۲پادشاهلار 5
5
نَعَمانین جوزامدان شفا تاپماسی
1اَرام پادشاهینین قوشون باشچیسی نَعَمان آغاسینین یانیندا حؤرمت و اعتئبار صاحئبی ائدی، چونکی رب اونون واسئطهسیائله اَراما ظفر ورمئشدی. او، جسور بئر دؤیوشچو ائدی، لاکئن جوزاملی#5.1 عئبرانی دئلئنده «جوزام» ترجومه اولموش سؤز، گِنئش بئر شکئلده چوخ دَری ناخوشلوقلارینی اؤزونده توتوردو. ائدی. 2اَراملیلار دستهلرله چیخیب ائسرایئل تورپاغیندان کئچئک بئر قیزی اسئر گؤتورموشدولر. بو قیز نَعَمانین آروادینین یانیندا قالیردی. 3او، خانیمینا ددی: «کاشکی آغام سامئرهده اولان پیغمبرئن یانیندا اولسایدی. او زامان پیغمبر اونون جوزامینا شفا وِرَردی.» 4نَعَمان گتدی و آغاسی ائله دانیشیب اونا ددی: «ائسرایئل تورپاغیندان اولان قیز فئلان و بَهمان ددی.» 5اَرام پادشاهی ددی: «گت، من ائسرایئل پادشاهینا بئر مکتوب گؤندَرهرم.» نَعَمان اؤزو ائله آلتی مئن شِکِل#5.5 تقرئبن ۶۹ کئلو قیزیل، اون تالانت#5.5 تقرئبن ۳۴۵ کئلو گوموش و اون دست پالتار گؤتوروب گتدی. 6مکتوبو دا ائسرایئل پادشاهینا گتئردی. اورادا بله یازیلمیشدی: «ائندی بو مکتوبلا برابر قولوم نَعَمانی دا یانینا گؤندَرمئشم کی، سن اونون جوزامینا شفا ورهسن.» 7ائسرایئل پادشاهی مکتوبو اوخویاندا پالتارینی جیریب ددی: «مگر من تارییام کی، اؤلدوروب دئرئلدَم؟ نئیه بو آدام منئم یانیما سؤز گؤندَرئر کی، بئر آداما جوزامیندان شفا ورئم؟ دئقّت ادئن و گؤرون کی، منئمله داعوا اتمک اوچون نجه بهانه آختاریر.»
8تاری آدامی اِلئشَع ائسرایئل پادشاهینین اؤز پالتارینی جیردیغینی اشئدنده اونا خبر گؤندَرئب ددی: «نه اوچون پالتارینی جیردین؟ قوی ائندی او منئم یانیما گلسئن و بئلسئن کی، ائسرایئلده بئر پیغمبر وار.» 9نَعَمان آتلاری و دؤیوش عاراباسی ائله گلدی و اِلئشَعئن اِوئنئن قاپیسیندا دایاندی. 10اِلئشَع اونون یانینا قاصئد گؤندَرئب ددی: «گت، اوردون چاییندا یدّی دفه یویون، بدنئن صاغالیب جوزامدان تمئز اولارسان.» 11آمّا نَعَمان قضبلهنئب گتدی و ددی: «باخ، گومان ادئردئم کی، اِشئیه چیخیب یانیما گلهجک، دوروب تاریسی ربّئن آدی ائله چاغیریب اَلئنی جوزاملی یرئن اوستونده یِللهیئب شفا ورهجک. 12مگر دَمَشقئن چایلاری اَبانا و فَرپَر، ائسرایئلئن بوتون سولاریندان داها یاخشی دیئل؟ مگر اونلاردا یویونوب تمئز اولا بئلمزدئم؟» بلهجه حئرصله دؤنوب گتدی.
13نَعَمانین آداملاری اونون یانینا گلدئلر و اونونلا دانیشیب ددئلر: «ای آتامیز، اگر پیغمبر سنه بؤیوک بئر شی امر اتسَیدی، مگر اونا عمل اتمَزدئن؟ بس نه قدر چوخ ائندی کی، سنه ”یویون و تمئز اول“ دیئر.» 14بوندان سونرا نَعَمان تاری آدامینین سؤزونه گؤره اوردون چایینا اِنئب، یدّی دفه سویا باتیب چیخدی. اونون بدنی صاغالدی و بئر کؤرپه بدنی کئمی تمئز اولدو.
15نَعَمان بوتون دستهسی ائله گئنه تاری آدامینین یانینا گلدی و اونون قاباغیندا دایانیب ددی: «باخ، ائندی بئلدئم کی، ائسرایئلدن باشقا، دونیانین هچ بئر یرئنده تاری یوخدور. بویور، ائندی بو قولونون هدئیّهسئنی گؤتور.» 16لاکئن اِلئشَع ددی: «حوضوروندا دوردوغوم وار اولان ربّه آند اولسون کی، هچ نه گؤتورمیهجیم.» نَعَمان گؤتورمَیی تأکئد اتدی، لاکئن اِلئشَع ائستمهدی. 17نَعَمان ددی: «اگر گؤتورمورسن، اوندا قوی بو قولونا بورادان ائکی قاطیر یوکو تورپاق ورئلسئن. چونکی بو قولون آرتیق آیری آللاهلارا یوخ، فقط ربّه یاندیرما قوربانلاری و قوربانلار گتئرهجک. 18آنجاق رب بو ائشی قولونا باغیشلاسین: آغام پادشاه پرستئش اوچون رئمّون معبدئنه گئرَنده، منئم اَلئمه سؤیکهنئر. من ده رئمّون معبدئنده سجده اتمهلییَم. اورادا سجده اتدئیئمی رب قولونا باغیشلاسین.» 19اِلئشَع اونا ددی: «سالامات گت.» نَعَمان اونون یانیندان چیخیب بئر آز یول گتدی.
20آمّا تاری آدامی اِلئشَعئن نؤکری گِخَزی دوشوندو: «باخ، آغام ائستمهدی کی، بو اَراملی نَعَماندان گتئردئیی شیی گؤتورسون. وار اولان ربّه آند اولسون کی، اونون دالینجا قاچیب اوندان بئر شی آلاجاغام.» 21گِخَزی نَعَمانین دالینجا قاچدی. نَعَمان دالینجا بئر نفرئن گلدئیئنی گؤرنده، اونو پئشواز اتمک اوچون عارابادان دوشوب ددی: «خیئر اولا؟» 22گِخَزی ددی: «خیئردئر. آغام منی گؤندَردی کی، سنه دِیئم: ”اِله ائندئجه اِفرایئمئن داغلیق بؤلگهسئندن یانیما پیغمبرلردن اولان ائکی جاوان اوغلان گلدی. خاهئش ادئرم، اونلارا بئر تالانت#5.22 تقرئبن ۳۴/۵ کئلو گوموش و ائکی دست پالتار ور.“» 23نَعَمان ددی: «بویور ائکی تالانت گؤتور.» اونا تأکئد ادئب ائکی تالانت گوموشو ائکی توربایا قویوب باغلادی و ائکی دست پالتارلا بئرلئکده نؤکرلرئندن ائکئسئنه وردی. نؤکرلر گِخَزئنئن قاباغیندا بونلاری داشیدیلار. 24تپهیه چاتاندا گِخَزی شیلری اونلارین اَلئندن آلیب اِوئنه قویدو. نؤکرلری گری گؤندَردی و اونلار گتدئلر. 25سونرا آغاسی اِلئشَعئن یانینا گدئب قاباغیندا دایاندی. اِلئشَع اوندان سوروشدو: «هارادان گلئرسن، گِخَزی؟» گِخَزی جاواب وردی: «بو قولون هچ یره گتمهدی.» 26اِلئشَع اونا ددی: «او آدام سنی پئشواز اتمک اوچون عاراباسیندان دوشَنده اورهیئم مگر اورادا دیئلدی؟ مگر ائندی گوموش گؤتورمک، پالتار، زیتون و اوزوم باغلاری، قویون-کچی، مال-حیوان، نؤکرلر و کنئزلر آلماق واختیدیر؟ 27بونا گؤره ده نَعَمانین جوزامی ابدی اولاراق سنه و سنئن نسلئنه یاپیشاجاق.» گِخَزی قار کئمی جوزاملی اولوب اونون حوضوروندان چیخدی.
Currently Selected:
۲پادشاهلار 5: SAB
Highlight
Copy
Compare
Share
Want to have your highlights saved across all your devices? Sign up or sign in
@ 2022 Korpu Company
