نُومَه وِ کلیسای روم 10
10
1بِرارُو، حاسَه قلبی وَ دعا مِه وِ تِه خدا سی یهودیُو یِنَهآ کِه نجات پیا بَکَن. 2سی یَکِه مِه دِ بارَهشُو شاهادَتی مِیئِم کِه سی خدا غیرت دارَن، اما ایی غیرت دِ ری شناخت نی. 3سی یَکه صالحبییِهنی نِه کِه دِ خدا اَ نَفَمِسِن، وَ دِ دُمِ ثابت کِردِهنِ صالحبییِهنِ خُوشُو بییِن، وِنُو دِ بِرُووَرِ او صالحبییِهنی کِه دِ خدا اَ، سَر نِم نَکِردِن. 4سی یَکِه مسیح آخِرِ شریعت اَ تا هَر کَه وِ او ایمُو بیارَه، صالح وِ حِسُو بیا.
5سی یَکه موسی دِ بارَه او صالحبییِهنی کِه وِ ری پایَه شریعت اَ مینیسنَه، کِه «کسی کِه هُدیا نِه اَنجُوم مِیئَه توسطِ وِنُو زِنِهئی میکَه.» 6اما او صالحبییِهنی کِه وِ ری پایَه ایمُونَه مُوئَه:«دِ دِلِتُو نُوئیت کیَه کِه رُوئَه بالا وِ آسمُو؟» (تا مسیحِ نِه بیارَه وِ هار). 7یا «"کیَه کِه رُوئَه وِ هار وِ دنیایِ مُردَهیا؟“ (تا مسیحِ نِه دِ مُردَهیا زِنَه بَکَه). 8اما او چی مُوئَه؟ یَکِه «ایی کلُوم ها دِ نِزیکِ تو، ها دِ دَمِ تو، وَ ها دِ دِلِ تو.» (یَه هِه او کلُومِ ایمُونَه کِه اِیما اِعلُوم میکیم)؛ 9سی یَکه اَر وِ زِوُونِ خُوت اعتراف بَکی«عیسی خداوند اَ» وَ دِ دِلِ خُوت ایمُو داشتوئی کِه خدا او نِه دِ مُردَهیا زِنَه کِرد، نجات پیا میکی. 10سی یَکِه دِ دِل اَ کِه آیِم ایمُو میارَه وَ صالح وِ حِسُو میا، وَ وا زِووُنَه کِه اعتراف میکَه وَ نجات پیا میکَه. 11سی یَکه کِتُوِ اِشعَیا نبی مُوئَه:«هَر کَه وِ او ایمُو بیارَه، خجالت نِموئَه.» 12سی یَکِه مابِینِ یهودی وَ غیرِیهودی هیچ فرقی نی، سی یَکه هِه او خداوند، خداوندِ همَهآ وَ وِ گِردِ وِنُونی کِه او نِه هِنا میکَن، کواکو برکت مِیئَه. 13سی یَکِه «هَر کَه نُومِ خداوندِ نِه هِنا بَکَه، نجات پیا میکَه.»
14پس چطور، کسی نِه هِنا بَکَن کِه وِ او ایمُو نیُووِردِنَه؟ وَ چطور وِ کسی ایمُو بیارَن کِه هرگز دِ بارَه او نَشنَفتِنَه؟ وَ چطور بَشنُوئَن بییَکِه کسی سیشُو موعظَه بَکَه؟ 15وَ چطور موعظَه بَکَن اَر کِل نوئَن؟ چِنُو کِه دِ کِتُوِ اِشعَیا نبی نیسَنَه بییَه:«چِه قِشَنگ اَ پایا وِنُونی کِه خَوَرِ خُوشِ انجیلِ نِه موعظَه میکَن.» 16اما گِردِ وِنُو دِ انجیل اطاعت نَکِردِنَه. سی یَکِه اِشعَیا نبی مُوئَه: «اِ خداوند، چِه کسی اوچیئی نِه کِه دِ اِیما اِشنَفتَه باوَر کِردَه؟» 17پس، ایمُو دِ اِشنَفتِه میایَه، وَ اِشنَفتِه دِ رَه کلُومِ مسیح.
18اما میپُرسِم: مَه نَشنَفتِنَه؟ اَلوَت کِه اِشنَفتِنَه، سی یَکه
«دَنگِشُو پیچِسَه دِ سَرتاسَرِ زِمی،
وَ کلُومِشُو رَسِسَه تا وِ او سَرِ دنیا.»
19اما میپُرسِم: مَه قُومِ اسرائیل او چیئی نِه کِه اِشنَفت نَفَمِس؟ اول، موسی مُوئَه:
«وِ واسطَه وِنُو کِه ملتی وِ حِسُو نِمیان،
«شِما نِه وِ غیرت مُونِم،
«وَ وِ واسطَه ملتِ نایُونی
تَشِ غیظِ شِما نِه روشِه میکِم.»
20اوسِه، اِشعَیا وا جرأت مُوئَه:
«وِنُو کِه دِ دُمِ مِه نِوییِن، مِه نِه پیا کِردِنَه؛
وِ وِنُو کِه مِه نِه ناحاسِن خُومِه نِشُو دَمَه.»
21اما دِ بارَه قُومِ اسرائیل مُوئَه:
« تمُومِ رو دَسیا خُومِه دِراز کِردِمَه
والا قُومی کِه هان وِ تیشکِ مِه وَ تور اَن.»
Currently Selected:
نُومَه وِ کلیسای روم 10: NLB
Highlight
Copy
Compare
Share
Want to have your highlights saved across all your devices? Sign up or sign in
@ 2024 Korpu Company