نامَه اوّل قُرِنتِنیا 16
16
جمع آکِردَهِ کمک اَسِی ایموندارِی اُ مسیح
1اَلَه دربارَهِ جمع آکِردَهِ کمک اَسِی ایموندارِی اُ مسیح: مِ چِی که مُ کلیسائِی منطکَهِ غَلاطیَه فَرمو دَ، شما هم باید اَنجوم هاتی. 2راز اوّل هر هفتَه، هر یَک از شما کَدِ درآمدُش باید یَک پولی اُ لَرد نِسِه و جمع آکو، تَ اینایی موکَهای که تُنحَد اُندام، لازم نِبِه که کمک جمع آکنی. 3وَختی رَسِدام آنکا، اُ کسِی که شما تایید اَکنی معرفی نامَه اَتام و اُ آنایا خاد هَدیَهئِی شما اُ شهر اورشلیم اَفرِستام. 4اَگَه صَلاح بِه که خوم هم اُچام، آنایا مُمرَه دِئِت.
5بعد از اِکِه از منطکَهِ مقدونیَه رَد بُدام تُنحَد دِیام، اَسِی که مَئِه از مقدونیَه رَد بِبام. 6بلکه هم یَک چَن وَختی تُنحَد وامانام، و یا حتی زِمستوئا خاد شما بام، تَ هر جَی که اَچام، تِی سفرُم کُمَکُم بِکنی. 7اَسِی که اُمنائِه آلَه تُن دیدن بِلگام و فَکَط سِرِ رَه یَک سِری تُنبِزنام؛ اَگَه خداوند اجازَه هادَ، امید اُمَ یَک مدت تُنحَد وامانام. 8ولی تا عید پِنتیکاست تِی شهر اَفِسُس اَدَمانام، 9اَسِی که جلووِ لوم یَک دَرِ گاتی واز آبُدِ، اَسِی یَک کَری که تاثیرُش بُریِه و مخالفیا هم بُری هِت.
10وَختی تیموتائوس تُنحَد اُمَ، یَک کَری بِکنی که حَدِ شما از هیچ چی تِرسی اُشنِبِه. اَسِی که آنا هم چُنِ ما کَر خداوندا اَنجوم دَدا؛ 11پَ هِسکَه اُ آنا کوچک آنِکو. اُ آنا وَ سلامت راهِنِ سفر بِکنی تَ مُحَد واگَردِ؛ اَسِی که ما خاد کاکَیّا چَش انتظارُش هِم.
کَدَغانِی آخر
12اَلَه دربارَهِ کاکَی اَما آپولُس، ما بُری از آنا خواهش اُمکِه که اُمرَهِ بَکیَه کاکَیّا تُن دیدن بیاد، ولی اصلاً راضی نِبو که آلَه بیاد. هر وَخت فرصت بِکو، اَدا.
13هوشیار بی؛ تِی ایمون مُحکام وَایستی؛ چُنِ یَک مرد رفتار بِکنی، کَوی بی. 14هَمَهِ کَرِی که اَکنی وَ محبت بِه.
15اَدانی که اهل خونَهِ اِستِفاناس اوّلین کسِی هادِت که تِی منطکَهِ اَخائیَه ایمون شُئوردِ، و اِکِه آنایا اُ خوشو وَکف خدمت اُ ایموندارِی اُ مسیح شُکِردِ. اَی کاکَیّا، اَلَه از شما خواهش اُمَ که 16از اینا آدامِی و هَمینا هم از هرکَه که تِی اِ خدمتا کَر اَکو و زحمت اَکَشِه، اطاعت بِکنی. 17از اُندَهِ اِستِفاناس، فورتوناتوس و اَخائیکوس خارامام، اَسِی که جَی خالِنِ شمائا پُر شُناکِردِ. 18اَسِی که آنایا روح مائا و هَمینا هم روح شمائا تَزَه شُناکِه. اُ اینا کسِی احترام هُنِسی.
سلامیا
19کلیسائِی منطکَهِ آسیا سلامتو اَرَسِنِت. آکیلا و پْریسکیلا و کلیسایی که تِی خونَشوئه، تِی خداوند بُری سلامتو اَرَسِنِت. 20هَمَهِ کاکَیّا سلامتو اَرَسِنِت. وَ بوسَئِه مکدّس اُ یَکُدو سلام بِکنی.
21ما، پولُس، وَ دست خوم اِ سلاما تُنسِه اَنِوِسام.
22اَگَه کسی خاطر خداوندا اُشنائِه. لعنت شُ بیاد. اَی خداوند اَما، بِدا!
23فیض خداوند عیسی خاد شما بِه.
24محبت ما تِی مسیح عیسی اُمرَهِ هَمَتوئِه. آمین.
Currently Selected:
نامَه اوّل قُرِنتِنیا 16: LAB
Highlight
Share
Copy
Want to have your highlights saved across all your devices? Sign up or sign in
@ 2024 Korpu Company
