نامَه رومِنیا 15

1اَما که کَوی هِم، وظیفَه مُهَه که ضعفِی آدامِی ضعیفیا تحمل بِکنِم و اَزدُمبالَهِ خشنودِنِ خومو نِبِم. 2بِلگی هر یَک از اَما وَ چِی‌یَی خَشی که تِی هُمسادَش اَبِنِه تِی مِ موردا مِ آداما خشنود شاکو، تا باعث بَنای مِ آداما بِبِه. 3اَسِی که مسیح اَزدُمبالَهِ خَشِنِ خوش نِهاد، بلکه هَموناکِه تِی کتاب زَبور داوود نوشتَه بُدِ: «سَرکوفتِی کسِی که شُن تو سَرکوفت زادِ، لِی ما اُفتَه.» 4اَسِی که هرچی که تِی رازِی تیتَه نوشتَه بُدِ، اَسِی اِ نوشتَه بُدِ تا اَسِی اَما درسی بِه، تا اُ واسطَهِ پایداری و تحمل و اُ واسطَهِ دلگرمِنی که نوشتَه‌ئِی مکدّس اَتِت، امید مُبِه.

5خدای پایداری و دلگرمی، اُ شما عطا بِکو تا اوناکِه خاد خواستَه مسیحْ عیسی جور در اَدا، خاد یَکُدو هَمفکر بِی. 6تا شما یَکدل و یَک‌زابو، خدا یعنی بای خداوندمو عیسی مسیحا حمد و ستایش بِکنی.

7پَ هَموناکِه مسیح کَبول اُشکِردِستی، شما هم اُ یَکُدو کَبول بِکنی تَ خدا جلال پیدا بِکو. 8اَسِی که اُ شما اَگام که مسیح اَسِی نِشو دَدَهِ حکیکت خدا خادم سُنَّت بُدَیّا یعنی یهودِنیا بو، تا وعدَه‌ئِی که اُ بابَیّامو دَدَ بُستاد، تأیید بِکو، 9و تا غیریهودِنیا، خدائا وَخاطر رحمتُش حمد و ستایش بِکنِت. هَموناکِه تِی نوشتَه‌ئِی مکدّس نوشتَه بُدِ:

«پَ اُ تو بین غیریهودِنیا ستایش اَکنام،

و اَسِی اسم تو سرود اَخوانام.»

10و دَفَیدو تِی کتاب تورات اَگِه:

«اَی غیریهودِنیا خاد کوم آنا خارامی بِکنی.»

11و دَفَیدو تِی کتاب زَبور داوود اَگِه:

«شما، اَی هَمَهِ غیریهودِنیا، خداوندا حمد و ستایش بِکنی

و بِهِر تَ هَمَهِ مردم، اُ آنا ستایش بِکنِت.»

12و دَفَیدو اِشعیای پیغامبر اَگِه:

«رَگ و ریشَه یَسا اَدا،

مِکِه بلند اَدَبِه تا اَسِی غیریهودِنیا حُکمرانی بِکو؛

غیریهودِنیا اُ آنا امید اَدَبانِت.»

13بِهِر خدای امید، اُ شما پُر از خارامی و صلح و سلامتِنِ کاملی که تِی ایمونِه بِکو، تَ وَ کُدرت روح کدّوس خدا، پُر از امید بی.

خدمت پولُس بین غیریهودِنیا

14اَی کاکَیّام، ما خوم از شما خاطرُم جَمعِه که شما خوتو پُر از خوبی هی، و پُر از شناخت کامل هی و تاشابِه اُ یَکُدو تعلیم هاتی. 15ولی دربارَهِ مُشتی چِی‌یا، وَ بُری دِلِرزی اَسِی شما اُمنِوِشتِه، تَ تُن یاد بیارام، وَخاطر مِ فیضی که خدا شُ ما دَدِ 16تَ خادم مسیحْ عیسی اَسِی غیریهودِنیا بام و خدمت کاهِنِنِ انجیل خدائا اَنجوم هاتام، تَ غیریهودِنیا یَک هَدیَه‌ای بِت که خدا کَبولشو اَکو، که اُ واسطَهِ روح کدّوس خدا مکدّس بُدِ.

17پَ تِی مسیحْ عیسی ما دلیل اُمَ که اُ خدمتُم اَسِی خدا افتخار بِکنام. 18اَسِی که ما جرأت ناکنام دربارَهِ چِی حرف بِزنام، غیر از مِ چِی که مسیح اُ واسطَهِ ما اَنجوم اُشدَدِ، تَ اُ غیریهودِنیا اُ فَرمو بُردَ از ایمون در بیارام - وَ حرفُم و وَ عملُم، 19وَ کُدرت نِشونَه‌یّا و معجزه‌یّا، وَ کُدرت روح خدا - اوناکِه از شهر اورشلیم تا شهر ایلیریکوم دُور اُمزادِ و خدمت انجیل مسیحا کامل اَنجوم اُمدَدِ. 20و همیشَه آرزوم اِئِه که انجیلا جَی اعلام بِکنام که اسم مسیحا کَبلتَه شُنِشُنُفتِ، نِکو ما لِی شالدَه‌ای که یِکِیدو اُشنَدِ، نَک بِکنام، 21بلکه هَموناکِه تِی کتاب اِشعیا نوشتَه بُدِ:

«آنایایی که اصلاً دربارَهِ آنا شُنِگُتِستِت، اَبِنِت،

و آنایایی که اصلاً شُنِشُنُفتِ، اَفَهمِت.»

22هَمِ کَضیَه‌وائِه که چَند دَفَه مانع اُندَم اُ حَدِ شما بو.

برنامَه پولُس اَسِی چِدَ از شهر روم

23ولی اَلَه وَخاطر اِکِه تِی اِ منطکَیَه‌وا، دِگَه جَی اَسِی کَر ما آنِمودِ و وَخاطر اِکِه بُری سا‌لِه که دلُم شَئِه تُنحَد بِلگام، 24امید اُمَ که وَختی اُ اسپانیا چِدام سِرِ رهُم، تُبِبِنام. و بعد از اِکِه از دِدَتو سیر آبُدام، اُ ما تِی سفرُم اُ آنکا کمک بِکنی. 25ولی اَلَه اُ اورشلیم چِدام تَ اَسِی آنایایی که اُ مسیح ایمون شُهَه کمک بِبرام. 26اَسِی که کلیسائِی منطکَه‌ئِی مقدونیَه و اَخائیَه تِی دِلشوئِه که اُ مِ فخیرِی که تِی اورشلیم اُ مسیح ایمون شُهَه یَک کمکی بِفرِستِت. 27اَسِی که آنایا دِلشو شَئِست که اِ کَرا اَنجوم هاتِت؛ و واکعاً هم که زِرِ دِین یهودِنیا هِت، اَسِی که اَگَه غیریهودِنیا تِی برکتِی روحانی خاد یهودِنیا شریک بُدِت، آنایا هم وظیفَه شُهَه که اُ یهودِنیا تِی برکتِی مالی خدمت بِکنِت. 28پَ بعد از اِکِه اِ کَرا اَنجوم اُمدَ و مِ کمکی که جمع آبُدِ مُ تحویل آنایا دَ، سِرِ رَهُم که اُ اسپانیا مَیچام، تُن دیدن دِیام. 29اَدانام که وَختی تُنحَد بِلگام، وَ برکت کامل مسیح دِیام.

30اَی کاکَیّا، وَخاطر خداوندمو عیسی مسیح و محبت روح خدا، از شما خواهش اَکنام که اَسِی ما اُ درگاه خدا دعا بِکنی و خاد اِ کَرا، اُمرَهِ ما تلاش بِکنی. 31تَ از دست بی‌ایمونِی منطکَهِ یهودیَه جون سالم اُدَر بِبرام و تَ خدمتُم اَسِی اورشلیم، از طرف ایموندارِی اُ مسیح کَبول بِبِه. 32تا اینایی وَ خواست خدا وَ خارامی تُنحَد بِلگام و حَدتو جون تازَه بِگِرام. 33خدای صلح و سلامتی اُمرَهِ هَمَهِ شما بِه. آمین.

Currently Selected:

نامَه رومِنیا 15: LAB

Highlight

Copy