رَیَلِ راسِ خداوند دَس نییَگِری؟ 11سِی کُ، دَسِ خداوند وَ ضدِ تِنِه. هَمیسِه کور ایابِی وِ تا مِدَتی دَ نیتَری اَفتو نَه بِوینی.»

هَمو دَقَه، کِرِمِنج وِ تاریکی او جادوگَرَ گِرُت، وِ او مِرد پیت ایخَه وُ وَ دینِ یکی بی که دَسِشَه بِگِرِه وِ بویَرِش. 12وختی فَرمُندار ای جَریانَه دی، ایمون آوُرد، سی‌یِکِه وَ تعلیمی که درموردِ خداوند ایدان حیرت‌زَیَه وابی‌یَه بی.

پولُس وِ بَرنابا مِنِه اَنطاکیۀ پیسیدیَه

13اوسِه پولُس وِ هُمرَیَلِش وَ رَه دریا وَ پافُس رَتِن وَ طرفِ پِرجۀ پامفیلیَه. امّا وُچِه یوحنای معروف وَ مرقس وَشون جیا وابی وُ وَرگَشت وَ اورشلیم. 14اونگَل وَ پِرجَه رَی وابی‌یِن وِ رَسییِن وَ اَنطاکیۀ پیسیدیَه. مِنِه روز شبّات، رَتِن وَ کنیسَه وِ نِشَسِن. 15بعدَ خُوندَنِ تورات وِ کتابَلِ پیغمبَرَل، رَهبَرَلِ کنیسَه سیشون پِیوم بِسی کِردِن وِ گُتِن: «کَکایَل، اَر کلامِ تشویقی سی مردم داریت، بِفَرمِیت بِگِیت.»

16پولُس وِیسا وِ بِی دَس اِشارَه کِه، گُت: «ای مِردَلِ اسرائیلی وِ ای غیرِیَهودی‌یَلِ خداترس، گوش کِنیت! 17خِدِی قومِ اسرائیل، بُویَلِ ایما نَه انتخاب کِه وِ قومِ ایما نَه مِنِه زمونِ غَریبیشون مِنِه مصر سَرفَراز کِه وِ بِی قدرتِ عظیمی اونگَلَه وَ او دیار آوُرد وَدَر، 18وِ نِزِنگِ چل سال باشون مِنِه بیابون مدارا کِه. 19وِّ بعدَ یِکِه او هَف ملتی نَه که مِنِه کنعان بییِن، نابود کِه، زَمینَلِشونَه وَ قومِ خُوش دا وَ میراث. 20تَمومِ اینگَل حدودِ چارصدِ پنجاه سال طول کَشی.»

«دِنداش، تا زمونِ سموئیلِ پِیغمبر، خدا داوَرَلَه وَشون دا. 21اوسِه اونگَل پادشایی خواسِن وِ خدا شائول، کِرِ قِیس، وَ طِیفِی بِنیامینَ وَشون دا، که چل سال سَلطَنت کِه. 22بعدَ وَگِرُتَنِ شائول، داوودَ انتخاب کِه تا پادشاهِ اونگَل وابو، وُ وَش ایطو شهادت دا: "داوود کِرِ یَسا نَه بابِ‌دِلُم جُسُم؛ وِّ خواسِ مِنَه کامل وَجا ایارِه."»

23«وَ نسلِ هَمی مِرد، خدا طبقِ وعدۀ خُوش، نجات دَهَندَه یعنی عیسی نَه سی اسرائیل بِسی کِه. 24نِهِی اومَیَنِ عیسی، یحیی تعمیدِ توبه نَه وَ تَمومِ مردم اسرائیل اعلام کِردَه بی. 25وختی یحیی دورۀ خذمتِ خِشَه تموم ایکِه، گُت: "مِنَه کی دونیت؟ مِ نَه وِّنُم؛ بلکم وِّ بعدَ مِ ایایِه وِ مِ حتی لیاقت نَیارُم بندِ اُرسیشَه واز کِنُم."»

26«ای کَکایَل، ای اولادَلِ ابراهیم، وِ ای غیریَهودی‌یَلِ خداترس که وِیچِنیت! ای پِیومِ نجات سی ایما بِسی وابی‌یِه. 27مردمِ اورشلیم وِ گَپویَلِشون عیسی نَه نَشناختِن وُ وا ای حال بِی محکوم کِردَنِش، گُته‌یَلِ پیغمبَرَلَه که هر روزِ شبّات خُوندَه ایابو، اَنجوم دان. 28اونگَل بِی یِکِه هیچ بونه‌ای سی مجازات کِردَنِش وَ مرگ نَجُسِن، وَ پیلاتُس خواسِن وِّ نَه بِکِشِه. 29وِ وختی تمومِ اوچییَلی نَه که درموردِش نوشتَه وابی‌یَه بی، اَنجوم دان، وِّ نَه وَ صلیب آوُردِن دومِن وِ نَهانِش مِنِه قبر. 30امّا خدا وِّ نَه وَ مُردِه‌یَل زِندَه کِه. 31وِ اونگَلی که باش وَ جلیل اومَیَه بییِن وَ اورشلیم، روزَلِ زیادی وِّ نَه دییِن وِ هَمیسِه هَم طِی قومِ ایما شاهِدَلِ وِّنِن.»

32«ایسو ایما وَ ایشا ای خَوَرِ خَشَه اعلام ایکِنیم که خدا وَ اوچیئی که وَ بُویَلِ ایما وَعدَه دایَه بی، 33بِی زِندَه کِردَنِ عیسی، سی ایما که اولادَلِ وِّنیم وفا کِه. هَموطو که مِنِه مزمورِ دِوُم نوشتَه وابی‌یِه:

"تِ کِرِ مِنی؛

اُمرو، مِ تِنَه مولود کِردِمِه."

34وِ خدا وِّ نَه وَ مُردِه‌یَل زِندَه کِه تا بیشتَرَ یو مِنِه حالت مرگ وِ پیسِسَن مِنِه قبر نَوِیسِه، هَموطو که مِنِه کِتابَلِ مقدس اومَیِه:

"برکتَلِ مقدّس وِ مطمئنی نَه

که وَ داوود وعدَشَه دامِه،

ایبَخشُم وَ ایشا."

35وُ وَ هَمی اساس وَ جِی دَ مِنِه مَزمور اومَیِه کِه:

"تِ نیلی او قدّوسِت

مِنِه قبر بِپیسِه."»

36«داوود بعدَ وِه که وَ ارادۀ خدا مَردِمونِ دورۀ خِشَه خذمت کِه، خُوسی وِ رَت طِی اجدادِش، وِ مِنِه قبر پیسِس. 37امّا او کسی که خدا زِندَه کِه، نَپیسِس.»

38«پَ، ای کَکایَل، بِیونیت آمرزشِ گِنایَلی که وَ واسطۀ هَمی مِرد آمایَه وابی‌یِه، وَ ایشا اعلام ایابو. 39ایسو هرکه ایمون بیارِه، وَ هر چیئی که نَتَرِسِه وَ واسطۀ شریعتِ موسی آزاد وابو، وَ واسطۀ وِّ آزاد ایابو. 40حَواسِتون بو ای نوشتۀ کتابَلِ پیغمبرَل وَ سرِتون نَیایِه که ایگُ:

41"سِیل کِنیت، ای مَخسَرَه‌گَرَل،

حیرت کِنیت وِ هلاک وابِیت،

سی‌یِکِه مِنِه دورۀ ایشا کاری ایکِنُم،

که هَرچَن وِه نَه سیتون تعریف کِنِن

وِه نَه باوَر نیکِنیت."»

42وختی پولُس وِ بَرنابا وَ کنیسَه ایرَتِن وَدَر، مردم وَشون تَمنا کِردِن که شَبّاتِ بعدی هَم درموردِ ای چییَل باشون صُبَت کِنِن. 43بعدَ یِکِه جماعت وَ کنیسَه رَتِن وَدَر، یِکِلی وَ یَهودی‌یَل وِ مردمِ دیندار که وَ یهودیت ری آوُردَه بییِن، وَ دینِ پولُس وِ بَرنابا اُفتان وَ رَه. او دِتا باشون صُبَت کِردِن وِ اونگَلَه تشویق کِردِن تا مِنِه فیضِ خدا پاوَرجا بون.

44شَبّاتِ بعدی، تقریباً، تمومِ مردمِ شهر جَم وابی‌یِن تا کلامِ خداوندَ بِشنِفِن. 45امّا یَهودی‌یَل وختی اِزدحامِ مردمَه دییِن، وَ حَسودی پِکِسِن وِ بِی بی‌حرمتی وَریسان وَ ضدیت بِی گَپَلِ پولُس.

46اوسِه پولُس وِ بَرنابا بِی جرأت گُتِن: «لازم بی کلامِ خدا نِهِی هَمَه سی ایشا گُتَه وابو. امّا سی‌یِکِه وِه نَه رد کِردیت وِ خِتون قضاوت کِردیت که نَه لایقِ حیاتِ ابدی یِیت، پَ ایسِه ایما ایرِیم وَ طرفِ غیریَهودی‌یَل. 47سی‌یِکِه خداوند وَ ایما ایطو امر کِردِه که:

"تِنَه نوری کِردِمِه سی غیریَهودی‌یَل،

تا نجاتَه بِرَسونی وَ چار گوشۀ زمین."»

48وختی غیریَهودی‌یَل یِنَه اِشنُفتِن، شایمون وابی‌یِن وِ شروع کِردِن وَ ستایشِ کلامِ خداوند؛ وِ یِکِلی وَ اونگَلی که سی حیاتِ ابدی انتخاب وابی‌یَه بییِن، ایمون آوُردِن.

49وَ ای ترتیب کلامِ خداوند رَسی وَ سرتاسرِ او منطَقَه. 50امّا یَهودی‌یَل، زَنَلِ متعصب وِ سَرشناسَه وِ هَم مِردَلِ نومدارِ شهرَ وَ شورش واداشتِن وِ اونگَلَه وَ ضدِ پولُس وِ بَرنابا تحریک کِردِن تا عذابِشون بییِن. پَ پولُس وِ بَرنابا نَه وَ او منطَقَه کِردِن وَدَر. 51پولُس وِ بَرنابا هَم وَ نِشونۀ یِکِه غَضَبِ خدا ایا وَ ریشون، گَردِ غِبارِ پایَلِشونَه تَکَنان وَ ری اونگَل وِ رَتِن وَ شهرِ قونیَه. 52شاگردَل پُر وَ شایی وِ پُر وَ روح‌القدس بییِن.

Currently Selected:

کارَلِ رسولَل 13: SLB

Highlight

Copy