۱سالنامهلر 28
28
معبدئن تئکئلئشی بارهده داوودون آخیر مصلحتلری
1داوود ائسرایئلئن بوتون باشچیلارینی یعنی قبئله باشچیلارینی، پادشاها خئدمت ادن بؤلمهلرئن باشچیلارینی، مئنباشیلاری و یوزباشیلاری، پادشاهلا اوغوللارینین بوتون مولکونه و حیوانلارینا باخانلارین باشچیلارینی، سارای خئدمتچئلرئنی، سرکردهلری و بوتون ائگئد آداملاری اورشلئمه ییغدی.
2داوود پادشاه آیاغا قالخیب ددی: «قارداشلاریم و خالقیم، منه قولاق آسین! اورهیئمده بو آرزو وار ائدی کی، ربّئن عهد ساندیغی و تاریمیزین آیاق کورسوسو اوچون دائمی بئر اِو تئکئم. بونا گؤره ده اونو تئکمک اوچون حاضیرلیق گؤردوم. 3لاکئن تاری منه ددی: ”سن منئم آدیما معبد تئکمیهجکسن، چونکی سن حرب آدامیسان و قان تؤکوبسن.“ 4آمّا ائسرایئلئن تاریسی رب بوتون نسلئمدن منی سِچدی کی، ائسرایئل اوستونده ابدئلئک پادشاه اولوم. چونکی او یهودانی و یهودا قبئلهسئندن ده منئم نسلئمی سچدی کی، حؤکمدار اولسون. بوتون ائسرایئل اوستونده پادشاه اتمک اوچون نسلئمئن آراسیندا، من اونون خوشونا گلدئم. 5ربّئن منه وردئیی چوخلو اوغول آراسیندان دا اوغلوم سولیمانی سچدی کی، ائسرایئل اوستونده ربّئن پادشاهلیق تختئنده اوتورسون. 6رب منه ددی: ”اوغلون سولیمان دا همئن آدامدیر کی، منئم معبدئمی و صَحنلرئمی تئکهجک، چونکی اونو اؤزومه اوغول سِچمئشم، من ده اونا آتا اولاجاغام. 7اگر بو گون اولدوغو کئمی امرلرئمه و حؤکملرئمه عمل اتمکده صادئق اولسا، اونون پادشاهلیغینی ابدهجک برقرار ادهجیم.“
8بونا گؤره ائندی بوتون ائسرایئللیلرئن، ربّئن جاماعاتینین گؤزو قاباغیندا، تاریمیز دا اِشئدرکن، بله تاپشیریرام: تارینیز ربّئن بوتون امرلرئنه عمل ادئن و اونلاری اؤیرهنئن کی، بو نعمتلی تورپاغی مولک ادهسئنئز و سئزدن سونرا اؤولادلارینیزا اونو ابدی مئراث ورهسئنئز.
9سن ده، اوغلوم سولیمان، آتانین تاریسینی تانی، بوتون اورَک و فئکئرله اونا قوللوق ات، چونکی رب بوتون اورَکلری تفتئش ادئر و فئکئرلرئن بوتون نئیّتلرئنی بئلئر. اگر اونو آختارسان، اونو تاپارسان. لاکئن اگر اونو ترک ادهسن، او دا سنی ابدهجک آتار. 10ائندی باخ، رب سنی سچئبدئر کی، موقدّس مکان اولان اِوی تئکهسن. جسارتلی اول و بو ائشی گؤر.»
11داوود اوغلو سولیمانا اِیوانین، اونون بئنالارینین، خزئنهلرئنئن، یوخاری اوتاقلارین، ائچ اوتاقلارین و کفّاره قاپاغینین نقشهسئنی و 12روحون واسئطهسیائله اونا آشکار اولموش بوتون بونلارین نقشهسئنی وردی: ربّئن معبدئنئن حَیَطلری، اطرافداکی بوتون اوتاقلار، تاری معبدئنئن خزئنهلری، تقدئس اولونان شیلرئن خزئنهلری، 13کاهئنلرئن و لاوئلیلرئن بؤلوکلری، ربّئن معبدئنده هر جور خئدمت ائشی، ربّئن معبدئنده اولان بوتون خئدمت اشیالاری، 14هر جور خئدمت اوچون ائشلهدئلَن بوتون قیزیلین چکئسئنه گؤره قیزیل اشیالار، هر جور خئدمت اوچون ائشلهدئلَن بوتون گوموشون چکئسئنه گؤره گوموش اشیالار، 15هر چیراقدانین و اونون چیراقلارینین چکئسئنه گؤره قیزیل چیراقدانلار و اونلارین قیزیل چیراقلاری، هر جور خئدمت اوچون چکئسئنه گؤره گوموش چیراقدانلار و اونلارین چیراقلاری، 16تقدئم چؤرکلری قویولان مئزلر اوچون هر مئزئن چکئسئنه گؤره قیزیل، هر گوموش مئز اوچون گوموش، 17خالئص قیزیلدان اولان چَنگللر، لَیَنچهلر و سَهَنگلر، هر کاسانین چکئسئنه گؤره قیزیل کاسالار، هر کاسانین چکئسئنه گؤره گوموش کاسالار، 18چکئسئنه گؤره خالئص قیزیلدان بوخور قوربانگاهی. داوود حتّا کَرّوبلارین تصوئرئنی ده وردی کی، نجه قانادلارینی آچیب ربّئن عهد ساندیغینی اؤرتموشدولر. 19داوود ددی: «بونلارین هامیسینین تصوئری بوتون تفسئلاتی ائله یازیلی شکئلده رب طرفئندن منه آشکار ادئلدی.»
20داوود اوغلو سولیمانا ددی: «گوجلو و جسارتلی اول، بو ائشی گؤر. قورخما و روحدان دوشمه، چونکی رب تاری، منئم تاریم، سنئنلهدئر. ربّئن معبدئنئن بوتون خئدمت ائشی آخیرا چاتمامیش او نه سنی آتار، نه ده سنی ترک اِدَر. 21کاهئنلرئن و لاوئلیلرئن بؤلوکلری تاری معبدئنئن بوتون خئدمتی اوچون حاضیر دورورلار. سنئن یانیندا آداملار دا وار کی، اؤز گؤیلو ائله بوتون ائشلر اوچون هر جور خئدمتی باجاریرلار. ریئسلر و بوتون خالق سنئن هر امرئنی گؤزلهیئر.»
Currently Selected:
۱سالنامهلر 28: SAB
Highlight
Copy
Compare
Share
Want to have your highlights saved across all your devices? Sign up or sign in
@ 2022 Korpu Company
