انجیلِ یوحنا 3

نیقُودیموس میا وِ دیئِه‌نِ عیسی

1پیائی بی دِ علما فِرقَه فَریسی، نیقُودیموس نُوم، دِ گَپُونِ یهود. 2او یِه شُو اُوما وِ تِه عیسی وَ وِش گُت: «استاد، دُونیم کِه تو معلمی هیسی کِه دِ لا خدا اُومایَه، سی یَکِه هیشکَه نَتُونَه معجزَه‌یا وَ نِشُونَه‌یائی کِه تو می‌کی، بَکَه، مَر یَکه خدا واش بوئَه.» 3عیسی دِ جُئُو گُت: «وِ راسی، وِت مُوئِم، تا کسی دُوارَه نِئا وِ دی، نَتُونَه پاتشائی خدا نِه بِئینَه.» 4نیقُودیموس وِش گُت: «کسی کِه پیر اَ، چطور تُونَه بیا وِ دی؟ یعنی تُونَه گِلی هَنی وِرگردَه وِ گیَه داآش وَ بیایَه وِ دی؟» 5عیسی جُئُو دَه: «وِ راسی وِت مُوئِم تا کسی دِ اُو وَ روح نِئایَه وِ دی، نَتُونَه وِ پاتشائی خدا رَه پیا بَکَه. 6او چیئی کِه دِ بشرِ خاکی میا وِ دی، بشری اَ؛ اما چیئی کِه دِ روح میا وِ دی، روحانی اَ. 7بِلاجیت نیا کِه گُتِم بایِس دُوارَه بیایت وِ دی! 8بای هَر جا کِه باحا مِی‌رَه؛ دَنگِشِه می‌شنُوئی، اما نُئُونی دِ کجا میا وَ وِ کجا مِی‌رَه. هَر کَس هَم کِه دِ روحِ خدا بیا وِ دی، هِه چِنینَه.» 9نیقُودیموس دِش پُرسی: «چِنی چیئی چطور ممکن اَ؟» 10عیسی جُئُو دَه: «تو معلمِ اسرائیلی وَ ایی چیا نِه درک نِمی‌کی؟ 11وِ راسی، وِت مُوئِم کِه اِیما دِ او چیئی کِه دُونیم قِصَه می‌کیم وَ وِ او چیئی کِه دیئیمُونَه شاهادَتی مِئیم، اما شِما شاهادَتی اِیما نِه قبول نِمی‌کیت. 12اَر هِه کِه دِبارَه امورِ زِمینی وا شِما قِصَه کِردِم باوَر نَکِردیت، چطور باوَر می‌کیت اَر دِ امورِ آسمُونی وِ شِما بُوئِم؟ 13هیشکَه وِ آسمُو بالا نَرَتَه، مَر وَه کِه دِ آسمُو اُوما وِ هار، یعنی کُرِ انسان (کِه ها دِ آسمُو). 14هِه چِنُو کِه موسی دِ بیاوُو او مارِ برنجی نِه کِرد توکِ چوئی وَ عِلَمِش کِرد بالا، کُرِ انسان هَم بایِس عِلَم با بالا، 15تا هَر کَه وِ او ایمُو بیارَه، حیاتِ ابدی داشتوئَه.

16«سی یَکِه خدا جاهانِه ایقَه محبت کِرد کِه کُرِ یَکُونَه خُوشِه دَه تا هَر کَه وِ او ایمُو بیارَه هِلاک نوئَه، بَلکِم حیاتِ ابدی پیا بَکَه. 17سی یَکِه خدا کُرِ نِه کِل نَکِرد وِ جاهان تا جاهانِه محکوم بَکَه، بَلکم کِل کِرد تا جاهان وِ واسطَه او نجات پیا بَکَه. 18هَر کَه وِ او ایمُو دارَه محکوم نِموئَه، اما هَر کَه وِ او ایمُو نارَه، هِه الان محکوم بی‌یَه، سی یَکِه وِ نُومِ کُرِ یَکُونَه خدا ایمُو نیُووِردَه. 19وَ محکوم‌بی‌یِه دِ یِنَه‌آ کِه نیر اُوما وِ جاهان، اما مردِم تاریکی نِه بیشتِر دِ نیر دوس داشتِن، سی یَکِه کاریاشُو گَن اَ. 20سی یَکِه هَر کَه گَنی نِه وِ‌جا میارَه، دِ نیر بَیئِش میا، وَ والا نیر نِمیا، نَکَه کاریاش دیار با وَ رِسوا بوئَه. 21اما وَه کِه او چیئی نِه کِه دُرِس اَ، وِ‌جا میارَه، میا والا نیر، تا دیار بوئَه کِه کاریاش وِ یاری خدا اَنجُوم بی‌یَه.»

شاهادَتی یحیی دِ بارَه عیسی

22دِما وَه، عیسی وَ شاگردیاش رَتِن وِ آبادی‌یا وِلاتِ یهودیَه. او مدتی نِه واردِ وِنُو مَن ووچِه، وَ مردِمِ نِه تعمید مِی‌دَه. 23یحیی هَم دِ عِیْنون، نِزیکِ شهرِ سالیم، تعمید مِی‌دَه، سی یَکِه دِ اوچِه اُو فَتِ‌فِراوُو بی وَ مردِم مِی‌‌مان، تعمید می‌گِرِتِن. 24یَه وِرَز وَه بی کِه یحیی بِفتَه وِ هُلِفدُو. 25ایمدال، مینِ شاگردیا یحیی وَ یِه یهودی، قِصَه‌قُشَه‌ای بی وِ سَرِ آدابِ غسلِ پاکی. 26پس اُومان وِ تِه یحیی، وِش گُتِن: «استاد، وَه کِه وا تو دِ اولانِ گِلالِ اُردُن بی، وَ تو وِ او شاهادَتی دِئی، ایسِه خُوش تعمید مِی‌ئَه وَ گِرد مِی‌رَن وِ تِه‌ش.» 27یحیی دِ جُئُو گُت: «هیشکَه نَتُونَه چیئی وِ دَس بیارَه، غیرِ او چیئی کِه دِ آسمُو وِش عطا بوئَه. 28شِما خُوتُو شاهِدیت کِه مِه گُتِم مسیحِ موعود نیسِم، بَلکم وِرَز او کِل بیمَه. 29بِئی سی دُوما اَ، اما دوسِ دُوما کِه اِیسایَه‌آ دِ لائی، وَ او نِه می‌شنُوئَه، دِ اِشنَفتِه‌نِ دَنگِ دُوما شایی زیادی می‌کَه. پس شایی مِه هَم الان کامل بی‌یَه. 30او بایِس گَپ بوئَه وَ مِه بایِس کُچِک بوئِم.

31«وَه کِه دِ بالا می‌آیَه، بالاتِر دِ همَه‌آ، اما وَه کِه دِ زِمینَه، زِمینی اَ وَ دِ چیا زِمینی قِصَه می‌کَه. وَه کِه دِ آسمُو می‌آیَه، بالاتِر دِ همَه‌آ. 32او وِ هَر چیئی کِه دیئَه وَ اِشنَفتَه شاهادَتی مِی‌ئَه، اما هیشکَه شاهادَتیشِه قبول نِمی‌کَه. 33وَه کِه شاهادَتی او نِه قبول می‌کَه، مُهرِ تائید وِ یَه مِی‌زِنَه کِه خدا حقیقت اَ. 34سی یَکِه او کَسی کِه خدا کِل کِردَه، کلُومِ خدا نِه اِعلُوم می‌کَه، سی یَکه خدا روحِ خُوشِه وِ قَدِ معین "وِش" عطا نِمی‌کَه. 35بُوَه، کُرِ نِه دوس دارَه وَ همَه چی نِه سپردَه وِ دَسِ او. 36هَر کسی کِه وِ کُر ایمُو دارَه، حیاتِ ابدی دارَه؛ اما کسی کِه دِ کُر اطاعت نِمی‌کَه، حیاتِ نِه نِمِئینَه، بَلکم غَضُوِ خدا می‌مُونَه وِ ریش.»

Currently Selected:

انجیلِ یوحنا 3: NLB

Highlight

Copy