نامَه غلاطِنیا 3
3
وَ ایمون یا وَ کَرِی شریعت
1اَی غَلاطنِی نادون، کِ جادو اُشکِردِستی؟ مرگ عیسی مسیح طوری اَسِی شما روشن گُتَه بو که اُنگار آنا جلووِ چَشیاتو اُ صلیب بُدِ. 2فَکَط مَئِه اِئا بِدانام: روح خدائا وَ اَنجوم کَرِی شریعت تُگِرِت یا وَ ایمون اُ مِ چِی که تُشُنُفت؟ 3یعنی اِکَّد نادون هی؟ خاد روح خدا شروع تُکِه و اَلَه تُئِه وَ جسم کامل بِبی؟ 4یعنی اَلَکی اِ هَمَه عذاب تُکَشی؟ مَ اِکِه واکعاً هم اَلَکی بُدِ! 5خدایی که روح کدّوسُش اُ شما اَدَ و بینتو معجزهیّا اَکو، اِ کَرا وَخاطر اِ اَکو که کَرِی شریعتا اَنجوم اَتی یا وَخاطر اِکِه اُ مِ چِی که تُشُنُفت ایمون تُهَه؟ 6هَموناکِه ابراهیم پیغامبر «اُ خدا ایمون شَئو و اِ باعث بو که آنا صالح اُ حساب بیاد.» 7پَ اِئا بِدانی که بَچِی ابراهیم آنایایی هِت که اُ ایمون تَکیَه شُهَه. 8نوشتَه مکدّس از کَبلتَه اُشدی، که خدا اُ غیریهودِنیا وَ ایمون، صالح اُ حساب اَدارِ، وَخاطر هَمِ، وَ جلو شُ ابراهیم اِ خبر خَشا اعلام کِه و اُشگُت: «هَمَهِ ملتیا اُ واسطَهِ تو برکت اَگِرِت.» 9پَ آنایاکِه تَکیَهشو اُ ایمونِه، اُمرَهِ ابراهیم مِ مرد ایمونا، برکت اَگِرِت.
10اَسِی که هَمَهِ آنایایی که تَکیَهشو اُ کَرِی شریعتِه، لعنت شُن لوئِه، اَسِی که تِی کتاب تورات نوشتَه بُدِ: «لعنت اُ هرکَه که، تِی هَمَهِ مِ چِییَی که تِی کتاب شریعت نوشتَه بُدِ، آنِمانِه و اَنجومشو نِدَ.» 11اَلَه، معلومه که هِسکَه تِی حضور خدا خاد شریعت صالح اُ حساب نِدا، اَسِی که «آدام صالح وَ ایمون زندگی اَکو.» 12ولی شریعت تَکیَهاش اُ ایمون نی، بلکه «کسی که حُکمِی شریعتا اَنجوم اَدَ، اُ واسطَهِ آنایا زندگی اَکو.» 13مسیح وَ جَی اَما لعنت بو، و اینایی اُ اَما از لعنت شریعت آزاد اُشکِه، اَسِی که تِی تورات نوشتَه بُدِ: «لعنت اُ هرکَه که شُ سِر دار کَشِت.» 14تا اینایی برکت ابراهیم تِی مسیحْ عیسی نصیب غیریهودِنیا بِبِه، تا روح خدائا که اُ اَما وعدَه دَدَ بُدِ، از رَهِ ایمون بِگِرِم.
شریعت و وعدَه خدا
15اَی کاکَیّا، بِهِری از زندگِنِ روزمرّه یَک مَثلی تُنسِه بیارام. حتی عهد و پیمونی که آدام اَدَبانِه بعد از اِکِه رسمی بو دِگَه هِسکَه اُشناشابِه باطلُش بِکو یا چِی شُ اضافَه بِکو. 16اَلَه، وعدَهیّا اُ ابراهیم و نَسلُش دَدَ بو. ناگِه «اُ نَسلیا،» اُنگار که دربارَهِ خیلیا بِه، بلکه اَگِه «اُ نَسل تو،» که منظور یَک نفره، یعنی مسیح. 17اِئا مَئِه بِگام: شریعتی که چهارصد و سی سال بعد اُمَ، عهدیا که خدا کَبلتَه اُشبَستِستاد باطل ناکو، اوناکِه وعدَهئا هیچ بِکو. 18اَسِی که اَگَه ارث اُ وسیلَه شریعت بیاد، دِگَه اُ وسیلَه وعدَه نِدا؛ ولی خدا ارثا اُ وسیلَه یَک وعدَه شُ ابراهیم دَ.
19پَ شریعت اَسِی چِئِه؟ شریعت وَخاطر تخصیریا اضافَه بو، مِ هم تا موکَهای که مِ نَسلی که وعدَه اُ آنایا دَدَ بُدِستاد، بیاد. شریعت از طریق فرشتَهیّا و اُ وسیلَه یَک واسطَه بَرکَرار بو. 20اَلَه هیچ واسطَهای فَکَط نمایندَه یَک طرف نی، ولی خدا یکیه.
21پَ یعنی شریعت وَ ضد وعدَهئِی خدائِه؟ اصلاً! اَسِی که اَگَه شریعتی دَدَ بُدِستاد که شَشابو زندگی هادَ، پَ صالح بُدَ واکعاً اُ وسیلَه شریعت اُ دست اَدامَه. 22ولی نوشتَه مکدّس اعلام اُشکِه که مَچی اَسیر گناهِه، تا مِ وعدَهای که اُ وسیلَه ایمون اُ عیسی مسیحِه، اُ آنایایی که ایمون دارِت، دَدَ بِبِه.
23اَلَه، کَبل از اِکِه ایمون بیاد، زِرِ شریعت اَسیر هادِم و تا وَختی که مِ ایمونی که باید اُندِستاد، آشکار بِبِه، تِی حَبس هادِم. 24پَ شریعت سرپرست اَما بو، تا موکَهای که مسیح بیاد، تا اینایی اُ وسیلَه ایمون صالح اُ حساب بِلگِم. 25ولی اَلَه که ایمون اُندِ، دِگَه زِر دست یَک سرپرست نِهِم.
26اَسِی که تِی مسیحْ عیسی، هَمَتو اُ واسطَهِ ایمون، پُسِی خدا هی. 27اَسِی که هَمَهِ شما که تِی مسیح غُسل تعمید تُگِرِت، مسیحا تُن بار کِردِ. 28دِگَه نِه یهودی هَه نِه یونانی، نِه غُلوم نِه آزاد، نِه مرد نِه زن، اَسِی که شما هَمَه تِی مسیحْ عیسی یکی هی. 29و اَگَه مال مسیح هی، پَ نَسل ابراهیم هی و طِبک وعدَه، وارث هی.
Currently Selected:
نامَه غلاطِنیا 3: LAB
Highlight
Share
Compare
Copy
Want to have your highlights saved across all your devices? Sign up or sign in
@ 2024 Korpu Company
