نامَه اوّل پِطرُس 4
4
مباشرِی فیض خدا
1پَ اَسِی که مسیح تِی جسم عذاب اُشکَشی، شما هم اُ خوتو وَ مِ طرز فکرا حاضر و آمادَه نِگَه بِکنی، اَسِی که هرکَه تِی جسم عذاب اُشکَشِدِ، دِگَه کَری شُ گناه نی. 2وَخاطر هَمِ، بَکیَه عمرِ تِی جسما، وَ خواستَهِ خدا زندگی اَکو نِه وَ هوی و هَوسِی بَشَری. 3اَسِی که بَسِه مِ عمری که پَی کَرِی که بُت پرستیا شُئِه بِکنِت چو، و زندگیتو تِی هَوسبازی، تِی هوی و هَوس، تِی عَرَک خوری، تِی عیاشی، تِی مجلسِی عیش و نوش و تِی بُتپرستنِی که شرم آورِه تُگذَرِنَه. 4وَخاطر هَمِ، وَختی که شما شریک بیبندوبارِنِ بی حَد و اندازَهشو نابی، تعجب اَکنِت و دُشموتو اَتِت. 5ولی آنایا اُ خدایی که آمادَئِه تا اُ زندَیّا و مُردَیّا حُکم بِکو، حساب آپَس اَتِت. 6وَخاطر هَمِئِه که انجیل حتی اُ آنایاکِه مُردِستِت، اعلام بو، تا آنایا با اِکِه تِی جسم چُنِ هَمَهِ آدامیا محکوم بُدِت، ولی تِی روح هَموناکِه خدا شَئِه زندگی بِکنِت.
7آخر مَچی نَزیکِه؛ پَ خوددار و وَخاطر دعائیاتو هوشیار بی. 8از هَمَه مهمتَه، خاطر یَکُدو از دل و جو تُبِئِه، اَسِی که محبت کِردَ، گناهِی زیادا اَپوشِنِه. 9از یَکُدو بدون کُر کُر کِردَ مِهموننوازی بِکنی. 10وَ عنوان مباشرِی خَشی که فیض مَ رَکَمِنِ خدا اُ آنایا دَدَ بُدِ، هر یَکتو عطایی که تُگِرِتِه، اَسِی خدمت اُ یَکُدو اُ کَر بِبری. 11هرکَه حرف اَزاد، حرفُش چُنِ حرفِی خدا بِه. و هرکَه خدمت اَکو، وَ کُدرتی که خدا اَدَ خدمت بِکو، تا تِی مَچی خدا اُ واسطَهِ عیسی مسیح جلال پیدا بِکو. جلال و حُکمرانی مال آنائِه تا اَبَدالآباد. آمین.
عذاب کَشِدَ وَخاطر مسیح
12اَی عزیزیا، از اِ تَشی که اَسِی امتحان کِردَهِ شما، تُن مارَکَه اُفتَدِ تعجب مَکنی، اوناکِه اُنگار یَک چِی عجیبی تُن سِرَ اُندِ. 13بلکه از اِکِه تِی عذابِی مسیح شریک بُستی خارام بی، تا موکَهای که جلال آنا آشکار اَبِه شما هم خارامی بِکنی و کِل بِکَشی. 14خوش وَ حالتو اَگَه وَخاطر اسم مسیح شُن شما دُشمو دَ، اَسِی که روح جلال، روح خدا، تُن لو اَدَمانِه. 15ولی مَهِری هیچ یَکتو وَ اسم یَک کاتِل، یا یَک دُز، یا یَک آدام بَدکار یا یَک فضول عذاب بِکَشِه. 16با اِ حالا، اَگَه کسی وَ اسم یَک مسیحی عذاب اَکَشِه، خَجالَت نِکَشِه، بلکه وَ مِ اسما، اُ خدا حمد و ستایش بِکو. 17اَسِی که وَختُش رَسِدِ که محاکمَه، از اهل خونَه خدا شروع بِبِه. و اَگَه خاد اَما شروع اَبِه، عاکبت کسِی که انجیل خدائا اطاعت ناکنِت چه اَبِه؟ 18و
«اَگَه آدام صالح وَ سختی نجات پیدا اَکو،
آدام بیدین و گُنَهکار چه شُ سِرَ اَدا؟»
19پَ بِهِر تَ کسِی که وَ خواست خدا عذاب اَکَشِت، جون خوشو اُ ’خالک وفادار‘ هاتِت و اُ کَرِی خَش ادامَه هاتِت.
Currently Selected:
نامَه اوّل پِطرُس 4: LAB
Highlight
Copy
Compare
Share
Want to have your highlights saved across all your devices? Sign up or sign in
@ 2024 Korpu Company
