تثنئیه 14
14
قدغن اولان یاس مراسئمی
1سئز تارینیز ربّئن اؤولادیسینیز. اؤلَن اوچون بدنئنئزی یارالامایین و ساچینیزین قاباق طرفئنی قیرخمایین. 2چونکی سئز تارینیز ربّئن موقدّس خالقیسینیز. رب یر اوستونده اولان بوتون خالقلار آراسیندان سئزی سچئب کی، اونا مخصوص خالق اولاسینیز.
اَتی یِیئلن و یِیئلمهیَن حیوانلار
(لاو. ۱۱:۱-۴۷)
3ائیرنج بئر شی یمهیئن. 4بو حیوانلارین اَتئنی یئیه بئلرسئنئز: اؤکوز، قویون، کچی، 5مارال، جیران، خاللی مارال، داغ کچئسی، غزال، آهو، داغ قویونو. 6حیوانلاردان کامئل قوشا دیرناقلی اولان و گؤوشهیَن حیوانلارین هامیسینین اَتئندن یئیه بئلرسئنئز. 7لاکئن گؤوشهیَن و یا قوشا دیرناقلی اولان بو حیوانلارین اَتئنی یِمهیئن: دَوه، دووشان، و قایا دووشانی. چونکی اونلار گرچی گؤوشهیئرلر، لاکئن قوشا دیرناقلی دیئللر. بونا گؤره سئزئن اوچون حارامدیرلار. 8لاکئن دونگوز قوشا دیرناقلی اولسا دا، گؤوشهمئر، او سئزئن اوچون حارامدیر. اونلارین نه اَتئنی ییئن، نه ده لِشئنه توخونون.
9سولاردا یاشایان حیوانلاردان اوزمَک بالهلری و پولجوقلاری اولانلارین هامیسینی یئیه بئلرسئنئز. 10آمّا اوزمَک بالهلری و پولجوقلاری اولمایانلارین هچ بئرئنی یمهیئن؛ اونلار سئزه حارامدیر.
11بوتون تمئز قوشلارین اَتئندن یئیه بئلرسئنئز. 12لاکئن بو قوشلارین اَتئنی یمهمهلیسئنئز: قارتال، کِچَله کرکس، قارا کرکس، 13چالاغان، شاهئن، چالاغان جئنسئندن اولانلار، 14بوتون قارغا جئنسئندن اولانلار، 15بایقوش، قارتال بایقوشو، دهنز قوشو، قیرغی جئنسئندن اولانلار، 16بالا بایقوش، بؤیوک بایقوش، آغ بایقوش، 17چؤل بایقوشو، لِش کرکسی، قاراباتداق، 18لِیلَک، بوتون بالیقاودان جئنسئندن اولانلار، شاناپئپئک، خوفّاش. 19قانادلی قایناشان حیوانلار سئزئن اوچون حارامدیر، یمهیئن. 20قانادی اولان تمئز حیوانلارین هامیسینی یئیه بئلرسئنئز.
21اؤلو حالدا تاپیلان حیوان اَتئندن یمهیئن. شهرئنئزده اولان اَجنَبئیه وره بئلرسئنئز کی، یسئن، یا دا یاد اِللیلره ساتا بئلرسئنئز. لاکئن سئز تارین ربّئن موقدّس خالقیسینیز. کچی بالاسینی آناسینین سودونده پئشئرمهیئن.
اوندابئر حئصّهیه عایید قایدا
22ائل به ائل زمئلرئنئزده بئتَن بوتون محصوللارین اوندا بئر حئصّهسئنی گرک آییراسینیز. 23همئشه تارینیز ربدن قورخماغی اؤیرنمَک اوچون تاخیلینیزین، تزه شرابینیزین، زیتون یاغینیزین اوندا بئر حئصّهسئنی، مال-حیوانینیزین، قویون-کچئلرئنئزئن ائلک بالالارینی تارینیز ربّئن حوضوروندا، اؤز آدینا مسکن سچدئیی یرده ییئن. 24اگر تارینیز ربّئن اؤز آدینا مسکن سچهجیی یر سئزدن چوخ اوزاقدادیر و یولون اوزاقلیغیندان سئز تارینیز ربّئن سئزه برکت وردئیی محصوللارین اوندا بئر حئصّهسئنی اورایا آپارا بئلمئرسئنئز، 25او زامان بونلاری ساتیب پولا چِوئرئن، و بو پولو گؤتوروب تارینیز ربّئن سچهچیی یره گدئن. 26بو پوللا اورهیئنئز ائستهدئیئنی آلین: مال-حیوان، سورو، شراب، کفلَندئرئجی ائچکی، و یا اورهیئنئزئن ائستهدئیئنی؛ سئز و اِوئنئزئن اهلی اورادا تارینیز ربّئن قاباغیندا یِیئب شادلیق ادئن. 27شهرلرئنئزده یاشایان لاوئلیلری یاددان چیخارتمایین، چونکی اونلارین سئزئنله بئرلئکده پایی و ائرثی تورپاغی یوخدور.
28هر اوچ ائلئن آخیریندا، اوچونجو ائلده بئتَن بوتون محصولونوزون اوندا بئر حئصّهسئنی چیخاردیب شهرلرئنئزده آنبار ادئن. 29سئزئنله بئرلئکده پایی و ائرثی تورپاغی اولمایان لاوئلیلر، شهرلرئنئزده اولان قرئبلر، یِتئملر و دوللار قوی گلئب بوندان دویونجا یسئنلر. بله ادئن کی، تارینیز رب سئزه اَلئنئزئن بوتون زحمتئنده برکت ورسئن.
Currently Selected:
تثنئیه 14: SAB
Highlight
Copy
Compare
Share
Want to have your highlights saved across all your devices? Sign up or sign in
@ 2022 Korpu Company
