۲سمویئل 12
12
ناتان پیغمبرئن داوودا مزمّتی
1رب ناتانی داوودون یانینا گؤندَردی. ناتان اونون یانینا گلئب اونا ددی: «بئر شهرده ائکی آدام وار ائدی. اونلاردان بئری وارلی، او بئری ده کاسیب ائدی. 2وارلی آدامین چوخلو سورولری و ناخیری وار ائدی. 3لاکئن کاسیب آدامین هچ بئر شیی یوخ ائدی مگر ساتین آلیب بَسلهدئیی بئر کؤرپه دئشی قوزو. او، قوزوسونو اؤز یانیندا اوشاقلاری ائله برابر بؤیوتموش، اونا اؤز یِمهیئندن یدئرتمئش، اؤز ائچدئیی قابدان سو ائچئرتمئش و قوینوندا یاتیرتمیشدی. قوزو اونا دوغما قیزی کئمی ائدی. 4بئر گون وارلی آدامگئله بئر موسافئر قوناق گلدی. وارلی آدام قییمادی کی، اؤز سوروسوندن و ناخیریندان حیوان گؤتوروب کَسسئن و اونلارا گلن قوناغا یمک حاضیرلاسین. او گدئب کاسیبین قوزوسونو گؤتوروب کسدی و یانینا گلن قوناغا یمک حاضیرلادی.» 5بو واخت داوودون قضبی او آدامین ضئدّئنه آلوولاندی و ناتانا ددی: «وار اولان ربّئن حاقّی اوچون، بونو ادن آدام اؤلومه لایئقدئر. 6بو ائشی گؤردویونه گؤره، رحم اتمهدئیئنه گؤره، قوزونون عوضئنی دؤرد قات ورهجک.»
7او واخت ناتان داوودا ددی: «او آدام سنسن! ائسرایئلئن تاریسی رب بله دیئر: ”من ائدئم کی، سنی ائسرایئلئن اوستونده پادشاه مسح اتدئم. من ائدئم کی، سنی شاعولون اَلئندن قورتاردیم. 8سنه آغانین اِوئنی ده وردئم. آغانین آروادلارینی قوینوندا یاتیردیب، ائسرایئل و یهودا نسلئنی سنه وردئم. اگر بو سنه آزلیق اولسایدی، سنه بله شیلردن داها چوخونو علاوه اِدَردئم. 9نه اوچون ربّئن سؤزونه حقارتله باخیب، ربّئن گؤزونده پئس اولان ائشی اتدئن؟ خئتلی اورئیانی قیلینج آغزیندان کچئرتدئن، اونون آروادینی اؤزونه آرواد اتدئن. اورئیانی عَمّون اؤولادلارینین قیلینجی ائله اؤلدورتدون. 10بوندان سونرا هچ واخت قیلینج سنئن اِوئندن آیریلمایاجاق، چونکی سن منی تحقئر اتدئن و خئتلی اورئیانین آروادینی اؤزونه آرواد اتدئن.“ 11بونا گؤره ده رب دیئر: ”باخ سنئن ضئدّئنه پئسلئیی اؤز اِو اهلئندن چیخارداجاغام. سنئن گؤزونون قاباغیندا حتّا آروادلارینی گؤتوروب یاخینینا ورهجیم. او دا گوندوزون گوناورتا چاغی سنئن آروادلارینلا یاتاجاق. 12بو ائشی سن گئزلی اتدئن، آمّا من بو ائشی بوتون ائسرایئللیلرئن قاباغیندا گوندوزون گوناورتا چاغی ادهجیم.“»
13داوود ناتانا ددی: «من ربّئن ضئدّئنه گوناه اتمئشم.» ناتان داوودا ددی: «رب ده سنئن گوناهینی سئلئبدئر، اؤلمهیهجکسن. 14لاکئن بونو اتمکله ربّئن دوشمنلرئنه بؤیوک فورصت ورئبسن کی، اونا کوفر دسئنلر. اونا گؤره ده قطعن سندن دوغولان اوشاق اؤلهجک.»
داوودون اوشاغینین اؤلومو
15سونرا ناتان اِوئنه قاییتدی. رب داوودون اورئیانین دول آروادیندان اولان اوشاغینی ووردو و اوشاق ناخوشلادی. 16داوود اوشاق اوچون تارییا یالواردی. اوروج توتوب گتدی و بوتون گجهنی قورو یرده اوزاندی. 17اِوئنئن آغساقّاللاری اونو یردن قالدیرماق اوچون یانیندا دایاندیلار، لاکئن او قالخماق ائستمهدی و اونلارلا بئرلئکده چؤرک یمهدی. 18یدّئنجی گون کؤرپه اؤلدو. داوودون اعیانلاری قورخدولار کی، اوشاغین اؤلدویونو اونا بئلدئرسئنلر و بله دوشوندولر: «اوشاق صاغ ائکَن اونو دئله توتدوق، لاکئن سؤزوموزه قولاق آسمادی. ائندی اوشاغین اؤلدویونو اونا نجه دئیَک؟ اؤزونه بئر زئیان یتئرَر.» 19داوود اعیانلارینین پیچیلداشماسینی گؤرنده باشا دوشدو کی، اوشاق اؤلوب. اونا گؤره ده اعیانلارینا ددی: «آیا اوشاق اؤلدو؟» اونلار ددئلر: «اؤلدو.» 20داوود یردن قالخدی، یویونوب باشینا زیتون یاغی سورتدو و پالتارلارینی دَیئشئب، ربّئن اِوئنه گتدی و پرستئش اتدی. اِوه قاییدیب یمک ائستهیئنده قاباغینا یمک قویدولار و او یدی. 21او واخت اعیانلاری اونا ددئلر: «بو نه ائشدئر کی، ادئرسن؟ کؤرپه صاغ ائکن نه اوچون اوروج توتوب آغلادین، آمّا کؤرپه اؤلَنده دوروب چؤرک یدئن؟» 22داوود جاواب وردی: «اوشاق صاغ اولاندا اوروج توتوب آغلاییردیم و دیئردئم کی، بلکه رب منه لوطف اِدَر، اوشاق صاغ قالار. 23لاکئن ائندی اوشاق اؤلوب، نه اوچون اوروج توتوم؟ مگر اونو گری قایتارا بئلهرم؟ من اونون یانینا گدهجیم، لاکئن او منئم یانیما قاییتمایاجاق.»
سولِیمانین آنادان اولماسی
24داوود آروادی بَتشِبَعه تسلّی وردی و یانینا گئرئب اونونلا یاتدی. بَتشِبَع اونا بئر اوغول دوغدو و داوود اونون آدینی سولِیمان#12.24 عئبرانی دئلئنده «صولح» سؤزو ائله همئن رئشهدن گلئر قویدو. رب بو اوشاغی سِودی 25و ناتان پیغمبرئن وسئلهسیائله سؤز گؤندَردی. او دا ربّئن آدینا اوشاغین آدینی یِدئدیاه #12.25 عئبرانی دئلئنده «ربّئن سِوئملئسی»قویدو.
تزهدن موحارئبهنئن باشلانماسی
(۱سال. ۲۰:۱-۳)
26یوآب عَمّون اؤولادلارینین رَبّا شهرئنه هوجوم ادئب شاهنشئن شهری آلدی. 27سونرا یوآب داوودون یانینا قاصئدلر گؤندَرئب ددی: «رَبّا شهری ائله موحارئبه ادئب سو منبعلرئنی آلمیشام. 28آمّا ائندی سن خالقین قالان حئصّهسئنی بئر یره ییغ و شهرئن ضئدّئنه اوردوگاه قوروب اورانی آل. یوخسا من گدئب شهری آلارام و بو ائش منئم آدیما چیخار.» 29بلهجه داوود دا بوتون خالقی ییغیب رَبّا شهرئنه گتدی و شهره هوجوم ادئب اورانی آلدی. 30سونرا اونلارین پادشاهینین#12.30 و یا «مولِک بوتونون» باشیندان تاجینی گؤتوردو. تاج قیزیلدان اولوب چکئسی بئر تالانت#12.30 تقرئبن ۵/۳۴ کئلو ائدی. اونون اوستونده قئیمتلی بئر داش وار ائدی. بو تاج داوودون باشینا قویولدو. داوود بو شهردن چوخلو قنئمت آپاردی. 31او، شهرده اولان خالقی کؤچوردوب اَره، دمئر کولونگ، دمئر بالتا ائله گؤرولَن ائشلرده و کرپئج اِعمالیندا ائشلَتدی. داوود عَمّونلولارین بوتون شهرلرئنده بله ادندن سونرا، بوتون خالقلا بئرلئکده اورشلئمه قاییتدی.
Currently Selected:
۲سمویئل 12: SAB
Highlight
Copy
Compare
Share
Want to have your highlights saved across all your devices? Sign up or sign in
@ 2022 Korpu Company
