تثنئیه 28
28
برکتلر
(لاو. ۲۶:۳-۱۳، تثنئیه ۷:۱۲-۲۴)
1اگر تارینیز ربدن دئقّتله ائطاعت ادئب بو گون سئزه بویوردوغوم بوتون امرلرئنه عمل ادهسئنئز، تارینیز رب سئزی یر اوزوندهکی بوتون مئلّتلردن اوستون ادهجک. 2اگر تارینیز ربدن ائطاعت ادهسئنئز، بوتون بو برکتلر سئزه گلهجک و اوستونوزده قالاجاق.
3شهرده و چؤلده خیئر-دوعالی اولاجاقسینیز.
4دوغولان اؤولادلارینیز، تورپاغینیزین محصولو، حیوانلارینیزین، مال-حیوان و قویون-کچئلرئنئزئن بالالاری برکتلی اولاجاق.
5سبد و خمئر تاغارینیز برکتلی اولاجاق.
6هر گئرئشئنئز، هر چیخیشینیز برکتلی اولاجاق.
7رب سئزه هوجوم ادن دوشمنلرئنئزی قاباغینیزدا مغلوب ادهجک. اونلار سئزه بئر یولدان هوجوم اِدنده قاباغینیزدان یدّی یوللا قاچاجاقلار.
8رب آنبارلارینیزا، اَل آتدیغینیز هر ائشه برکت امر ورهجک، و تارینیز رب سئزه ورهجیی تورپاغا برکت یاغدیراجاق.
9اگر تارینیز ربّئن امرلرئنی ساخلایاسینیز و اونون یوللاری ائله گدهسئنئز، رب، آند ائچدئیی کئمی، سئزی اؤزو اوچون موقدّس بئر خالق کئمی برقرار ادهجک. 10یر اوستوندهکی بوتون خالقلار ربّئن آدی ائله چاغیریلدیغینیزی گؤروب سئزدن قورخاجاقلار. 11رب سئزه ورمهیه آتالارینیزا آند ائچدئیی تورپاقدا سئزی بوللوق ائچئنده یاشاداجاق. دوغولان اؤولادلارینیزین نسلئنی چوخالداجاق، حیوانلارینیزین بالالارینی، تورپاغینیزین محصولونو آرتیملی ادهجک. 12رب تورپاغینیزا یاغیشی واختلی-واختیندا یاغدیراجاق و اَلئنئزئن بوتون زحمتئنه برکت ورمک اوچون گؤیلردن وارلی خزئنهسئنی آچاجاق. سئز بئر چوخ مئلّتلره بورج ورهجکسئنئز، لاکئن هچ کئمدن بورج آلمایاجاقسینیز. 13رب سئزی قویروق یوخ، باش ادهجک. اگر بو گون سئزه امر اتدئیئم تارینیز ربّئن امرلرئنه قولاق آساسینیز، اونلارا دئقّتله عمل ادهسئنئز، آشاغیدا یوخ، آنجاق یوخاریدا اولاجاقسینیز. 14بو گون سئزه امر اتدئیئم سؤزلردن کنارا، صاغا-سولا چیخمایین، آیری آللاهلارین دالینجا گتمهیئن، اونلارا قوللوق اتمهیئن.
لعنتلر
(لاو. ۲۶:۱۴-۴۶)
15آمّا اگر تارینیز ربدن ائطاعت اتمیهسئنئز، بو گون سئزه امر اتدئیئم امرلرئن و قایدالارین هامیسینی یرئنه یتئرمهیهسئنئز، بوتون بو لعنتلر سئزی یاخالایاجاق.
16شهرده و چؤلده ملعون اولاجاقسینیز.
17سبد و خمئر تاغارینیز لعنت آلتیندا اولاجاق.
18دوغولان اؤولادلارینیز، تورپاقلارینیزین محصولو، مال-حیوان و قویون-کچئلرئنئزئن بالالاری لعنت آلتیندا اولاجاق.
19هر گئرئشئنئز، هر چیخیشینیز لعنتلی اولاجاق.
20رب اَل آتدیغینیز هر ائشده اوستونوزه لعنت گؤندرهجک، سئزی واهئمهیه سالیب چارهسئز قویاجاق، اله کی، محو اولوب تزلئکله آرادان گدهسئنئز، چونکی ربدن اوز دؤندَرئب پئس عمللر ادئبسئنئز. 21رب سئزی وبایا دوچار ادهجک، اله کی، مولک آلماق اوچون گدهجَیئنئز تورپاقدان یوخ اولاسینیز. 22او سئزی وَرَم، قیزدیرما، ائلتئهاب، قوووران ائستئلئک، قوراقلیق#28.22 و یا قیلینج، سَموم کولهیی و کوفله جزالاندیراجاق. سئز یوخ اولونجایا قدر بونلار سئزدن اَل چکمهیهجک. 23باشینیز اوستونده اولان گؤیلر بورونج، آیاغینیز آلتینداکی یر ده دمئر اولاجاق. 24رب تورپاغینیزا یاغیش عوضئنه توز-تورپاق یاغدیراجاق. سئز هلاک اولونجایا قدر گؤیدن اوستونوزه بونلار یاغاجاق.
25رب سئزی دوشمنلرئنئزئن قاباغیندا مغلوب ادهجک؛ اونلارا بئر یولدان هوجوم اِدنده، قاباقلاریندان یدّی یوللا قاچاجاقسینیز. دونیانین بوتون اؤلکهلرئنه دهشتلی عئبرت اولاجاقسینیز. 26جسدلرئنئز گؤیدهکی بوتون قوشلارا، یردهکی حیوانلارا یِم اولاجاق، اونلاری اورکودوب قووان اولمایاجاق. 27رب سئزی صاغالماز مئصئر چئبانلاری، شئشلر، خورالار و قوتورلارلا جزالاندیراجاق. 28او سئزی جزالاندیریب، دَلی و کور ادهجک، اورهیئنئزی ده قوبارلاداجاق. 29کور بئر آدام نجه قارانلیقدا اَل توخوندورا-توخوندورا گزئر، سئز ده گون اورتاچاغی اِله گَزهجکسئز. یوللارینیز اوغورسوز اولاجاق، ائضطئراب چکئب دائم تالان اولاجاقسینیز. سئزی قورتاران دا اولمایاجاق.
30نئشانلاندیغینیز قیزلا آیریسی یاتاجاق. تئکدئیئنئز اِوده یاشامایاجاقسینیز. سالدیغینیز باغین محصولونو دَرمَیهجکسئنئز. 31اؤکوزونوز گؤزونوز قاباغیندا کَسئلهجک، اَتئندن یِمیهجکسئنئز. اِششهیئنئز سئزدن زورلا آلیناجاق و گری قایتاریلمایاجاق. قویونونوز دوشمنلرئنئزه ورئلهجک و سئزی قورتاران اولمایاجاق. 32اوغوللارینیز و قیزلارینیز گؤزونوز قاباغیندا آیری بئر خالقا تسلئم ادئلهجک و اونلارین حسرتئندن گونبهگون گؤزلرئنئزئن نورو سؤنهجک. اَلئنئزدن ده هچ نه گلمیهجک. 33تورپاغینیزین و بوتون زحمتئنئزئن محصولونو تانیمادیغینیز بئر خالق یئیهجک، لاکئن سئز همئشه ائضطئراب چکئب اَزئلهجکسئنئز. 34گؤزلرئنئزله گؤردوکلرئنئز سئزی دَلی ادهجک. 35رب دئزلرئنئزه، باجاقلارینیزا تپهدن دیرناغا قدر صاغالماز آغریلی چئبانلار چیخارداجاق.
36رب سئزی، اؤز اوستونوزه تعیئن ادهجیئنئز پادشاهلا بئرلئکده اله بئر مئلّته اسئر آپارتدیراجاق کی، نه اؤزونوز اونلاری تانیییرسینیز نه ده آتالارینیز. اورادا آغاجدان، داشدان دوزَلدئلمئش باشقا آللاهلارا قوللوق ادهجکسئنئز. 37ربّئن سئزی اسئر ادهجیی خالقلار آراسیندا، حیرت، مثل و کئنایه هدفئنه چِورئلهجکسئنئز.
38زَمئیه چوخ توخوم سَپئب، آز ییغاجاقسینیز، چونکی اونو چَیئرتکه یِیئب قورتاراجاق. 39اوزوم باغلاری سالیب بِجَرهجکسئنئز، لاکئن اوزوموندن دَرمهیئب شرابیندان ائچمیهجکسئنئز، چونکی اونلاری قورد یئیهجک. 40تورپاغینیزین هر طرفئنده زیتون آغاجلاری بئتسه ده، اونلاردان یاغ چکه بئلمیهجکسئنئز، چونکی زیتون آغاجلارینیز اؤز میوهسئنی تؤکهجک. 41اوغوللارینیز، قیزلارینیز اولاجاق، لاکئن یانینیزدا قالمایاجاق، چونکی اسئرلئیه آپاریلاجاقلار. 42بوتون آغاجلارینیزین و اَکئن ساحهلرئنئزئن بَهَرئنه چَیئرتکهلر داراشاجاق.
43آرانیزدا یاشایان یاد اِللی سئزدن اولدوقجا اوستون اولاجاق، و سئز اِندئکجه آشاغی اِنهجکسئنئز. 44سئزه او بورج ورهجک، سئز اونا بورج وره بئلمیهجکسئنئز، او باش، سئز آمّا قویروق اولاجاقسینیز.
45بو لعنتلرئن هامیسی سئزئن اوستونوزه تؤکولهجک. سئزی هلاک اولاناجاق قوووب یاخالایاجاقلار، چونکی تارینیز ربدن ائطاعت اتمهدئنئز و سئزه بویوردوغو امرلره و قایدالارا عمل اتمهدئنئز. 46بونلار سئزه و اؤولادلارینیزا ابدی بئر علامت و حیرت اولاجاق. 47مادام کی، بوللوق واختیندا تارینیز ربدن شادلیقلا، سِوئنَن اورَکله ائطاعت اتمهدئنئز، 48ربّئن سئزه ضئدّ گؤندَرهجیی دوشمنلره آج-سوسوز، چیلپاق و هر جور احتئیاج ائچئنده قوللوق ادهجکسئنئز. رب سئزی هلاک ادنه قدر بوینونوزا دمئر یوغ سالاجاق.
49رب اوزاقدان، دونیانین او بئری باشیندان بئر مئلّتی، دئلئنی باشا دوشمهدئیئنئز بئر مئلّتی چوللانانان قارتال کئمی باشینیزا گتئرهجک. 50بو اله رحمسئز بئر مئلّتدئر کی، نه قوجالارا حؤرمتی وار، نه ده اوشاقلارا رحمی گلئر. 51بو مئلّت سئزی هلاک ادئنجهیه قدر حیوانلارینیزین بالالارینی، تورپاغینیزین محصولونو یِیئب بئتئرهجک، سئزی محو ادهنه قدر، سئزئن اوچون نه تاخیل، نه تزه شراب، نه زیتون یاغی، نه مال-حیوانینیزین، نه ده قویون-کچئلرئنئزئن بالالارینی قویاجاق. 52بوتون شهرلرئنئزی موحاصئرهیه آلیب، اؤلکهنئزدهکی بِل باغلادیغینیز اوجا و مؤحکم دووارلارینیزی کامئل یرله بئر ادهجکلر. تارینیز ربّئن سئزه ورهجیی اؤلکهنئن بوتون شهرلرئنی موحاصئرهیه آلاجاقلار.
53موحاصئرهیه دوشَنده دوشمنلرئنئزئن سئزه ورهجیی آجلیقدان، دوغولان اؤولادلارینیزین، تارین ربّئن سئزه وردئیی اوغوللارینیزین و قیزلارینیزین اَتئنی یئیهجکسئنئز. 54آرانیزدا اورهیی نازئک و لاپ حسّاس آدام بِله، اؤز قارداشینا، سِودئیی آروادینا، صاغ قالان اؤولادلارینا دوشمن اولاجاق. 55یئیهجیی اوشاقلارین اَتئندن اونلارین هچ بئرئنه ورمهیهجک، چونکی موحاصئره اولوناندا دوشمنلرئنئزئن یاراتدیغی دارلیغا گؤره بوتون شهرلرئنئزده یمیه هچ نه قالمایاجاق. 56آرانیزدا اورهیی نازئک و حسّاس آرواد، ظرئفلئیئندن و نازئکلئیئندن آیاغینی یره باسماق ائستمهیَن آرواد بِله، سِودئیی اَرئنه، اؤز اوغلونا و قیزینا رحم اتمیهجک. 57بطنئندن چیخان جوفتو و دوغدوغو اوشاقلاری ورمهیئب گئزلی یئیهجک. چونکی بوتون شهرلرئنئز موحاصئرهیه دوشَنده آجلیق اولاجاق.
58اگر بو کئتابا یازیلمیش بو قانونون بوتون سؤزلرئنه دئقّتله عمل اتمیهسئنئز، تارینیز ربّئن عظمتلی و زَهملی آدیندان قورخمایاسینیز، 59رب سئزی و نسلئنئزی دهشتلی بلالارا، بؤیوک و قورتارمایان موصئبتلره، صاغالماز، آغیر ناخوشلوقلارا دوچار ادهجک. 60قورخدوغونوز بوتون مئصئر ناخوشلوقلارینی گئنه باشینیزا گتئرهجک، بو ناخوشلوقلارا توتولاجاقسینیز. 61بو شرئعت کئتابیندا یازیلمامیش هر جور ناخوشلوق و بلانی، رب سئزی یوخ ادنهجک باشینیزا گتئرهجک. 62گؤیدهکی اولدوزلار قدر چوخالماق عوضئنه ساییجا چوخ آز قالاجاقسینیز، چونکی تارینیز ربدن ائطاعت اتمهدئنئز. 63سئزه یاخشیلیق اتمک و آرتیرماقدان رب نجه راضی قالیردیسا، سئزی هلاک اتدئیی و یوخ اتدئیی اوچون ده اله راضی قالاجاق. مولک آلماق اوچون گدهجیئنئز اؤلکهدن قوپاریلاجاقسینیز.
64رب سئزی دونیانین بو باشیندان او بئری باشیناجاق بوتون خالقلارین آراسینا داغیداجاق. اورادا سئزئن ده، آتالارینیزین دا تانیمادیغی، آغاجدان و یا داشدان دوزَلدئلمئش باشقا آللاهلارا قوللوق ادهجکسئنئز. 65بو مئلّتلر آراسیندا نه راحاتینیز اولاجاق، نه ده آیاغینیز اوچون دئنجَلمَک یری. رب سئزه اورادا اورَک تئترهمهسی، گؤزلَمَکدن یورولان گؤزلر و اومئدسئزلئک ورهجک. 66جانینیزین قیدئنی چکهجکسئنئز، گجه-گوندوز واهئمه ائچئنده یاشایاجاقسینیز. حیاتینیزین آسایئشی اولمایاجاق. 67اورهیئنئزه دولان واهئمهدن و گؤزلرئنئزله گؤردویونوز حادئثهلر اوزوندن سحر اولاندا ”کاشکی آخشام اولایدی“، آخشام اولاندا دا ”کاشکی سحر اولایدی“ دئیهجکسئنئز. 68من سئزه دمئشدئم کی، گلدئیئنئز یولو تکرار گؤرمهیهجکسئنئز. رب سئزی گَمئلرله مئصئره گری قایتاراجاق. اورادا قول و کنئز کئمی دوشمنلرئنئزه اؤزونوزو ساتاجاقسینیز، لاکئن سئزی پوللا آلان اولمایاجاق.»
Currently Selected:
تثنئیه 28: SAB
Highlight
Copy
Compare
Share
Want to have your highlights saved across all your devices? Sign up or sign in
@ 2022 Korpu Company
