۱سمویئل 4
4
عهد ساندیغینین اَله کچمهسی
1سمویئلئن سؤزو بوتون ائسرایئله یاییلدی. او دؤورده ائسرایئللیلر فئلئسطلیلرله دؤیوشمک اوچون چیخدیلار. ائسرایئللیلر اِبِنعِزِرده، فئلئسطلیلر ده اَفِقده اوردوگاه قوردولار. 2فئلئسطلیلر ائسرایئللیلرله دؤیوشمک اوچون دوزولدولر. دؤیوش قیزیشاندا ائسرایئللیلر فئلئسطلیلره مغلوب اولدولار و دؤیوش میدانیندا دؤرد مئنه یاخین ائسرایئللی قیریلدی. 3خالق اوردوگاها قاییدارکَن ائسرایئلئن آغساقّاللاری بئربئرئندن سوروشدولار: «گؤرهسن رب بو گون بئزی فئلئسطلیلر قاباغیندا نه اوچون مغلوب اتدی؟ شئلودان ربّئن عهد ساندیغینی یانیمیزا گتئرک. قوی آرامیزدا اولسون و بئزی دوشمنلرئن اَلئندن قورتارسین.» 4بلهجه خالق شئلوها آدام گؤندَردی. کرّوبلار آراسیندا تخت قورموش قوشونلار ربّئن عهد ساندیغینی اورادان گتئردئلر؛ عِلینئن ائکی اوغلو خوفنی و پئنِخاس تارینین عهد ساندیغینین یانیندا ائدی.
5ربّئن عهد ساندیغی اوردوگاها چاتان کئمی بوتون ائسرایئللیلر وار گوجلری ائله اِله قیشقیردیلار کی، یر تئترهدی. 6فئلئسطلیلر بو قیشقیریغین گورولتوسونو اشئدنده ددئلر: «عئبرانئلرئن اوردوگاهیندا نئیه بله بؤیوک قیشقیریق و گورولتو وار؟» سونرا بئلدئلر کی، ربّئن ساندیغی اوردوگاها گلئب. 7فئلئسطلیلر قورخوب ددئلر: «تاری اوردوگاها گلئب، وای حالیمیزا! چونکی بوندان اوّل بله بئر شی اولماییبدیر. 8وای حالیمیزا! بو قودرتلی آللاهلارین اَلئندن بئزی کئم قورتاراجاق؟ بونلار او آللاهلاردیلار کی، صحرادا مئصئرلیلره هر جور بلالار وردئلر. 9ای فئلئسطلیلر، جسور اولون، کئشی کئمی دایانین! یوخسا عئبرانئلر سئزه نجه بویون اَیدئلر، سئز ده اونلارا اِله بویون اَیهجکسئنئز! بونا گؤره کئشی کئمی دایانین و دؤیوشون!»
10فئلئسطلیلر ووروشدولار و ائسرایئل مغلوب اولدو، و هر کس اؤز چادیرینا قاچدی. چوخ بؤیوک قیرغین اولدو و ائسرایئللیلردن اوتوز مئن پئیادا هلاک اولدو. 11تارینین ساندیغی اسئر آپاریلدی و عِلینئن ائکی اوغلو خوفنی و پئنِخاس اؤلدولر.
عِلینئن اؤلومو
12بئر نفر بِنیامئنلی دؤیوش یرئندن قاچدی و اله همئن گون گلئب شئلوها چاتدی. اونون پالتاری جیریلمیش، باشی دا توز-تورپاق ائچئنده ائدی. 13باخ، او گلن زامان عِلی کورسو اوستونده اوتوروب یول کناریندا گؤزلهیئردی و تارینین ساندیغیندان اؤتری اورهیی چیرپینیردی. بو آدام شهره گئرئب باش ورن حادئثهلری دانیشاندا بوتون شهرده شئون قالخدی. 14عِلی بو سَسی اشئدنده ددی: «بو نه قیشقیریقدیر؟» بو آدام تز گلئب هر شیی عِلئیه ددی. 15بو زامان عِلی دوخسان سکّئز یاشیندا ائدی، آرتیق گؤزلری توتولموشدو، گؤرموردو. 16همئن آدام عِلئیه ددی: «من دؤیوش میدانیندان گلمئشم. بو گون دؤیوشدن قاچدیم.» عِلی سوروشدو: «اوغلوم، نه باش وردی؟» 17خبر گتئرن آدام بله جاواب وردی: «ائسرایئللیلر فئلئسطلیلرئن قاباغیندان قاچیبلار و خالق آراسیندا بؤیوک قیرغین اولوب. ائکی اوغلون خوفنی ائله پئنِخاس اؤلوب، تارینین ساندیغی دا اسئر آپاریلیبدیر.» 18بو آدام تارینین ساندیغیندان دانیشان زامان عِلی کورسودن آرخایا، قاپینین یانینا ییخیلدی؛ هم قوجا، هم ده کؤک اولدوغو اوچون بوینو سینیب اؤلدو. او، قیرخ ائل ائسرایئل خالقینا داورلئک اتمئشدی.
19عِلینئن گلئنی، یعنی پئنِخاسین آروادی بویلو ائدی. دوغما واختی چاتمیشدی. تارینین ساندیغینین اَله کچئرئلدئیئنی، قایینآتاسی ائله اَرئنئن اؤلوم خبرئنی اشئدن واخت آغریسی توتدو و چؤمبهلئب دوغدو. 20اؤلوم آیاغیندا اورادا دوران آروادلار ددئلر: «قورخما، بئر اوغلون اولدو.» آمّا او اعتئنا اتمهیئب جاواب ورمهدی. 21اوغلانین آدینی ائکابود#4.21 عئبرانی دئلئنده «جلال یوخ» قویوب ددی: «جلال ائسرایئلدن گدئب.» چونکی تارینین ساندیغی اَله کچمئش، قایینآتاسی ائله اَری ده اؤلموشدو. 22او ددی: «جلال ائسرایئلدن گدئب، چونکی تارینین ساندیغی اسئر آپاریلیب.»
Currently Selected:
۱سمویئل 4: SAB
Highlight
Copy
Compare
Share
Want to have your highlights saved across all your devices? Sign up or sign in
@ 2022 Korpu Company
