نامَه دوّم تیموتائوس 2
2
سرباز خَش مسیح عیسی
1پَ تو، اَی بَچُم، خاد فیضی که تِی مسیحْ عیسائِه، کَوی بِش، 2و مِ چِی که جلووِ بُری شاهدیا از ما اُتشُنُفتِ، اُ آدامِی وفاداری هادِ تَ شُبِشابِه اُ بَکیَه هم یاد هاتِت. 3چُنِ یَک سربازِ خَش مسیحْ عیسی، تِی تحمّل عذابیا شریک بِش. 4هیچ سربازی موکَهای که خدمت کِردا، اُ خوش گرفتار مشغولیتِی زندگِنِ روزانَش ناکو، اَسِی که هدفُش اِئِه که اُ آناکِه شُ خدمت گِرِتِه، خشنود بِکو. 5یَک پهلوون اَگَه طِبک کانونیا پهلوونی نِکو، تاج کَهرمونِنا نابَه. 6کشاورزی که سخت کَر اَکو آنائِه که باید اوّلین کسی بِه که از محصولُش سَهم اَبَه. 7دربارَهِ مِ چِی که اَگام فکر بِکو، اَسِی که خداوند تِی مَچی اُ تو فهم اَدَ.
8عیسی مسیحا اُیاد بیا که از مُردَیّا زندَه آبو، و از نَسل داوود پادشاه هاد؛ هَموناکِه تِی انجیلی که ما اعلام اَکنام گُتَه اَبِه، 9که وَخاطرُش عذاب اَکَشام، اوناکِه چُنِ یَک جنایتکار شُن زانجیر کَشدِستام. ولی کلوم خدا تِی زانجیر نی. 10پَ ما وَخاطر انتخاب بُدَیّا مَچیا تحمل اَکنام تا آنایا هم مِ نجاتی که تِی مسیح عیسائِه، وَ جلال اَبَدی اُ دست بیارِت.
11اَبِه اُ اِ حرفا اطمینان بِکنِش که:
اَگَه اَما خاد آنا مُردِم،
خاد آنا هم زندگی اَکنِم.
12اَگَه طاکَت بیارِم
خاد آنا هم حُکمرانی اَکنِم.
اَگَه اُ آنا حاشا بِکنِم
آنا هم اُ اَما حاشا اَکو.
13اَگَه بیوفا بِبِم،
آنا وفادار اَدَمانِه
اَسِی که اُشناشابِه اُ خوش حاشا بِکو.
14اِ چِییَهوا شُن یاد بیا و تِی حضور خدا اُ آنایا کَدَغان بِکو که سِرِ کلمَهیّا جَر و مُرافِعَه نِکنِت، که نِ وَلمِه، بلکه فَکَط اُ آنایایی که اَشناوِت نابود اَکو. 15تَموم تلاشُت بِکو که مورد کَبول خدا بِش، چُنِ یَک کارگری که دلیلی اَسِی شرمندگی اُشنی و کلوم حکیکتا وَ وَلمی اُ کَر اَگِرِ. 16ولی از حرفِی مُفت پوک دوری بِکو، اَسِی که مردُما بِشتَه و بِشتَه اُ طرف بی دینی اَبَه. 17حرفِی اِ آدامیا چُنِ مَرَض خورَه پَخش اَبِه. هیمِنائوس و فیلِتوس از اِ دستَهوا هِت، 18که از رَهِ حکیکت دَر اُندِستِت. و اَگائِت که زندَه آبُدَ از مُردَیّا هَمِ آلَه هم اتفاک اُفتَدِ. آنایا اُ ایمون مُشتی از آدامیا ویرون کِردات. 19ولی، شالدَه مُحکامی که خدا اُشنَدِ، پابَرجائِه، و خاد اِ نوشتَهوا مُهر بُدِ که: «خداوند اُ کسِی که مال خوش هِت، اَشناسِه،» و «بِهِر هرکَه اسم خداوندا اُ زابو اَدارِ، از نِ وَلمی دوری بِکو.»
20آلَه تِی یَک خونَهِ گات، فَکَط ظرفِی طِلا و نُکرَه نی، بلکه ظرفِی چوبی و کُواری هَم هَه؛ مُشتیشو اَسِی کَرِی مهم هِت، مُشتیشو اَسِی کَرِی دُم دستی. 21پَ اَگَه کسی اُ خوش از مِ چِی که اُمگُت پاک نِگَه بِکو، یَک ظرفی اَبِه اَسِی کَرِی مهم، انتخاب بُدَ وَ عنوان یَک ظرف مکدّس، که اُ کَر صابخونَه اَدا و اَسِی هر کَرِ خَشی آمادَئِه.
22پَ از هوی و هَوسِی جَوونی بِگُروخ، و اُمرَهِ آنایایی که وَ دلی پاک اُ خداوند جار اَزنِت، اَزدُمبالَهِ صالح بُدَ، ایمون، محبت و صلح و سلامتی بِش. 23از بحثِی که از لِی نادونی و نَفَهمیه دوری بِکو، خوت اَدانِش که جَر و مُرافِعَه اُرُو اَبِئِت. 24نوکر خداوند نباید جَر و مُرافِعَه بِکو، بلکه باید خاد هَمَه مهربو بِه، اُشبِشابِه تعلیم هادَ و جلووِ بَدی وَ صبر طاکَت بیارِ، 25باید اُ آدامِی که مخالفت اَکنِت وَ آرومی اصلاح بِکو، تا بلکه هم خدا شُنسِه توبَه عطا بِکو تا حکیکتا بِشناسِت 26و اُ خوشو بِلگِت و از تَلَه ابلیس که اَسیر اُشکِردِستِت تا خواستَهئِی آنا اَنجوم هاتِت، بِگُروخِت.
Currently Selected:
نامَه دوّم تیموتائوس 2: LAB
Highlight
Share
Copy
Want to have your highlights saved across all your devices? Sign up or sign in
@ 2024 Korpu Company
