۲سالنامهلر 32
32
سَنخِرئبئن هوجومو
(۲پاد. ۱۸:۱۳-۱۷، ۱۹:۱۴-۱۹ و ۳۵-۳۷)
1بو صداقتلی ائشلردن سونرا، آشور پادشاهی سَنخِرئب گلئب یهودایا گئردی. او، قالالی شهرلرئن ضئدّئنه اوردوگاه قوردو و ائستهدی کی، اونلاری اَله کچئرتسئن. 2خئزقئیا، سَنخِرئبئن اورشلئم اوستونه دؤیوشمک اوچون گلدئیئنی گؤردوکده، 3اؤز ریئسلری و سرکردهلری ائله مصلحتلَشدی کی، شهردن کناردا اولان سو منبعلرئنی کَسسئن و اونلار خئزقئیایا کؤمک اتدئلر. 4چوخلو خالق ییغیلدی و بوتون سو منبعلرئنئن و اؤلکهدن آخان چایین یوللارینی کَسدئلر. دیئردئلر: «آشور پادشاهلاری نه اوچون گلئب بول سو تاپسینلار؟» 5خئزقئیا قرارلی اولوب دووارین بوتون اوچموش یرلرئنی تئکدی و اونون اوستونده بورجلر دوزَلتدی. باییر طرفدن آیری بئر دووار دا تئکدی، داوودون شهرئنده اولان قالا یاماجینی دا مؤحکملَندئردی. چوخلو سئلاح و قالخان دوزَلتدی. 6او، خالقین اوستونه سرکردهلر قویدو، اونلاری شهر دروازاسی میدانیندا یانینا ییغدی و اونلاری اورَکلَندئرئب ددی: 7«گوجلو و جسور اولون. آشور پادشاهیندان و اونون یانیندا اولان چوخ قوشوندان قورخمایین، روحدان دوشمهیئن، چونکی بئزئمله اولان، اونونلا اولاندان بؤیوکدور. 8اونونلا اولان ائنسان گوجودور، لاکئن بئزئمله اولان تاریمیز ربدئر کی، بئزه کؤمک ادئر و موحارئبهلرئمئزده ووروشور.» خالق یهودا پادشاهی خئزقئیانین سؤزلرئندن اورَکلَندی.
9بوندان سونرا آشور پادشاهی سَنخِرئب یانیندا اولان بوتون قرارگاهی ائله لاکئشئن قاباغیندا دایانارکَن اورشلئمه، یهودا پادشاهی خئزقئیانین و اورشلئمده اولان بوتون یهودالیلارین یانینا نؤکرلرئنی گؤندَردی و اونلار ددی: 10«آشور پادشاهی سَنخِرئب بله دیئر: ”سئز نَیه بِل باغلاییرسینیز کی، اورشلئمده موحاصئرهیه اوتورورسونوز؟ 11مگر خئزقئیا سئزی آجلیقلا و سوسوزلوقلا اؤلومه ورمک اوچون آلدادیب دِمئر: تاریمیز رب بئزی آشور پادشاهینین اَلئندن قورتاراجاق؟ 12او مگر همئن خئزقئیا دیئل کی، تارینین پرستئشگاهلارینی و قوربانگاهلارینی آرادان قالدیردی، یهودایا و اورشلئمه امر ادئب ددی کی بئر قوربانگاهین قاباغیندا پرستئش ادهجکسئنئز و اونون اوستونده بوخور یاندیراجاقسینیز؟ 13مگر بئلمئرسئنئز کی، بوتون اؤلکهلرئن خالقلارینا، من و آتالاریم نه اتدئک؟ مگر او اؤلکهلرئن مئلّتلرئنئن آللاهلاری اؤز تورپاقلارینی منئم اَلئمدن قورتارا بئلدئلر؟ 14آتالاریمین کامئل محو اتدئکلری او مئلّتلرئن بوتون آللاهلاری آراسیندا، هانسی بئری اؤز خالقینی اَلئمدن قورتارا بئلدی کی، سئزئن تارینیز دا سئزی منئم اَلئمدن قورتارا بئلسئن؟ 15قویمایین ائندی خئزقئیا سئزی آلداتسین و بو جور آزدیرسین؛ اونا ائنانمایین. چونکی هچ بئر مئلّتئن و هچ بئر اؤلکهنئن آللاهلاریندان هچ بئری اؤز خالقینی منئم و آتالاریمین اَلئندن قورتارا بئلمهدی. سئزئن تارینیز دا سئزی منئم اَلئمدن قورتارا بئلمَیهجک!“»
16سَنخِرئبئن نؤکرلری رب تارینین و اونون قولو خئزقئیانین ضئدّئنه چوخ شیلر ددئلر. 17او اؤزو ده مکتوبلار یازیب ائسرایئلئن تاریسی ربّی تحقئر اتدی و اونون ضئدّئنه دانیشیب ددی: «اؤلکهلرئن مئلّتلرئنئن آللاهلاری اؤز خالقلارینی نجه اَلئمدن قورتارا بئلمهدئلر، خئزقئیانین تاریسی دا خالقینی منئم اَلئمدن قورتارا بئلمَیهجک.» 18اونون نؤکرلری دووار اوستونده اولان اورشلئم خالقینا بونلاری اوجا سَسله یهودی دئلئنده باغیردیلار کی، اونلاری قورخودوب دهشته سالسینلار و شهری آلسینلار. 19اونلار اورشلئمئن تاریسی بارهده اله دانیشدیلار کی، اله بئل، اَلله دوزَلمئش یر اوزونون اؤزگه خالقلارینین آللاهلاریدیر. 20لاکئن خئزقئیا پادشاه و آموص اوغلو اِشَعیا پیغمبر دوعا ادئب گؤیه فریاد اتدئلر.
21رب بئر ملک گؤندَردی و او، آشور پادشاهینین اوردوگاهیندا اولان بوتون ائگئد دؤیوشچولری، سرکردهلری و ریئسلری محو اتدی. آشور پادشاهی بیآبیرچیلیقلا اؤز اؤلکهسئنه قاییتدی. بئر گون او اؤز آللاهینین معبدئنه گئردئکده، اؤز دوغما اوغوللاریندان بعضئلری اورادا اونو قیلینجلا اؤلدوردولر. 22بلهجه رب خئزقئیانی و اورشلئمده یاشایانلاری آشور پادشاهی سَنخِرئبئن و بوتون باشقا دوشمنلرئنئن اَلئندن قورتاردی و اونلاری هر طرفدن قورودو. 23او واخت چوخ آدام اورشلئمه، ربّه هدئیّهلر و یهودا پادشاهی خئزقئیایا دَیَرلی شیلر گتئردئلر. بوندان سونرا خئزقئیا بوتون مئلّتلرئن گؤزونده اوجالدی.
خئزقئیانین پادشاهلیغینین آخیری
(۲پاد. ۲۰:۱-۲۰، ۱۲-۲۱؛ اِش. ۳۸:۱-۳)
24او گونلرده خئزقئیا اؤلومجول ناخوشلادی. او، ربّه دوعا اتدی، رب ده اونا جاواب وردی و اونا بئر علامت گؤرستدی. 25لاکئن خئزقئیا اونا ادئلَن یاخشیلیغین عوضئنی ورمهدی. چونکی اورهیی کئبئرلَنمئشدی، بونا گؤره ده تارینین قضبی اونون، یهودانین و اورشلئمئن اوستونه گلدی. 26آمّا خئزقئیا اورهیئنئن کئبئرئندن اَل چکئب اؤزونو آلچالتدی، اورشلئمده یاشایانلار دا بله اتدئلر. بونا گؤره ده خئزقئیانین دؤورونده، اونلارین اوستونه ربّئن قضبی گلمهدی.
27خئزقئیانین اولدوقجا چوخ ثروتی و شؤهرتی وار ائدی. او اؤزونه قیزیل-گوموش، قئیمتلی داشلار، عطرئیّات، قالخانلار و هر جور قئیمتلی اشیا اوچون خزئنهلر تئکدی. 28بوغدا، تزه شراب و یاغ محصوللاری اوچون آنبارلار، هر جور حیوان اوچون آخورلار و سورولر اوچون آغیللار تئکدی. 29او اؤزو اوچون شهرلر ده تئکدی. اونون چوخ قویون-کچئسی و مال-حیوانی وار ائدی، چونکی تاری اونا لاپ چوخ مال-دؤولت ورمئشدی. 30همئن خئزقئیا ائدی کی، گئخون سولارینین یوخاری منبعئنی باغلادی و اونلاری آشاغییا، قربه طرف، داوودون شهرئنه کچئرتدی. خئزقئیا بوتون ائشلرئنده اوغور قازاندی. 31آمّا او زامان کی، بابئل حؤکمدارلاری اؤلکهده باش ورن علامت بارهده سوروشماق اوچون اِلچئلر گؤندَردئلر، بو ائشده تاری خئزقئیانی ائمتاحانا چکئب اورهیئنده اولان هر شیی بئلمک اوچون اونو ترک اتدی.
32خئزقئیانین قالان ائشلری و صداقتلی عمللری بارهده آموص اوغلو اِشَعیا پیغمبرئن نَبئلئیئنده، یهودا و ائسرایئل پادشاهلارینین کئتابیندا یازیلیبدیر. 33خئزقئیا اؤلوب آتالاری ائله یاتدی و اونو داوود سولالهسئنئن قبئرلرئنئن یوخاریسیندا باسدیردیلار. اؤلدویو زامان بوتون یهودالیلار و اورشلئمده یاشایانلار اونا احتئرام گؤرستدئلر. اونون یرئنه اوغلو مِنَسّه پادشاه اولدو.
Currently Selected:
۲سالنامهلر 32: SAB
Highlight
Copy
Compare
Share
Want to have your highlights saved across all your devices? Sign up or sign in
@ 2022 Korpu Company
