۱سمویئل 2
2
خَنّانین دوعاسی
1خَنّا ربّه دوعا ادئب ددی:
«اورهیئم ربده جوشا گلئر،
رب منه بؤیوک گوج ورئر،#2.1 «منه بؤیوک گوج ورئر» عئبرانی دئلئنده «بوینوزومو اوجالدیر» ائصطئلاحیدیر.
آغزیم دوشمنلرئمئن قاباغیندا فخرله دانیشیر،
چونکی سنئن نئجاتیندا سوئنئرم.
2رب کئمی موقدّس بئری یوخدور،
دوغرودان دا، سنئن کئمی هچ کس یوخدور!
تاریمیز کئمی قایا یوخدور!
3آرتیق بؤیوک-بؤیوک دانیشمایین،
آغزینیزدان تکبّورلو سؤزلر چیخماسین.
چونکی رب هر شیی بئلَن تاریدیر،
اودور عمللری اؤلچَن!
4جنگاورلرئن کامانلاری قیریلیر،
آمّا ییخیلانلار قودرتله قورشانیرلار.
5توخلار چؤرک اوچون اوجرته ائشلهیئرلر،
لاکئن آجلار دویورولورلار.
حتّا سونسوز آرواد یدّی اؤولاد دوغور،
آمّا چوخاوشاقلی آرواد سولور.
6رب اؤلدورور ده، دئرئلدئر ده.
اؤلولر دئیارینا اِندئرئر و چیخاردیر.
7رب یوخسوللوق و وار-دؤولت گؤندَرئر،
آلچالدیر دا، اوجالدیر دا.
8او، یوخسوللاری توز-تورپاغین ائچئندن قالدیریر،
فاغیرلاری کوللوکدن چیخاردیر کی،
نجئبزادهلرله اوتورسونلار،
و شرف تختئنی مئراث آلسینلار.
چونکی یرئن پایالاری ربّئندئر،
دونیانی اونلارین اوستونده قوردو.
9موتّقیلرئنئن قدملرئنی حئفظ ادئر،
لاکئن پئسلر ظولمتده ساکئت اولورلار.
چونکی ائنسان اؤز قووّهسی ائله ظفره چاتماز.
10ربّه ضئدّ دورانلار پارچا-پارچا اولاجاقلار،
اونلارین اوستونه گؤیلری گورولتویه گتئرهجک.
رب بوتون دونیانی موحاکئمه ادهجک،
اؤز پادشاهینا قووّت ورهجک،
مسح اتدئیئنه بؤیوک گوج ورهجکدئر!#2.10 و یا عئبرانی ائصطئلاحیندا: بوینوزونو قالدیراجاقدیر»
11سونرا اِلقانا راماداکی اِوئنه قاییتدی. آمّا اوغلان اوشاغی سمویئل کاهئن عِلینئن نظری آلتیندا ربّه خئدمت ادئردی.
عِلینئن اوغوللارینین پئس عمللری
12عِلینئن اوغوللاری یاراماز آداملار ائدئلر؛ نه ربّی تانیییردیلار، 13نه ده خالقلا کاهئنلر عادتئنه گؤره رفتار ادئردئلر. قوربان تقدئم ادئلن زامان، اَت قاینایارکَن، کاهئنئن خئدمتچئسی اَلئنده اوچدئشلی اَت قارماغی ائله گلردی. 14اَت قارماغینی قازانا، چاینئکه، تاوایا، یا دا بارداغا سالاردی و قارماقلا نه چیخاردی، کاهئن اونو اؤزو اوچون گؤتورَردی. اونلار شئلوها قوربان گتئرن ائسرایئللیلرئن هامیسی ائله بله رفتار ادئردئلر. 15اوستهلئک ده قوربانین پئیئنی یاندیرمادان اوّل، کاهئنئن خئدمتچئسی گلئب قوربان گتئرن آداما دئیَردی: «کاهئنه کاباب اوچون اَت ور. چونکی سندن پئشمئش اَت یوخ، چئی اَت قبول ادهجک.» 16اگر قوربان گتئرن دئیَردی: «گرک اوّلجه پئیی یاندیرسینلار و سونرا ائستهدئیئن قدر گؤتور»، خئدمتچی جاواب وِرَردی: «خیر، گرک ائندی ورهسن، یوخسا زورلا گؤتورهرم.» 17ربّئن گؤزو قاباغیندا بو جاوانلارین گوناهی چوخ بؤیوک ائدی، چونکی اونلار ربّه گتئرئلَن تقدئملری تحقئر ادئردئلر.
18اوغلان اوشاغی سمویئل اَینئنه کتان اِفود گئیهرک ربّئن حوضوروندا خئدمت ادئردی. 19آناسی سمویئله کئچئک جوبّه تئکَردی. هر ائل اَری ائله ائلّئک قوربانی تقدئم اتمک اوچون شئلوها گلنده، جوبّهنی ده گتئرئب اوغلونا وِرَردی. 20سونرا کاهئن عِلی اِلقانا ائله آروادینا برکت ورئب دئیَردی: «قوی رب سنه ربّه وقف اتدئیئن اوشاغین یرئنه بو آرواددان اؤولادلار ورسئن.» بوندان سونرا اونلار اِولرئنه قاییداردیلار. 21ربّئن لوطفی ائله خَنّا گئنه بویلو اولوب اوچ اوغول و ائکی قیز دوغدو. اوغلان اوشاغی سمویئل ده ربّئن حوضوروندا بؤیویوردو.
22عِلی آرتیق چوخ قوجالمیشدی. او، اوغوللارینین بارهسئنده هر شیی اشئتمئشدی کی، نجه بوتون ائسرایئللیلرله یاوا رفتار ادئرلر و حوضور چادیرینین گئرئشئنده خئدمت ادن آروادلارلا یاتیرلار. 23عِلی اونلارا ددی: «نئیه بله ائشلر گؤرورسونوز؟ نئیه بوتون خالقدان اشئتدئیئم بو پئس عمللری ادئرسئنئز؟ 24یوخ، اوغوللاریم! ربّئن خالقی آراسیندا گَزَن اشئتدئیئم خبرلر یاخشی دیئل. 25اگر کئمسه، کئمسهنئن ضئدّئنه گوناه ائشلَتسه، اونلار اوچون تاری شفئع اولار. آمّا ربّئن ضئدّئنه گوناه ائشلَدنه کئم شفئع اولا بئلر؟» لاکئن اونلار آتالارینین سؤزلرئنه قولاق آسمازدیلار، چونکی رب اونلاری اؤلومه محکوم اتمئشدی. 26اوغلان اوشاغی سمویئل گتدئکجه بؤیویوب، ربّئن و ائنسانلارین گؤزونده لوطف قازانیردی.
عِلینئن اوغوللاری حاقّیندا پیغمبرلئک سؤزو
27بو سیرالاردا بئر تاری آدامی عِلینئن یانینا گلئب ددی: «رب بله دیئر: ”مگر من اؤزومو مئصئرده آتانین اِوی نسلئنه، فئرعونون خالقینا قول اولارکن آیدین گؤرسدمهدئم؟ 28مگر بوتون ائسرایئل قبئلهلری آراسیندان اونلاری سچمهدئم کی، کاهئنلرئم اولسونلار، قوربانگاهیما یاخین گلئب بوخور یاندیرسینلار و منئم حوضورومدا اِفود داشیسینلار؟ مگر ائسرایئللیلرئن بوتون اودلا تقدئم اولانلارینی آتانین اِوی نسلئنه ورمهدئم؟ 29بس نه اوچون مسکنئمه امر اتدئیئم قوربان و تقدئملری پایمال ادئرسئنئز؟ نه اوچون خالقیم ائسرایئلئن بوتون تقدئملرئنئن لاپ اعلاسی ائله اؤزونوزو کؤکَلدئب، اوغوللارینی مندن اوستون توتورسان؟“» 30اونا گؤره ده ائسرایئلئن تاریسی رب بله دیئر: «حقئقتن دمئشدئم کی، عایئلَن و آتا نسلئن همئشهلئک منئم حوضورومدا خئدمت ادهجک.» آمّا ائندی رب دیئر: «ائراق اولسون مندن، چونکی منه حؤرمت ادنلره حؤرمت ادهجیم. آمّا منی سایمایانلار حقارت آلتیندا قالاجاقلار! 31باخ، اله گونلر گلئر کی، سنئن ده، آتا نسلئنئن ده گوجونو قیراجاغام و نسلئندن هچ کئم اوزون عؤمور سورمهیهجک. 32گرچی ائسرایئله یاخشیلیق ادهجیم، لاکئن سن مسکنئمئن پرئشانلیغینی گؤرهجکسن و آرتیق نسلئندن هچ کئم اوزون عؤمور سورمهیهجک. 33لاکئن قوربانگاهیمدان بوتون نسلئنئن آیاغینی کسمیهجیم، اله کی، گؤزلرئن آغلاماقدان کور اولاجاق و جانین عذاب چکهجک و نسلئندن اولانلارین هامیسی جاوانلیقلاریندا اؤلهجکلر. 34ائکی اوغلونون یعنی خوفنی و پئنِخاسین هَمَن بئر گونده اؤلمهسی سنه بئر علامت اولاجاق. 35آمّا من اؤزومه وفالی بئر کاهئن سچهجیم کی، اورهیئمئن و جانیمین ائستهدئیئنی یرئنه یتئرسئن. اونون اِوئنی مؤحکم بئنا ادهجیم. او، مسح اتدئیئمئن حوضوروندا ابدهجک خئدمت ادهجک. 36عایئلَندن صاغ قالان هر کس بئر آز گوموش پول یا دا بئر تئکه چؤرک اوچون گلهجک و اونون قاباغیندا اَیئلئب یالواراجاق: ”خاهئش ادئرم منه بئر کاهئنلئک ائشی ور کی، بئر تئکه چؤرک الئمه گلسئن.“»
Currently Selected:
۱سمویئل 2: SAB
Highlight
Copy
Compare
Share
Want to have your highlights saved across all your devices? Sign up or sign in
@ 2022 Korpu Company
