وَحی 2
2
پیغوم مسیح اُ کلیسای شهر اَفِسُس
1«اُ فرشتَه کلیسایی که تِک شهر اَفِسُسِه بِنوس:
«آناکِه هفتا اِستَرَ تِی دست راست اُشَه، و مارَکَهِ هفتا چراغدُن طِلا رَه اَچِه، اینا اَگِه: 2ما از کَریات باخبرام، از زحمتُت و صبر و تحملُت خبر اُمَ، و اَدانام که طاکَت آدامِی شَریرا اُتنی بلکه اُ آنایایی که اُ خوشو حَواری اَگائِت ولی نِهِت، امتحان اُتکِردِ و اُتفَهمِدِ که دروغگو هِت. 3اَدانام که وَ صبر طاکَت اَدارِش و وَخاطر اسم ما تحمّل اَکنِش و خستَه نِبُستِش.
4«ولی اِ شکایتا وَ ضد تو اُمَ که محبتیا که اوّل اُتهاد وِل اُتکِردِ. 5پَ اُ یاد بیا که از کُ اُفتَدِستِش. توبَه بِکو و کَرِی که اوّل اُتکِه اَنجوم هادِ. وَ اِلّا تُحَد دِیام و چراغدوت از جاش اَدَسیام، مَ اِکِه توبَه بِکنِش. 6ولی اِ چِی خَشا اُتَه که از کَرِی دار و دستَه نیکولاینیا بیزارِش، که ما هم بیزارام.
7«آناکِه گاش اُشَه، بِشناوِ که روح خدا اُ کلیسائیا چه اَگِه. هرکَه پیروز بِبِه، اُ آنا اِئا عطا اَکنام که از میوَه درخت زندگی که تِک بهشت خدائِه، بِخَه.
پیغوم مسیح اُ کلیسای شهر اِسمیرنا
8«اُ فرشتَه کلیسایی که تِک شهر اِسمیرنائِه بِنوس:
«آناکِه اوّلِه، آناکِه آخرِه، آناکِه مُرد، آناکِه زندَه آبو، اینا اَگِه: 9از مصیبت و فخیریت باخبرام، ولی تو ثروتمند هِش! از تهمتِی آنایاکِه اُ خوشو یهودی اَگائِت ولی نِهِت، بلکه عبادتگاه شیطون هِت خبر اُمَ. 10از عذابی که کَرارِ بِکَشِش، مَتِرس. بِبِن، چِی ناگذَرِ که ابلیس اُ مُشتیتو اُ زندان اَبی تَ امتحان بِبی و اَسِی ده راز مصیبت اَکَشی. تا دُم مرگ وفادار وامان، که ما تاج زندگیا اُ تو اَتام.
11«آناکِه گاش اُشَه، بِشناوِ که روح خدا اُ کلیسائیا چه اَگِه. هرکَه پیروز بِبِه، از مرگ دوّم ضرری شُ نارَسِه.
پیغوم مسیح اُ کلیسای شهر پِرگاموم
12«اُ فرشتَه کلیسایی که تِک شهر پِرگامومِه بِنوس:
«آناکِه شمشیر دو لَبَه تیزی اُشَه، اینا اَگِه: 13اَدانام کُ آمودِستِش، مِکاکِه شیطون تخت پادشاهی اُشَه. با اِ حالا اسم مائا مُحکام اَگِرِش و ایمونُت اُ مائا حاشا اُتنِکِه حتی تِی دُورَئِه شاهد وفادارُم آنتیپاس که بینتو کُشته بو، مِ جَی که شیطون آمودِ.
14«ولی ما چَنتا شکایت وَ ضد تو اُمَ. آنکا یَک عدَهای اُتَه که از تعلیم بَلعام پیروی اَکنِت؛ مِ بَلعاما که شُ بالاق یاد دَ جلووِ پَی بنیاسرائیل سنگی هُنِسِه که باعث زِمی اُفتَدَشوئِه، تا آنایا از خوراکی که اُ بُتیا تَکدیم اَبِه بِخرِت و بیعفتی بِکنِت. 15هَمینا هم اُ کسِی اُتَه که از تعلیم دار و دستَه نیکولاینیا پیروی اَکنِت. 16پَ توبَه بِکو، وَ اِلّا وَ هَمِ زودِنیا تُحَدِ دِیام و خاد شمشیر کَپُم وَ ضدشو اَجَنگام.
17«آناکِه گاش اُشَه، بِشناوِ که روح خدا اُ کلیسائیا چه اَگِه. هرکَه پیروز بِبِه، اُ آنا از مِ نُنِ مَنّای پِنهونِنا اَتام. و یَک سنگ سَفیدی شَتام که لِی مِ سنگا اسم جدیدی نوشتَه بُدِ، که هِسکَه مِئا نادو وَغیر از آناکِه اُ آنا اَگِرِ.
پیغوم مسیح اُ کلیسای شهر تیاتیرا
18«اُ فرشتَه کلیسایی که تِک شهر تیاتیرائِه بِنوس:
«پُسِ خدا که چَشِی چُن هَلَمَک تَش اُشَه و پَییاش چُنِ بُرنزیه که صیقل دَدَ بُدِ، اینا اَگِه: 19ما از کَریات، از محبت و ایمونُت، از خدمتُت و صبر و پایداریت باخبرام، و خبر اُمَه که کَرِی آخرُت بِشتَه از کَرِی اوّلُتِه. 20ولی وَ ضد تو اِ شکایتا اُمَ که خاد مِ زِنی که اسمُش ایزابله و اُ خوش نَبی اَگِه، مدارا اَکنِش. آناکِه اُ نوکرِی ما تعلیم اَدَ و گولشو اَزاد تا بی عفتی بِکنِت و از خوراکی که اُ بُتیا تَکدیم اَبِه بِخرِت. 21ما مُ آنا مهلت دَ تَ توبَه بِکو، ولی آنا اُشنا از بی عفتِنِ خوش توبَه بِکو. 22بِبِن، ما اُ آنا تِی جاگَه مریضی اَبیام و کسِی که خاد آنا زِنا اَکنِت شُن تِک مصیبت گاتی اَبیام، مَ اِکِه آنایا از کَرِی آنا توبَه بِکنِت 23و اُ بَچیاش هلاک اَکنام. مِ موکَوا هَمَهِ کلیسائیا اَفَهمِت ما آنا هام که فکر و دِلا اَدَکاوِ و اُ هر یَکتو طِبک کَریاتو عوض اَتام. 24ولی اُ بَکیَه شما تِی تیاتیرا، که دُمبالَهراوِ اِ تعلیما نِهی و مِ چِی که مُشتی شَگائِت ’سِررِی عمیق شیطون‘ تُن یاد نِگِرِتِه، اُ شما اَگام که دِگَه باری تُن لِی دوش نانِسام. 25فَکَط تا موکَهای که ما دِیام مِ چِی که تُهَه مُحکام نِگَه بِکنی.
26«هرکَه پیروز بِبِه و کَرِی مائا تا آخر اَنجوم هادَ، اُ آنا اِکتدار اَتام تا اُ ملتیا حُکمرانی بِکو،
27«”خاد عصای آهنی اُ آنایا حُکم اَکو؛
و اُ آنایا چُنِ کوزَهِ کُواری اَشکانِه،“
هَموناکِه ما خوم از بامو اِکتدار اُمگِرِتِه. 28ما اِستَرَهِ صبحا اُ آنا اَتام. 29آناکِه گاش اُشَه، بِشناوِ که روح خدا اُ کلیسائیا چه اَگِه.
Currently Selected:
وَحی 2: LAB
Highlight
Copy
Compare
Share
Want to have your highlights saved across all your devices? Sign up or sign in
@ 2024 Korpu Company
