نؤمه رومیان ئبه 11
11
اسراییل باقی مؤنده ئان
1پس واپورسنم: مگر خُدا خوشه مردُمَ رداگوده؟ هرگیز؛ چونکی مو خودم اسرائيلِ شئم، ابراهيم نسل اجی و بنيامينِ طائفه اجی. 2خُدا خوشه مردومَ كی پيشتر سیوا بوده بو، ردانوده. مگه نودونین مقّدس بنویشته ئان ایلیا پیغمبر باره چی گونه؟ که او چطو اسرائيلِ مردومِ ضید، خُدا ورجه گله گی بوده و بوته؟ 3«خُداوندا، ایشون تی پیغمبرونَ بكوشتن و تی قوربونگائانَ فگردونئن. هچی مو بومونسم و ایسه خوانن مَرَم بكوشن.» 4ولی خُدا اونَ چی آؤجا بدا؟ اینکه «مو مئبه هفت هیزار نفرَ کنار بنام کی بَعَلِ بت جُلو زانو نزئن.» 5این واسی، هی الونم الباقی ئنی ایسان کی خُدا فیض راه اجی دوجئه بوبون. 6ولی اگه فیض را یاجی ببون، ده اعمالِ واسی نئه؛ وَئِلا فیض دِه فیض نئه. ولی اگه عملِ راهِ جی ببون، ده فیضِ واسی نئه؛ وَئِلا عمل دِه عمل نئه.
7بعد چی؟ ای كی، او چیَ کی اسرائيل مردوم ذوق و شوق همرا، اونِ گیتنِ دومبال دبو، بدَس نارده، دوجئرون بدَس باردن، ولی الباقی سخت ديلیَ دُوچارَ بون، 8هوطوکی مقّدس کتابونِ مئن بنویشته بوبو:
«تا ایمرو خُدا سوستِ روح اوشونَ هدا
و چوشمونی کی دئه مننیسه بون
و گوشونی کی ایشتوسه مننیسه بون.»
9و داوود پادشا گونه:
«ایشونِ سفره ایشونِ به دؤم و تله ببون
سنگی کی اوشونَ زمین زئنه و ایشؤنئه مکافات ببون.
10ایشونِ چوشمون تار ببون تا مننیسه بون بینن،
و ایشونِ کَمرون همیشک هچمسه بومونه.»
11پس واپورسنم: یعنی اوشون گراخوردن تا همیشک بکئن؟ هرگیز! بلکه اوشونِ نافرمونی همرا، غیر یهودیئن نجات بیتن، تا اسرائيلِ مردوم مئن غیرت بوجود با. 12ولی اگه اوشونِ تقصیرون دنیا ثروتمند بوده و ایشونِ دباختن غیر یهودیئنَ ثروتمند بوده، پس وقتی کی یهود مردوم کامیلا نجات بیاجن چنی ویشتر فراوؤنی باعیث بنه!
13ایسه، شمه غیر یهودیئنِ هما گب زِئدرم. اوراراجی کی مو غیر یهودیئنِ رسول ایسم، می خدمت ئبه خیلی ایفتخار کونم، 14ای اميد همرا كی می هم نژادونَ غیرتی بوکونم و بعضی از اوشونَ نجات بدئم. 15چونکی اگه، ایشونِ ردَ بونِ معنی، خدا آشتی دنیا همرأ ایسه، ایشونِ قبولابون چیچی معنی خا بداره، جوز بمردئان أجی زینده وابون؟ 16اگر یک تیکه خمیر اجی کی نوبری واسی خُدا به پیشکش بنه، مقّدس ببون، پس ایطوری، تموم او خمیر مقّدس ایسه؛ و اگه بنه مقّدس ببون، پس خالونَم مقّدس ایسن.
17ولی اگه بعضی از خالون ببئه بوبؤن و تو کی وحشی زیتونِ خال بی، الباقی خالونِ هما زیتون دارَ پیوند بخوردی و ایسه زیتون دار بَنه شیره اجی کی مقویه خونی، 18او خالونِ به گولاز نوکون. اگه ایطو کونی، تا یاد دبون کی تو نیی کی بنهَ دَانی، بلکی بنه تأ دَانه. 19شايد بوگوی: « خالون ببئه بوبون تا مو پيوند بخورم.» 20راسسه گونی. ولی اوشون، ایمون نداشتنِ واسی ببئه بوبون و تو فقط تی ايمونِ خاطیری ایسای. پس غرور ندار بلکی بترس. 21چونکی اگه خُدا طبیعی خالونِ به رحم نوده، تی واسی هم رحم نوکونه.
22پس خُدا سخت گیری و مهربونیَ یادانوکون: سخت گیری اوشونِ به کی ایمون اجی بکتن، ولی تی همأ مهربونه، البته به ای شرط کی اونِ مهربونی مئن ثابیت بومونی؛ نوئلا تنأم ببئه بنی. 23اگه اوشونم ایمون نداشتنَ دومباله ندئن، هندئرم پیوند خونن، چونکی خُدا تینه اوشونَ هنده پیوند بزنه. 24چونکی اگه تو وحشی زیتون دار اجی ببئه بوبوی و بر خلافِ تی طبیعت زیتون دارَ کی آزاده پیوند بخوردی، پس چنی ویشتر اصلی خالون تینن به او زیتون داری کی اون اجی ببئه بوبون، پیوند بخورن.
اسرائیل مردوم نجاتِ راز
25ای برارون، نخوانم کی ای راز اجی غافیل ببین - نبون کی خودتونَ دونا بودونین - کی سخت دیلی یک قسمت از اسراییل مردوم سر حکمفرما بوبو، تا اوشون تعداد کی قرار ایسه غیر یهودیئنِ مئن مسیحه ایمؤن بأرن، کامیل ببون. 26و ایطوری تموم اسرائیل مردوم نجات گینن. هوطوکی مقدس بنویشته ئان مئن بنویشته هننا:
«صهیون اجی یگ نفر هنه کی نجات دِئنه،
و بی دینیَ یعقوبِ جد اجی گینه.
27و می ای عهد ایشونِ همرا مونه
او زمت که ایشونِ گنائانَ ویگیرم.»
28انجیل باره، یهودئن شیمئه خاطیری دوشمنن: ولی خُدا اینتخاب واسی، پئرونِ خاطیری، خُدا به عزیزن. 29چونکی خُدا هرگی خوشه دعوت و هدیه ئانَ پَس نگینه. 30دُرست هوطو کی شمه یک زمون نسبت به خُدا نافرمونی گودین، ولی ایسه یهودیئن نافرمونی واسی مورد رحمت خدا قرار بیتین، 31پس الون ایشونم نافرمونابون تا خُدا رحمت واسی شیمئبه، الون اوشونِ به هم رحم ببون. 32چونکی خُدا همه تهَ نافرمونی گیرفتار بوده، تا همه ته به رحم بوکونه. 33وای، کی خُدا دولتمندی و حکمت و دونایی چندی جلفه؛ اونِ داوری ئنَ نشانه وامج دمج گودن و اونِ راهونَ نشانه فهمسن.
34«چون، کیسه کی خُدا فیکرَ بودونه
یا کی اونِ هما مشورت بوده؟»
35«کیسه کی یک چی خُدا ببخشئه بی
تا اونَ پسادا ببون؟»
36چونکی همه چی اون اجی ایسه، و بواسطه او، و اونِ شئه.
تا ابد اون ئبه جلال دبون. آمین.
Currently Selected:
نؤمه رومیان ئبه 11: EGB
Highlight
Share
Copy
Want to have your highlights saved across all your devices? Sign up or sign in
@ 2024 Korpu Company
