۱سمویئل 26
26
داوودون گئنه شاعولا رحم اتمهسی
1زئفلیلر گئبعایا، شاعولون یانینا گلئب ددئلر: «مگر داوود خَکئلا تپهسئنده کی، یِشئمونون موقابئلئندهدئر، گئزلَنمئر؟» 2شاعول دوروب ائسرایئلدن اوچ مئن سچمه آدام گؤتوردو و داوودو آختارماق اوچون زئف صحراسینا اِندی. 3او، یِشئمونلا اوزبهاوز اولان خَکئلا تَپهسئندهکی یولون کناریندا اوردوگاه قوردو. داوود صحرادا قالیردی. شاعولون اونون دالینجا گلدئیئنی گؤرنده، 4داوود جاسوسلار گؤندَردی و حقئقتن، شاعولون گلدئیئنی اؤیرَندی. 5او قالخیب شاعولون اوردوگاه قوردوغو یره گلدی و شاعوللا قوشون باشچیسی نِر اوغلو آبنِرئن یاتدیغی یِره باخدی. شاعول اوردوگاهین اورتاسیندا یاتیردی. خالق اونون دؤورهسئنده دوشَرگه سالمیشدی.
6داوود خئتلی اَخئمِلِکه و یوآبین قارداشی صِرویا اوغلو ابئشهیه ددی: «کئم منئمله اوردوگاها، شاعولون یانینا اِنَر؟» اَبشهی ددی: «من سنئنله اِنهرم.» 7داوود و اَبشهی گجه خالقین یانینا چاتدیلار و باخ، شاعول اوردوگاهین اورتاسیندا یاتیب یوخویا گتمئشدی، نئزهسی ده باشی اوستونده یره سانجیلمیشدی. آبنِرله خالق دا اونون اطرافیندا یاتمیشدیلار. 8اَبشهی داوودا ددی: «تاری بو گون دوشمنئنی سنه تسلئم ادئب. ائندی ده قوی نئزه ائله اونو بئردفهلئک یره اله یاپیشدیریم کی، ائکئنجی دفه وورماغا احتئیاج اولماسین.» 9آمّا داوود ابئشهیه ددی: «یوخ، اونو اؤلدورمه! چونکی ربّئن مسح اتدئیئنه اَل قالدیران، مگر گوناهسیز ساییلار؟» 10داوود گئنه ددی: «وار اولان ربّه آند اولسون، رب اونو قطعن ووراجاق. اله گون گلهجک کی، اؤز اجلی ائله اؤلهجک یا دا دؤیوشده هلاک اولاجاق. 11مندن ائراق اولسون کی، ربّئن مسح اتدئیئنه اَل قالدیرام. خاهئش ادئرم، ائندی باشینین یانینداکی نئزهسئنی و سو قابینی گؤتور، گِدَک.» 12داوود شاعولون باشینین یانینداکی نئزهسی ائله سو قابینی گؤتوردو و اونلار گتدئلر. اونلاری گؤرن و بو ائشی بئلن اولمادی. چونکی هامی یاتمیشدی. رب طرفئندن اونلارین اوستونه درئن یوخو گلدئیئنه گؤره هامی یاتمیشدی.
13داوود او بئری طرفه کچئب اوزاقدا، داغین باشیندا دوردو؛ اونلارین آراسیندا چوخ آرا وار ائدی. 14داوود خالقی و نِر اوغلو آبنِری چاغیریب ددی: «آبنِر، مگر منه جاواب ورمهیهجکسن؟» آبنِر جاواب وردی: «سن کئمسن کی، قیشقیرا-قیشقیرا پادشاهی چاغیریرسان؟» 15داوود آبنِره ددی: «مگر سن کئشی دیئلسن؟ ائسرایئلده سنه بَنزهر کئم وار؟ بس نئیه آغان پادشاهین کشئیئنی چکمئرسن؟ چونکی خالق آراسیندان بئری گلمئشدی کی، آغان پادشاهی اؤلدورسون. 16ائشئنی یاخشی گؤرمورسن. وار اولان رب حاقّی، هامینیز اؤلومه لایئق آداملارسینیز، اونا گؤره کی آغانیزین، ربّئن مسح اتدئیئنئن کشئیئنی چکمئرسئنئز. باخ، پادشاهین باشینین یانیندا اولان نئزه و سو قابی ائندی هارادادیر؟»
17شاعول داوودون سَسئنی تانیییب ددی: «بو سنئن سَسئندئر، اوغلوم داوود؟» داوود ددی: «منئم سَسئمدئر، آغام پادشاه.» 18سونرا سؤزونه داوام وردی: «آغام نه اوچون قولونو بله تعقئب ادئر؟ مگر من نه اتمئشم؟ اَلئمدن نه پئسلئک گلئب؟ 19خاهئش ادئرم، آغام پادشاه ائندی قولونون سؤزلرئنه قولاق آسسین. اگر منئم ضئدّئمه سنی قالدیران ربدئر، قوی بئر تقدئم قبول اتمهیه راضی اولسون. یوخ، اگر بشر اؤولادلاریدیر، اونلار رب حوضوروندا ملعوندورلار. چونکی بو گون منی قوووبلار کی، ربّئن ائرثئندن پاییم اولماسین و دیئرلر: ”گت، باشقا آللاهلارا قوللوق ات.“ 20ائندی قویما قانیم ربّئن حوضوروندان اوزاق یرده تؤکولسون. ائسرایئل پادشاهی تَک بئرهنی آختارماق اوچون اله گلئب کی، اله بئل، داغلاردا کَکلئک شئکار ادئر.»
21او واخت شاعول ددی: «گوناه اتدئم، قاییت، اوغلوم داوود. منئم جانیم بو گون سنئن گؤزونده قئیمتلی اولدوغو اوچون، بئر داها سنه پئسلئک اتمیهجیم. باخ، آغیلسیزلیق ادئب لاپ چوخ سهو اتمئشم.» 22داوود جاواب وردی: «بودور نئزَن، ای پادشاه! قوی نؤکرلرئندن بئری گلئب اونو آپارسین. 23رب هر کسه اؤز صالحلئیئنئن و وفاسینین عوضئنی ورهجک. بو گون رب سنی منئم اَلئمه وردی، آمّا من ائستمهدئم کی، ربّئن مسح اتدئیئنه اَل قالدیریم. 24قوی بو گون سنئن جانین گؤزومده نجه قئیمتلی اولدوغو کئمی، منئم جانیم دا ربّئن گؤزونده اله قئیمتلی اولسون و منی هر دارلیقدان قورتارسین.» 25او زامان شاعول داوودا ددی: «اوغلوم داوود، بختور اولاسان! سن بؤیوک ائشلر گؤروب قطعن ظفر قازاناجاقسان.» بوندان سونرا داوود اؤز یولو ائله گتدی و شاعول دا اؤز یرئنه قاییتدی.
Currently Selected:
۱سمویئل 26: SAB
Highlight
Copy
Compare
Share
Want to have your highlights saved across all your devices? Sign up or sign in
@ 2022 Korpu Company
