۲پادشاهلار 17
17
ائسرایئلئن آخیر پادشاهی هوشِعَع
1یهودا پادشاهی آخازین پادشاهلیغینین اونائکئنجی ائلئنده، اِلا اوغلو هوشِعَع سامئرهده ائسرایئل اوستونده پادشاه اولدو و دوقّوز ائل پادشاهلیق اتدی. 2او، ربّئن گؤزونده پئس اولان ائشلر اتدی، آنجاق اؤزوندن قاباقکی ائسرایئل پادشاهلاری کئمی دیئلدی. 3آشور پادشاهی شَلمَنِسِر هوشِعَعئن اوستونه هوجوم گتئردی و هوشِعَع اونا تابع اولوب خراج وردی. 4آمّا آشور پادشاهی هوشِعَعئن قصد حاضیرلادیغیندان خبردار اولدو، چونکی او هم مئصئر پادشاهی سونون یانینا قاصئدلر گؤندَرمئشدی، هم ده هر ائل اولدوغو کئمی آشور پادشاهینا خراج ورمهمئشدی. بونا گؤره ده آشور پادشاهی اونو توتوب زئنداندا اسئر ساخلادی.
سامئرهنئن سوقوطو
5آشور پادشاهی بوتون اؤلکهیه هوجوم گتئردی. او، سامئرهیه یاخینلاشدی و اورانی اوچ ائل موحاصئرهده ساخلادی. 6هوشِعَعئن پادشاهلیغینین دوقّوزونجو ائلئنده، آشور پادشاهی سامئرهنی آلدی و ائسرایئللیلری آشور تورپاغینا اسئر آپاردی. اونلاری خِلَخده، خابور چایی ساحئلئندهکی گوزاندا، و ماد شهرلرئنده یِرلَشدئردی.
7بو ائش اونا گؤره ائسرایئل اؤولادلارینین باشینا گلدی، چونکی تاریلاری ربّئن ضئدّئنه گوناه اتمئشدئلر، او رب کی، اونلاری مئصئر پادشاهی فئرعونون اَسارتی آلتیندان، مئصئر تورپاغیندان چیخارتمیشدی. ائسرایئللیلر آیری آللاهلارا حؤرمت اتدئلر 8و ربّئن ائسرایئل اؤولادلارینین قاباغیندان قوودوغو مئلّتلرئن روسوملارینا و ائسرایئل پادشاهلارینین قویدوغو عادتلره گؤره یاشادیلار. 9گئزلئنده اؤز تاریلاری ربّئن ضئدّئنه دوغرو اولمایان ائشلر گؤردولر. بوندان علاوه، بوتون شهرلرئنده کشئکچی بورجوندن قالالی شهره قدر اؤزلری اوچون پرستئشگاهلار تئکدئلر. 10هر اوجا تپهنئن اوستونده، بول یارپاقلی هر آغاجین آلتیندا اؤزلری اوچون موقدّس سوتونلار و اَشِرا بوتلری برپا اتدئلر. 11ربّئن اونلارین قاباغیندان قوودوغو مئلّتلرئن اتدئیی کئمی، بوتون بو پرستئشگاهلاردا بوخور یاندیردیلار و پئس ائشلر گؤروب ربّی قضبه گتئردئلر. 12ربّئن اونلارا «بله اتمهیئن» دِمئش اولدوغونا باخماییب، بوتلره قوللوق اتدئلر.
13رب بوتون پیغمبرلرئنئن و گؤروجولرئنئن واسئطهسیائله ائسرایئله و یهودایا ائخطار ورئب دمئشدی: «پئس یولونوزدان دؤنون. و بوتون شرئعتده اولان امرلرئمه و قایدالاریما کی، آتالارینیزا امر اتدئم و قوللاریم پیغمبرلرئن واسئطهسیائله سئزه گؤندَردئم، عمل ادئن.» 14آمّا اونلار بو سؤزلره قولاق آسمامیشدیلار و تاریلاری ربّه ائمان اتمهیَن آتالاری کئمی دئکباشلیق اتدئلر. 15اونون قایدالارینی، آتالاری ائله باغلادیغی عهدئنی، و اونلارا وردئیی ائخطارلاری ردّ اتدئلر. بوش شی دالینجا گدئب بوش آداملار اولدولار. رب «اطرافینیزداکی مئلّتلر کئمی اتمهیئن» ددئیی حالدا، اونلار کئمی رفتار اتدئلر. 16اؤز تاریلاری ربّئن بوتون امرلرئندن اوز دؤندَرئب، تؤکمه تئمثاللاری حتّا ائکی تؤکمه دانا بوتونو اؤزلرئنه تاری اتدئلر. اَشِرا بوتو دوزَلدئب بوتون گؤی جئسئملرئنی پرستئش اتدئلر و بَعَله قوللوق اتدئلر. 17سونرا دا اوغوللارینی و قیزلارینی اوددا قوربان وردئلر، فالچیلیغا و باخیجیلیغا اوز گتئردئلر. ربّئن گؤزونده پئس اولان ائشلره اؤزلرئنی ساتیب اونو قضبلَندئردئلر.
18بونا گؤره ده رب ائسرایئللیلره چوخ قضبلهنئب، اونلاری اوز حوضوروندان آتدی. یهودا قبئلهسئندن باشقا، هچ بئری قالمادی.
19یهودالیلار دا اؤز تاریلاری ربّئن امرلرئنه عمل اتمهدئلر و ائسرایئللیلرئن قویدوغو عادتلرله یاشادیلار. 20رب بوتون ائسرایئل نسلئندن اوز دؤندَرئب اونلاری ذلئل اتدی. اونلاری تالانچیلارین اَلئنه وردی و نهایت، اونلاری حوضوروندان اِشئیه آتدی. 21رب ائسرایئلی داوود سولالهسئندن کَسئب آتدیقدا، ائسرایئللیلر نِباط اوغلو یَروبعامی پادشاه اتدئلر. یَروبعام اونلاری ربّئن یولوندان آزدیردی و اونلارا بؤیوک گوناه اتدئردی. 22ائسرایئل اؤولادلاری یَروبعامین اتدئیی بوتون گوناهلارا گؤره رفتار اتدئلر و بو گوناهلاردان اَل چکمهدئلر. 23رب اؤز قولو اولان بوتون پیغمبرلر واسئطهسیائله ددئیی کئمی، نهایت، ائسرایئللیلردن اوز دؤندَردی. اونلار اؤز تورپاقلاریندان آشور تورپاغینا اسئر آپاردیردیلار و بو گونه قدر بلهدئر.
آشورلولارین سامئرهیه تزه ساکئنلر کؤچورتمهسی
24آشور پادشاهی بابئلدن، کوتادان، عَوّهدن، خَماتدان و سِفَروَیئمدن آداملار گتئرئب، ائسرایئل اؤولادلارینین یرئنه سامئرهنئن شهرلرئنده یِرلَشدئردی. اونلار سامئرهیه صاحئب اولدولار و اورانین شهرلرئنده یاشادیلار. 25اونلار اورادا یاشاماغا باشلایاندا، ربّه حؤرمت اتمهدئلر. رب ده آرالارینا شئرلر گؤندَردی و شئرلر اونلاردان بعضیلرئنی اؤلدوردولر. 26اونلار آشور پادشاهی ائله دانیشیب اونا ددئلر: «اسئر ادئب سامئرهنئن شهرلرئنده یِرلَشدئردئیئن مئلّتلر، بو اؤلکه تاریسینین رسم-روسوملارینی بئلمئرلر. او تاری دا آرالارینا شئرلر گؤندَرئب و شئرلر اونلاری اؤلدورور، چونکی بو آداملار اؤلکه تاریسینین رسم-روسوملارینی بئلمئرلر.» 27آشور پادشاهی امر ادئب ددی: «اورادان اسئر اتدئیئنئز کاهئنلردن بئرئنی گری قایتارین، گدئب اورادا یاشاسین و اؤلکه تاریسینین رسم-روسوملارینی اونلارا اؤیرَتسئن.» 28سامئرهدن اسئر اتدئکلری کاهئنلردن بئری گلئب بِیت ائلده یاشادی و ربّه نجه حؤرمت اتمهیی اونلارا اؤیرَتدی.
29لاکئن هر مئلّت اؤز آللاهلارینین بوتونو دوزَلتدی. اونلاری یاشادیقلاری شهرلرده سامئرهلیلرئن تئکدئکلری پرستئشگاهلارین معبدلرئنه قویدولار: 30بابئللیلر سوکّوت بِنوت بوتونو، کوتلولار نِرگل بوتونو، خَماتلیلار اَشئما بوتونو، 31عَوّهلئلر نئبخَز و تَرتاق بوتلرئنی دوزَلتدئلر. سِفَروَیئملیلر اوغوللارینی سِفَروَیئم آللاهلاری اَدرَممِلِک و عَنَممِلِک اوچون اوددا یاندیریردیلار. 32اونلار ربّه ده حؤرمت ادئردئلر. پرستئشگاهلارین معبدلرئنده خئدمت اتمک اوچون اؤز آرالاریندان کاهئنلر سچئب قویدولار. 33اونلار هم ربّه حؤرمت ادئردئلر، هم ده آرالاریندان اسئر اولوندوقلاری مئلّتلرئن روسوملارینا گؤره اؤز آللاهلارینا قوللوق ادئردئلر.
34اونلار بو گونه قدر ده اَوّلکی روسوملارینا گؤره رفتار ادئرلر؛ و ربّه حؤرمت اتمئرلر، اونون قایدالارینا، حؤکملرئنه، یا دا شرئعتئنه کی، رب اونلاری یعقوبون نسلئنه بویورموشدو و آدینی ائسرایئل قویموشدو، عمل اتمئرلر. 35رب یعقوب اؤولادلاری ائله عهد باغلاییب، اونلارا امر ادئب دمئشدی: «باشقا آللاهلارا حؤرمت اتمهیئن. اونلارا باش اَیمهیئن، اونلارا قوللوق ادئب قوربان گتئرمهیئن. 36لاکئن او ربّه حؤرمت ادئن کی، سئزی بؤیوک قودرتی و اوزاتدیغی اَلی ائله مئصئر تورپاغیندان چیخارتدی و آنجاق اونون حوضوروندا اَیئلئن و آنجاق اونا قوربان گتئرئن. 37سئزئن اوچون یازدیغی قایدالارا، حؤکملره، قانونا و امرلره همئشه عمل ادئن و آیری آللاهلارا حؤرمت اتمهیئن. 38سئزئنله باغلادیغیم عهدی یاددان چیخارتمایین. آیری آللاهلارا حؤرمت اتمهیئن، 39فقط تارینیز ربّه حؤرمت ادئن و او سئزی بوتون دوشمنلرئنئزئن اَلئندن قورتارار.» 40آمّا اونلار بو سؤزلره قولاق آسمادیلار و اؤزلرئنئن اَوّلکی روسوملارینا گؤره رفتار اتدئلر. 41بلهجه بو مئلّتلر هم ربّه حؤرمت ادئردئلر، هم ده اؤز بوتلرئنه قوللوق اتمئشدئلر. آتالاری نجه ادئردی، اوغوللاری و نوهلری ده بو گونه قدر بله ادئرلر.
Currently Selected:
۲پادشاهلار 17: SAB
Highlight
Copy
Compare
Share
Want to have your highlights saved across all your devices? Sign up or sign in
@ 2022 Korpu Company
