روملولارا 6
6
گوناها اؤلموش و مسئحه دئری
1بس نه دئیک؟ اله بله گوناه اله یَک کی، تارینین فیضی چوخالسین؟ 2اصلا! بئز کی، گوناها اؤلدوک، آرتیق اوندا نجه یاشایا بئلهرئک؟ 3مگر بئلمئرسئز کی، بئزئم هامیمیز کی، مسئح عئسادا تعمئد قوسلی اولونموشوق، اونون اؤلومونده تعمئد اولونموشوق؟ 4بونا گؤره ده، اونون اؤلومونده تعمئد اولونماق ائنان بئز ده اونونان برابر دفن اولونموشوق؛ اله کی، نجه مسئح آتانین جلالینین واسئطهسی ائنن اؤلولردن دئرئلدی، بئز ده همن جور حیاتین تزهلئیئنده یاشایاق.
5اگر اونون اؤلومونه بنزهر بئر اؤلومده اونونان بئر اولموشوق، اونون دئرئلمهسئنه بنزهر بئر دئرئلمهده ده اونونان بئر اولاجاغیق. 6بونی بئلئرئک کی، کؤهنه مَنلئیئمئز اونونان چارمیخا چکئلدی، اله کی، گوناهین بدنی قووّتدن دوشسون و آرتیق گوناها قول اولمایاق. 7چونکی اؤلموش آدام گوناهدان آزاد اولوب.
8اگر مسئح ائنن اؤلموشوک، اونونان یاشایاجاغیمیزا دا ائنانیریق. 9بئز بئلئرئک ده کی، مسئح اؤلولردن دئرئلمئش اولدوغونا گؤره، بئر داها اؤلمهیهجک. اؤلوم ده اونون اوستونه آرتیق حؤکمرانلیق اله مئیه جک. 10او کی، اؤلدی، بئر دفهلئک گوناها اؤلدی؛ آمّا ائندی یاشادیغی حیاتی تارییا یاشاییر.
11بله ده، سئز ده اؤزوزی گوناها اؤلی، آمّا مسئح عئسادا تارییا دئری سایین. 12پس قویمایین کی، گوناه سئزئن فانی بدنئزه حؤکمرانلیق اله سئن، اله کی، اونون هاوا-هوسلرئندن ائطاعت الئیهسئز. 13بدنئزئن عوضولرئنی ده پئسلئک آلتلری اولماق اوچون گوناها تسلئم اله مهیئن. آمّا اؤزوزی اؤلولردن دئرئلنلر کئمی تارییا و بدنئزئن عوضولرئنی ده صالحلئک آلتلری اولماق اوچون تارییا تسلئم الهیئن. 14گوناه سئزه حؤکمرانلیق اله مئیهجک؛ چونکی سئز شرئعت آلتیندا یوخ، فیض آلتینداسیز.
صالحلئک قوللاری
15ائندی نه؟ شرئعتئن حاکئمئیّتی آلتیندا یوخ، فیض آلتیندا اولدوغوموز اوچون گوناه الهیک؟ اصلا! 16مگر بئلمئرسئز کی، ائطاعت الهین قوللار کئمی، اؤزوزی کئمه تسلئم الئیهسئز اونون قوللاریسیز؟ ائستر اؤلوم گتئرن گوناها اولسون، ائستر صالحلئک گتئرن ائطاعته. 17آمّا تارییا شوکور اولسون کی، اوّل گوناهین قوللاری اولدوغوز حالدا، او تعلئمدن اورَکدن ائطاعت اله دئز کی، اؤزوزی اونا تسلئم الهدئز. 18و گوناهدان آزاد اولوب، صالحلئیئن قولی اولوبسوز.
19جئسمانی طبئعتئزئن ضعئفلئیی اوزوندن ائنسانلارین دوشوندویی کئمی صؤحبت الهیئرم. نجه کی، عوضولرئزی قاباقجا پئسلئک و شرئعتسئزلئیه قول کئمی تسلئم اله مئشدئز و نتئجهسی ده بو ائدی کی، شرئعتی داها چوخ آیاق آلتینا قویاسیز. اِله اوجور ده ائندی عوضولرئزی صالحلئیه قول کئمی تسلئم الهیئن کی، نتئجهسی ده سئزئن موقدّس اولماغیزدیر. 20چونکی سئز گوناهین قوللاری اولدوغوز زامان، صالحلئکدن آزاد ائدئز. 21بس او زامان، او ائشلردن اؤتری کی، ائندی اولاردان اوتانیرسیز، نه ثمرئز اولدی؟ چونکی اولارین آخیری اؤلومدور. 22آمّا ائندی گوناهدان آزاد اولونوب، تارییا قول اولدوغوز اوچون آلدیغیز ثمره موقدّسلئکدئر، آخیریز دا ابدی حیات. 23چونکی گوناهین موزدی اؤلومدور، آمّا تارینین هدئیّهسی ربّئمئز مسئح عئسادا ابدی حیاتدیر.
Currently Selected:
روملولارا 6: CAB
Highlight
Copy
Compare
Share
Want to have your highlights saved across all your devices? Sign up or sign in
@ 2024 Korpu Company
