نُومَه وِ کلیسای روم 15
15
1اِیما کِه قُوَه داریم، ها دِ مِلِمُو ضعفیا آیِمیا ضعیفِ نِه تحمل بَکیم، وَ دِ دُمِ راضی کِردِهنِ خُومُو نوئیم. 2هَر کُوم دِ اِیما بایِس هَر چی خوئی نِه کِه دِ هُمساش مِئینَه دِ او مورد او نِه خُشال بَکَه، تا ایمُونِشِه تقویت بَکَه. 3سی یَکِه مسیح دِ دُمِ خُوشی خُوش نِوی، بَلکِم چِنُو کِه دِ کِتُوِ زَبورِ داوود نیسَنَه بییَه: «سَرکوفتیا وِنُو کِه وِ تو سَرکوفت زَن، اُفتا وِ ری مِه.» 4سی یَکِه هَر چیئی کِه دِ زی نیسَنَه بی، سی تعلیمِ اِیما بی، تا وِ سُنَه پایاری وَ دِلگُویای کِه نیسَنَهیا مقدس وِ اِیما مِیئَه، اُمید داشتوئیم.
5چِنُو بوئَه کِه خدائی کِه پایاری وَ دِلگُوی مِیئَه، یَه نِه وِتُو عطا بَکَه تا چِنُو وا یَکتِری هُمرأی بایت کِه وا حاسَه مسیح عیسی جور اَ، 6تا وا یَک یِه دِل وَ یِه زِوُو، خدا وَ بُوَه خداوندِ اِیما عیسی مسیحِ نِه جِلال بِئیت. 7پس هِه چِنُو کِه مسیح شِما نِه وِ گرمی قبول کِرد، شِما هَم یَکتِری نِه وِ گرمی قبول بَکیت تا خدا جِلال پیا بَکَه.
8سی یَکِه وِتُو مُوئِم کِه مسیح پاکارِ ختنَهبییَهیا بی تا راسی خدا نِه نِشُو بِئَه، تا وَعدَهیائی کِه خدا وِ بُوَهیا اِیما دِئی، تائید بَکَه، 9وَ تا، قُومیا غیرِیهودی خدا نِه وِ سُنَه رَحمَتِش جِلال بِئَن. چِنُو کِه دِ نیسَنَهیا مقدس نیسَنَه بییَه:
«پس مِه تو نِه دِ مینِ قُومیا غیرِیهودی ستایش میکِم،
وَ وِ نُومِ تو دَنگ میارِم.»
10وَ هَنی مُوئَه:
«اِ قُومیا وا قُومِ او شایی بَکیت!»
11وَ دُوارَه مُوئَه:
«اِ گِردِ قُومیا، خداوندِ نِه ستایش بَکیت!
وَ گِردِ مردِمِ دنیا، او نِه جِلال بِئَن!»
12وَ دِ سَر اِشعَیا نبی مُوئَه:
«بُنچینَه یَسا میایَه،
هِه وَه کِه وِرمِسَه تا وِ ری قُومیا حکومت بَکَه؛
وَ اُمیدِ غیرِیهودیُو ها وِ او.»
13چِنُو با کِه خدائی کِه سَرچَشمَه اُمید اَ، شِما نِه وا تمُومِ شایی وَ صُولوُسِلامتی کِه دِ ایمُونَه پُر بَکَه، چِنُو کِه وا قُوَتِ روحالقدس، پُر بایت دِ اُمید.
پولُس پیشکارِ غیرِیهودیُو
14بِرارُونِم، مِه خُوم دِ شِما خاطرجمعاِم، کِه شِما خُوتُو پُریت دِ خوئی وَ پُراپُر دِ تمُومیِ شناخت وَ تُونیت وِ یَکتِری یای بِئیت. 15اما دِ بارَه بعضی چیا وا جسارتِ زیاد سیتُو نیسَنِمَه تا وِنُو نِه بیارِم وِ ویرِتُو، وِ سُنَه او فیضی کِه خدا وِم بَخشَنَه 16کِه پیشکارِ مسیح عیسی بام سی غیرِیهودیُو وَ وِ عنوانِ کاهِن، دِ خدمتِ انجیلِ خدا، تا غیرِیهودیُو پیشکَشی باوِدلِ خدا بان، کِه توسطِ روحالقدس تقدیس بییَه.
17پس مِه وِ حَق دِ مسیح عیسی وِ خدمتِ خُوم وِ خدا میبالنِم. 18سی یَکِه جرأت نِمیکِم دِ چیئی قِصَه بَکِم غیرِ او چیئی کِه مسیح توسطِ مِه کِردَه تا غیرِیهودیُو نِه مطیعِ ایمُو بَکِم، وا حرفیام وَ کاریام، 19وا قُوَه نِشُونَهیا وَ معجزَهیا، وا قُوَه روحِ خدا- چِنُو کِه دِ اورشلیم وَ گِردِ رَهیا او هورَه تا ایلیریکُوم خدمتِ انجیلِ مسیحِ نِه وِ تمُومی اَنجُوم دَمَه، 20وَ آرزوم یَه بی کِه انجیلِ نِه دِ جائی موعظَه بَکِم کِه وِرَز یَه نُومِ مسیحِ نِه نَشنَفتوئَن، نَکَه مِه بِنائی وِ ری پِیای بَسازِم کِه یَکی هَنی نِئایَه، 21بلکِم چِنُو کِه دِ کِتُوِ اِشعَیا نبی نیسَنَه بییَه:
«وِنُو کِه کَس وِشُو نَگُتی، او نِه مِئینَن،
وَ وِنُو کِه هیچ نَشنَفتِنَه، میفَمَن.»
22هِه وِ ایی سُنَه چَن گِل میحاسِم کِه بیام وِ تِهتُو، نِویَه.
برنامَه پولُس سی دیئِهنِ روم
23اما ایمدال، سی یَکِه دِ ایی منطقَهیا دَ جائی سی کار نارِم، وَ دِ اوچِه کِه خیلی سال اَ هام دِ تَمارزو یَه کِه بیام وِ تِهتُو، 24هام وِ ایی اُمید کِه موقَع رَتِه وِ اسپانیا سَرِ رَهم شِما نِه بِئینِم، وَ دِما یَکِه شِما نِه دیئِم، مِه نِه دِ سفرِم وِ اوچِه کمک بَکیت. 25اما، ایسِه، ها رُوئِم وِ اورشلیم، تا سی ایمُوداریا اوچِه کمک بُورِم. 26سی یَکِه کلیسایا مقدونیَه وَ اَخائیَه چِنی وِ دِلِشُو بی کِه سی ایمُوداریا ژارِ اورشلیم کمکی رِ بَکَن. 27سی یَکِه وِنُو دِلِشُو وِ ایی کار بی؛ وَ وِ راسی وِنُو هان زیرِ دِینِشُو. سی یَکِه اَر غیرِیهودیُو دِ برکتیا روحانی یهودیُو هُمبَر بینَه، وِنُو هَم بایِس دِ برکتیا مالی خدمتی وِشُو بَکَن. 28پس هِه کِه ایی کارِ نِه کِردِم وَ چیائی کِه جمع بییَه رَسَنِم وِ دَسِشُو، مِه دِ رَه شِما رائی اسپانیا موئِم. 29مِه دُونِم هِه کِه بیام وِ تِهتُو وا برکتِ کاملِ مسیح میام.
30ایمدال بِرارُو، وِ سُنَه خداوندِ اِیما عیسی مسیح وَ محبتِ روحالقدس، دِ شِما خواهِشت میکِم کِه وا یَکتِری دِ دعایاتُو وِ درگاه خدا سی مِه، واردِ مِه سِمِر بِسیت، 31تا دِ دَسِ بی ایمُونیا یهودیَه جُو بیر بَکِم، وَ خدمتِم سی اورشلیم باوِدلِ ایمُوداریا بوئَه. 32تا وِ حاسِ خدا وا شایی بیام وِ تِهتُو وَ دِ لارِگِ شِما جُونی تازَه بِئیرِم. 33خدایِ صُولوُسِلامتی وا گِردِ شِما با.آمین.
Currently Selected:
نُومَه وِ کلیسای روم 15: NLB
Highlight
Copy
Compare
Share
Want to have your highlights saved across all your devices? Sign up or sign in
@ 2024 Korpu Company