اِشَعیا 2
2
ربّئن داغی
(مئکا ۴:۱-۳)
1آموص اوغلو اِشَعیانین یهودا و اورشلئم باره‌سئنده گؤردوکلری:
2آخیر گونلرده ربّئن اِوی اولان داغ،
داغلارین باشچیسی کئمی مؤحکم دوراجاق،
تپه‌لردن یوخاری اوجالاجاق.
بوتون مئلّتلر اونا ساری گله‌جک.
3چوخ خالقلار گلئب دئیه‌جک:
«گلئن، ربّئن داغینا،
یعقوبون تاریسینین اِوئنه قالخاق،
قوی او بئزه اؤز یوللارینی اؤیرَتسئن،
بئز ده اونون طرئقلری ائله گِدَک.»
چونکی شرئعت صحیوندان،
ربّئن سؤزو اورشلئمدن یاییلاجاق.
4مئلّتلر آراسیندا رب حؤکم اده‌جک،
چوخ خالقلار حاقّیندا قرار چیخارداجاق.
اونلار قیلینجلاری چکوجلارلا دؤیوب اونلاردان کوتان،
نئزه‌لرئندن ده شَنه دوزَ‌لده‌جکلر.
مئلّت مئلّتئن ضئدّئنه قیلینج قالدیرمایاجاق،
آرتیق موحارئبه اتمه‌یی اؤیرَنمیه‌جک.
5ای یعقوب نسلی، گلئن ربّئن نوروندا گَزَک.
ربّئن گونو
6یارب، خالقینی، یعقوب نسلئنی آتیبسان،
چونکی اونلار شرقدن گلن مؤوهوماتلارا قوشولوبلار،
فئلئسط بؤلگه‌سئنده یاشایانلار کئمی فالچیلیق ادئرلر،
اَجنبی‌لرله اَل‌بئر اولورلار.
7اؤلکه‌لری قیزیل گوموشله دولو،
خزئنه‌لرئنئن آخیری یوخدور.
اؤلکه‌لری دؤیوش آتلارلا دولودور،
دؤیوش عارابالاری ساییسیز-حسابسیزدیر.
8اؤلکه‌لری بوتلرله ده دولودور،
اَل‌لرئنئن ائشئنی، بارماقلارینین دوزَلتدئکلرئنی
پرستئش ادئرلر.
9بونا گؤره ده هامی یِره سَرئله‌جک،
هر کس دئز اوسته دوشدوروله‌جک.
یارب، اونلاری باغیشلاما!
10ربّئن دهشتئندن، عظمتئنئن شؤوکتئندن
قایالیقلارا گدئن، تورپاق آلتیندا گئزله‌نئن.
11آداملارین تکبّورلو باخیشلاری آلچالدیلاجاق،
ائنسانلارین تکبّورو قیریلاجاق،
او گون آنجاق رب اوجالدیلاجاق.
12چونکی قوشونلار ربّئنئن بئر گونو اولاجاق کی،
بوتون تکبّورلولری، لووغالیق ادنلری، مغرورلاری آلچالتسین.
13لوبنانین بوتون اوجا و ووقارلی سئدر آغاجلارینی محو اده‌جک،
بوتون باشانین پالیدلارینی یوخ اده‌جک.
14بوتون اوجا داغلاری، اوجا تپه‌لری،
15بوتون اوجا بورجلری،
قالا دووارلاری یِرله یکسان اده‌جک،
16بوتون تَرشئش گَمی‌لرئنی، #2.16 تئجارت گَمئلری
بوتون گؤزل گَمئلری یوخ اده‌جک.
17آداملارین تکبّورو قیریلاجاق،
ائنسانلارین تکبّورو آلچالدیلاجاق،
او گون فقط رب اوجالدیلاجاق.
18بوتلر کامئل آرادان گؤتوروله‌جک.
19رب قالخیب یری لرزه‌یه سالاندا،
اونون دهشتئندن، عظمتئنئن شؤوکتئندن،
ائنسانلار قایالیقداکی ماغارالارا،
یِرئن خندق‌لرئنه قاچیب گئره‌جکلر.
20او گون ائنسانلار، پرستئش اوچون دوزَلتمئش
قیزیل و گوموش بوتلرئنی گؤتوروب،
کور سئچانلارین، خوفّاشلارین قاباغینا آتاجاقلار کی،
21رب یری تئتره‌تمه‌یه قالخارکَن
اونون دهشتئندن، عظمتئنئن شؤوکتئندن،
قایالیقداکی چاتلاقلارا، اوچوروملارداکی یاریقلارا گئرسئنلر.
22نفسی بورنونون دِشئیئنده اولان فانی ائنسانا آرخالانمایین.
اونون نه دَیَری وار کی؟
@ 2022 Korpu Company